Gürcüstan Azərbaycan ilə strateji tərəfdaşlığa xüsusi önəm verir

Azərbaycanın daxili işlər naziri, general-polkovnik Ramil Usubovun dəvəti ilə Gürcüstanın daxili işlər naziri İrakli Ğaribaşvili ölkəmizə rəsmi səfərə gəlmişdir.

Daxili İşlər Nazirliyinin mətbuat xidmətindən AzərTAc-a bildirmişlər ki, Gürcüstanın daxili işlər naziri İrakli Ğaribaşvili və onu müşayiət edən şəxslər mayın 21-də Fəxri xiyabana gələrək müasir müstəqil Azərbaycan dövlətinin memarı və qurucusu, ulu öndər Heydər Əliyevin xatirəsini ehtiramla anmış, məzarı önünə əklil qoymuşlar.

Görkəmli oftalmoloq alim, akademik Zərifə xanım Əliyevanın da xatirəsi anılmış, məzarı üzərinə güllər düzülmüşdür.

Sonra Şəhidlər xiyabanına gələn qonaqlar Azərbaycanın azadlığı və suverenliyi uğrunda mübarizədə canlarından keçmiş qəhrəman Vətən övladlarının xatirəsini ehtiramla yad etmiş, "Əbədi məşəl" abidəsinin önünə əklil qoymuşlar.

Daha sonra respublikanın daxili işlər naziri, general-polkovnik Ramil Usubov Gürcüstanın daxili işlər naziri İrakli Ğaribaşvilinin başçılıq etdiyi nümayəndə heyəti ilə görüşmüşdür.

Səfərin iki ölkənin daxili işlər orqanları arasında əməkdaşlığın daha da genişlənməsinə və dərinləşməsinə təkan verəcəyinə inandığını bildirən Ramil Usubov müstəqilliyimizin ilk illərində ölkəmizdə hökm sürən gərgin ictimai-siyasi və kriminogen durumu xatırlatmış, Ermənistanın hərbi təcavüzü nəticəsində torpaqlarımızın işğalını, doğma yurd-yuvalarından didərgin düşən soydaşlarımızın acınacaqlı taleyini, kriminogen durumun dözülməz həddə çatdığını yada salmışdır. O demişdir ki, yalnız ulu öndər Heydər Əliyevin xalqın təkidli tələbi ilə ali hakimiyyətə tarixi qayıdışından sonra ümummilli liderin rəhbərliyi altında cəmiyyət həyatının bütün sahələrində həyata keçirilən islahatlar, hüquq- mühafizə, o cümlədən daxili işlər orqanlarının cinayətkarlıqla mübarizə, ictimai qayda və ictimai təhlükəsizliyin təmini sahəsində gördüyü qətiyyətli tədbirlər nəticəsində Azərbaycanda sabitlik, əmin-amanlıq bərpa edilmiş, kriminogen durum nəzarətə götürülmüşdür.

Nazir insan və vətəndaş hüquq və azadlıqlarının təmin edilməsini özünün prioritet istiqamətlərindən biri elan etmiş respublikamızda ictimai münasibətlərini, o cümlədən daxili işlər orqanlarının fəaliyyətini tənzimləyən, demokratik prinsiplərə söykənən yeni qanunların qəbul edildiyini, bu sahədə bir sıra inkişaf etmiş dövlətlərin, beynəlxalq təşkilatların mütəxəssislərinin böyük rolu olduğunu, onların icrasının mühüm əhəmiyyət kəsb etdiyini diqqətə çatdırılmışdır.

Xalqlarımızın arasında dostluğun qədim tarixə malik olduğunu, bu münasibətlərin hər iki ölkə rəhbərliyinin siyasi iradəsinə, müəyyənləşdirdiyi strategiyaya uyğun uğurla inkişaf etdiyini vurğulayan Ramil Usubov Daxili İşlər nazirlikləri arasında əməkdaşlığın, xüsusilə də transmilli cinayətkarlıqla mübarizə sahəsində qarşılıqlı əlaqələrin, təcrübə və informasiya mübadiləsinin ilk növbədə dost xalqlarımızın mənafelərinə, bölgədə təhlükəsizliyin təmini işinə xidmət etdiyini bildirmişdir.

Qeyd olunmuşdur ki, ötən illər ərzində nazirliklər arasında imzalanmış sənədlər, xüsusilə 2002-ci ilin aprelində Azərbaycan, Gürcüstan və Türkiyə arasında terrorçuluq, mütəşəkkil cinayətkarlıq və ağır cinayətlərin digər növlərinə qarşı mübarizə sahəsində əməkdaşlığa dair imzalanmış müqavilə həm ikitərəfli, həm də beynəlxalq təşkilatlar səviyyəsində əlaqələrin inkişafına təkan vermişdir.

Daxili işlər naziri mövcud problemlərdən də danışmış, transmilli mütəşəkkil cinayətkarlığın əsas növlərindən olan narkotiklərin qanunsuz dövriyyəsi, beynəlxalq terrorçuluq, insan alveri və qanunsuz miqrasiya ilə mübarizənin diqqət mərkəzində dayandığını, onlara qarşı yalnız birgə səylərlə səmərəli mübarizə aparılmasının mümkünlüyünü vurğulamışdır.

Ətraflı məlumata və göstərilən qonaqpərvərliyə görə təşəkkür edən İrakli Ğaribaşvili ölkəsinin Azərbaycanla strateji tərəfdaşlığa xüsusi önəm verdiyini diqqətə çatdırmışdır. Qonaq Gürcüstanda həyata keçirilən hüquqi islahatlardan söz açmış, təhlükəsizliyin yüksək səviyyədə təmin olunduğu bir dövlət, mehriban qonşu və yaxın dost olan Azərbaycan ilə bütün sahələrdə, o cümlədən daxili işlər orqanları arasında əlaqələrin bundan sonra daha da inkişaf edəcəyinə əminliyini bildirmişdir.

Azərbaycan.-2013.- 22 may.- S.3.