Münxenin məşhur Rezidens mədəniyyət sarayında Heydər Əliyev Fondunun təşkil etdiyi Azərbaycan mədəniyyət gecəsi keçirilmişdir

Heydər Əliyev Fondunun təşəbbüsü və təşkilatçılığı, Azərbaycanın Almaniyadakı səfirliyinin dəstəyi ilə Bavariya federal torpağının paytaxtı Münxenin məşhur "Rezidens" mədəniyyət sarayında Azərbaycan mədəniyyət gecəsi keçirilmişdir.

Bavariya federal torpağının dövlət naziri xanım Emilia Müller, Almaniya Bundestaqı, Bavariya Landtaqı və Avropa Parlamentinin deputatları, Almaniyanın bir çox siyasi, ictimai və mədəniyyət xadimlərinin qatıldığı tədbirdə Azərbaycan Dövlət kamera orkestrinin ifa etdiyi milli və beynəlxalq klassik musiqi nümunələri dinlənilmiş, "Azərbaycan" adlı fotosərgiyə baxış olmuşdur.

Mədəniyyət gecəsinin iştirakçılarını salamlayan Azərbaycanın Almaniyadakı səfiri Pərviz Şahbazov ölkələrimiz arasında münasibətlərin siyasi, iqtisadi, elm və mədəniyyət sahələrində inkişafından danışmışdır. Səfir Azərbaycanın birinci xanımı, Heydər Əliyev Fondunun prezidenti Mehriban Əliyevanın mədəniyyət gecəsinin iştirakçılarına təbrik məktubunu oxumuşdur.

Daha sonra dövlət naziri Emilia Müller çıxış etmişdir. Xanım Müller musiqinin və mədəniyyətin xalqlar arasında mühüm dialoq vasitəsi olduğunu və Münxendə Azərbaycan mədəniyyətinin təqdim edilməsindən məmnunluğunu bildirmişdir. Nazir qeyd etmişdir ki, üç il əvvəl Azərbaycanda rəsmi səfərdə olarkən onda Azərbaycanın mədəni müxtəlifliyinə böyük maraq, Azərbaycan musiqisinə və incəsənətinə rəğbət oyanmışdır. Musiqi Azərbaycan cəmiyyətində mühüm əhəmiyyətə malikdir. Bütövlükdə ölkə füsunkar təbiəti, qədim şəhərləri və gözəl insanları ilə öz qonaqlarını heyran edir.

Daha sonra Emilia Müller Azərbaycan ilə Almaniya və xüsusilə də Bavariya federal torpağı arasında mövcud olan və inkişaf edən əlaqələrdən danışmışdır. Nazir demişdir ki, bu əlaqələr enerji təminatından tutmuş maşınqayırma, kənd təsərrüfatı, tikinti sənayesinə qədər müxtəlif iqtisadi sahələrlə yanaşı, tələbə mübadiləsi, elm, mədəniyyət və incəsənət sahələrində əməkdaşlığı da əhatə edir. Xanım Müller Azərbaycanı Bavariyanın mühüm tərəfdaşı adlandırmış, Azərbaycan mədəniyyətinin Almaniyada uğurla təbliğ olunmasına görə Heydər Əliyev fondunun prezidenti Mehriban Əliyevaya minnətdar olduğunu və bu işdə fondun və Azərbaycanın Almaniyadakı səfirliyinin fəaliyyətini yüksək qiymətləndirdiyini vurğulamışdır.

Çıxışlardan sonra tədbirin moderatoru Almaniyanın məşhur teleaparıcısı Co Fexner iştirakçıları Azərbaycan ilə Almaniyanı bağlayan tarixi və müasir əlaqələr, xüsusilə də iki xalq arasında tarixən mövcud olan mədəni bağlar haqqında məlumatlandırmışdır. Aparıcı həmçinin müsəlman Şərqində ilk operanın, qadınlara seçki hüququ verən ilk demokratik dövlətin Azərbaycanda yaradıldığını diqqətə çatdırmışdır.

Heydər Əliyev Fondunun və onun prezidenti xanım Mehriban Əliyevanın həm ölkə daxilində, həm də bütün dünyada mədəni irsin qorunması və inkişaf etdirilməsi, xalqlar arasında humanitar dialoqun dərinləşməsi sahəsində gördüyü işlərdən danışılmışdır. Qeyd edilmişdir ki, fond "Mədəniyyət sərhəd tanımır" prinsipi ilə fəaliyyət göstərərək Azərbaycanda məscidləri, mədəniyyət obyektlərini bərpa etdirməklə yanaşı, Parisdə və Strasburqda kilsələrin, Romada katakombaların restavrasiyasına töhfələr vermişdir. Heydər Əliyev Fondu, eyni zamanda, özünün layihələri ilə Azərbaycan-Almaniya mədəni münasibətlərinin inkişafına da xidmət edir. Berlin Qəsrinin bərpasına kömək edən və Berlində "Bakıya uçuş. Müasir Azərbaycan incəsənəti" adlı sərgi keçirən fond bu gün Münxen şəhərinin "Rezidens" sarayında təşkil etdiyi möhtəşəm mədəniyyət gecəsi ilə bu təqdirəlayiq fəaliyyətini davam etdirir.

Mədəniyyət gecəsi Azərbaycan Dövlət kamera orkestrinin canlı ifası ilə davam etdirilmişdir. Dirijor Fuad İbrahimovun idarə etdiyi orkestrin Üzeyir Hacıbəyli, Niyazi, Qara Qarayev, Fikrət Əmirov və digər tanınmış Azərbaycan bəstəkarlarının, habelə xarici bəstəkarların repertuarından və Azərbaycan xalq mahnılarından ibarət çıxışını tamaşaçılar ayaq üstündə alqışlarla qarşılamışlar. Konsertdən sonra müsahibə verən qonaqlar həm səsləndirilən musiqi, həm də ifaya valeh olduqlarını bildirmiş və mədəniyyət gecəsindən məmnunluqlarını ifadə etmişlər.

Mədəniyyət gecəsinin iştirakçıları Heydər Əliyev Fondu tərəfindən Azərbaycan mədəniyyətinin müxtəlif sahələri haqqında alman dilində nəşr edilmiş kitablar və Azərbaycan musiqisindən ibarət kompakt disklər əldə etmiş və Azərbaycan şirniyyatlarına qonaq olmuşlar.

Tədbirdən sonra Heydər Əliyev Fondu və Azərbaycanın Almaniyadakı səfirliyi tərəfindən Avropa Parlamentinin, Almaniya və Bavariyanın dövlət və hökumət nümayəndələri, eləcə də bir sıra incəsənət xadimlərinin iştirakı ilə ziyafət verilmişdir.

 

Vüqar SEYİDOV,

AzərTAc-ın xüsusi müxbiri

Münxen

 

Azərbaycan.-2013.- 21 may.- S.5.