Yeni Azərbaycan Partiyası Şəki təşkilatının növbəti konfransı keçirilmişdir

Yeni Azərbaycan Partiyası Şəki təşkilatının VII konfransı keçirilmişdir. Konfransda şəhər rəhbərliyi, YAP Siyasi Şurasının və Mərkəzi Aparatının məsul nümayəndələri, qurumun ərazi təşkilatlarından seçilmiş 278 partiya üzvü iştirak etmişdir.

AzərTAc xəbər verir ki, konfrans iştirakçıları əvvəlcə partiyanın yaradıcısı, ümummilli lider Heydər Əliyevin abidəsi önünə gül-çiçək düzmüş, xatirəsini ehtiramla yad etmişlər.

Təşkilatın sədri Həsən Həsənovun hesabat məruzəsində qurumun əvvəlki konfransdan keçən dövr ərzindəki fəaliyyəti təhlil edilmiş, qarşıda duran vəzifələrdən bəhs olunmuşdur. Bildirilmişdir ki, 102 ərazi ilk partiya təşkilatını özündə birləşdirən YAP Şəki təşkilatının üzvlərinin sayı ötən dövr ərzində daha 980 nəfər artaraq 10 min nəfəri ötmüşdür. Qarşıdan çox məsul siyasi kampaniya - növbəti prezident seçkilərinin gəldiyini vurğulayan H.Həsənov təşkilat üzvlərinin ölkəmiz üçün mühüm əhəmiyyət daşıyan bu seçkilərə çox ciddi hazırlaşdıqlarını diqqətə çatdırmışdır. Qeyd edilmişdir ki, xalqımız əvvəlki seçkilərdə olduğu kimi, bu dəfə də Yeni Azərbaycan Partiyasının vahid namizədini dəstəkləməklə tərəqqiyə, sülh və əmin-amanlığa səs vermiş olacaqlar.

Konfransda YAP Siyasi Şurasının üzvü, AMEA Tarix İnstitutunun direktoru, Milli Məclisin deputatı Yaqub Mahmudov və başqaları çıxış edərək təşkilatın üzvlərinə qarşıdakı prezident seçkilərində uğurlar arzulamış, təklif və tövsiyələrini bildirmişlər.

Konfransın sonunda Yeni Azərbaycan Partiyasının V qurultayına nümayəndələr seçilmişdir.

Azərbaycan.-2013.- 23 may.- S.4.