Dövlətçilik və milli məfkurə
Dövlətçilik
ideologiyası
Qədim
dövrlərdə dövlət
başçılarının üstünlüyü daha
çox döyüş meydanlarında müəyyən
olunurdu, əməli fəaliyyət və xüsusən sərkərdəlik
məharəti ön plana keçirdi. Dövr dəyişdikcə
rəhbər üçün meyarların prioriteti də dəyişir.
Bütün meyarlar üzrə öncül mövqe tutan
dövlət rəhbərləri tarixdə çox nadir
hallarda rast gəldiyindən müxtəlif dövrlərdə
bu və ya digər meyara üstünlük verilmişdir.
Həm
böyük sərkərdə, fateh, həm böyük natiq,
filosof, ideoloji lider və həm
də qurucu, yaradıcı olan dövlət adamı
böyük sosial və mədəni-mənəvi iz qoyur,
tarixin yaddaşına həmişəlik həkk olunur.
İlk baxışda belə görünə bilər ki, ölkələr fəth etmiş, müharibə dalğalarında yüksəlmiş şəxsiyyətlər, hətta fəaliyyəti quruculuqdan daha çox, dağıdıcılıqla bağlı olan fatehlər tarixdə daha çox yad edilir (tarixin gedişinə müsbət və ya mənfi təsir göstərməsindən asılı olmadan), müharibələrsiz, böyük sosial-iqtisadi islahatlar yolu ilə uğur qazanan və cəmiyyətin mütərəqqi inkişafına - tərəqqisinə daha çox təkan vermiş adamlar isə bəzən kölgədə qalır. Lakin təsvirçi tarix deyil, ictimai tərəqqinin dərin qatlarını araşdıra bilən təhlilçi tarix başqa qənaətə gəlir. Məlum olur ki, cəmiyyətin müasir inkişaf səviyyəsinə gəlib çatmasında məhz mütərəqqi ideyaların, ictimai islahatların, sosial-iqtisadi quruculuq işlərinin böyük əhəmiyyəti olmuşdur. Hətta hərbi nailiyyətlər də çox vaxt, sadəcə, sərkərdənin məharətinin nəticəsi olmayıb, güclü dövlət yaradılması, sosial-iqtisadi təminat, mənəvi mütəşəkkillik əldə edilməsi sayəsində mümkün olmuşdur. Neçə əsrlər keçdikdən sonra Teymurləngdən ən çox qalan, ən çox kütləviləşən xatirələr onun əzazilliyi haqqında əfsanələr, bir də Səmərqənd olub və bir də öz müəlliminin qəbri ayağında dəfn olunması; sənətə, elmə, müəllimə verdiyi qiymət qalıbdır xatirələrdə. Onun simasının da müsbət cizgilərinin saxlanmasında məhz bu sonuncular böyük rol oynayıblar.
I
Pyotrun tarixdə böyük şəxsiyyət kimi
qalmasının da səbəbləri apardığı
müharibələr yox, keçirdiyi böyük ictimai
islahatlar olub. Əksinə, o vaxtdan sonra Rusiyanın hərbi
uğurlarını da şərtləndirən məhz bu
islahatlar sayəsində dövlətçiliyin və onun
maddi-texniki təməlinin möhkəmləndirilməsi olub.
Atatürkün
ilk nəzərə çarpan böyük xidməti, əlbəttə,
I dünya müharibəsində Osmanlı imperiyasının
hərbi məğlubiyyətinə və süqutuna baxmayaraq,
militarist qüvvələrə qarşı yeni bir hərb
başlaması, istilaçı qoşunları heç
olmazsa bilavasitə türklər yaşayan ərazilərdən
çıxarması və bu ərazidə yeni bir dövlət
yaradılması üçün şans qazanması
olmuşdur.
Lakin necə bir
dövlət yaradılması?
Bu
şansdan kim necə istifadə etdi? Bəli, Atatürkün böyüklüyü daha
çox dərəcədə özündə bu
şansı reallaşdırmaq əzmini tapması idi. Hərblə başladığı işi quruculuqla
başa çatdıra bilməsi idi.
Keçmişə nəzər salsaq görərik ki,
tarix heç də yalnız baş vermiş, həyata
keçmiş hadisələr deyil, həm də
açılan imkanlar, milli-ictimai şanslar tarixidir.
Lakin
tarixdə nə qədər imkanlar gerçəkləşməyib, nə
qədər şanslardan istifadə olunmayıb? İlk
növbədə tarixi şəxsiyyətin olmaması
üzündən...
Şəxsiyyətin tarixdə rolu barədə çox
mübahisələr gedir. Sovet dövründə
hakim olan ideologiya belə hesab edirdi ki, tarixdə həlledici
rolu xalq kütlələri oynayır; cəmiyyətin obyektiv
inkişaf qanunauyğunluqları və meyilləri vardır və
bu inkişafın subyekti xalq olduğuna görə, ona kimin rəhbərlik
etməsi önəmli deyil. Cəmiyyətin
inkişaf mərhələləri və son mənzili irəlicədən
məlumdur və heç kəs tarixin magistralından kənara
çıxa bilməz. Belə yanaşma
qüsurlu idi və tarixin öyrədilməsi zamanı, şəxsiyyətlərin
rolu əsasən mənfi planda şərh olunurdu. İndi ideologiya dəyişmişdir və tarixə
münasibətdə də belə qüsurlar aradan
qaldırılmalıdır.
Dövlətçilik ideologiyası insanların bir vətəndaş
kimi formalaşdırılmasını, vətənə sevgi
hissini, dövlət mənafeyini üstün tutmaq, şəxsi
mənafeyi dövlət mənafeyi prizmasından keçirmək
vəzifələrini əhatə edir. Heydər Əliyevə
görə, dövlətçilik ənənələri
dövlətçilik ideologiyası, dövlətçilik
psixologiyası və dövlətçilik praktikasının
vəhdətindən yaranır: "Dövlətçilik hər
bir şəxsin qəlbində olmalıdır".
Dövlətçilik ideologiyası hüquqi və
siyasi şüurun yüksəldilməsini, insanın şəxsi
həyatının, şəxsi maraqlarının cəmiyyətdə
gedən proseslərlə əlaqələndirilməsini,
dövlət idarəçiliyindən hər bir şəxsin
bilavasitə və ya bilvasitə iştirakının təmin
olunmasını nəzərdə tutur.
Dövlətçilik ideologiyası habelə iqtisadi təfəkkürün
və iqtisadi mədəniyyətin inkişaf etdirilməsini,
dövlət tərəfindən qanunvericilik aktları ilə
aparılan iqtisadi islahat proseslərinin məqsədyönlü
surətdə insanların şəxsi mənafeyi, rifahı və
həyat tərzi ilə əlaqələndirilməsini,
uyğunlaşdırılmasını əhatə edir.
Formal vətəndaşlıq və
milli özünüdərk
Yuxarıda artıq qeyd etdiyimiz kimi, dövlətçilik
ənənəsi insanlara milli özünütəsdiq
imkanı verir və milli dövlətə münasibətin
tarixən qərarlaşmış və əsasən
şüurlarda yaşayan, milli şüurun başlıca tərkib
hissəsinə çevrilən mənəvi-tarixi bir hadisədir. O, öz maddi təcəssümünü
ayrı-ayrı konkret dövlət nümunələrində,
dövlət idarəçiliyi formalarında tapmaqla
yanaşı, həm də ümumiləşmiş rəmzi təzahürlərə
ehtiyac hiss edir. Tək özü
üçün yaşamayıb xalqa, millətə
bağlı olmaq, onun ağrı-acısını
bölüşmək və nailiyyətlərinə sevinmək,
ümummilli inkişaf naminə fəaliyyət göstərmək
və öz şəxsi səadətini ümummilli səadət
kontekstinə salmaq, millətlə və milli dövlətlə
qaynayıb-qarışmaq təbəədən, sakindən vətəndaşa
çevrilməyin mühüm şərtləridir. Hüquqi müstəvidə, formal olaraq vətəndaşlıq
pasport almaqla rəsmiləşir, lakin məzmun müstəvisində
vətəndaşlıq şüurda gedən proseslərin,
milli dövlətçilik duyğularının təkamülünün,
mədəni-mənəvi yetkinliyin nəticəsi kimi ortaya
çıxır. Məzmunca vətəndaş
kimi formalaşmamış insanların formal vətəndaşlığı
dövlətçiliyin möhkəmləndirilməsinə
xidmət etmir. Ona görə də milli mənsubiyyəti
formal-hüquqi vətəndaşlıqla əvəz etmək
cəhdi sadəlövhlük olardı. Bu,
bir milli dövlət kimi çoxdan formalaşmış Avropa
ölkələrində özünü daha aydın büruzə
verir. Almaniyanın millətlə vətəndaşlığı
eyniləşdirmək cəhdləri çoxlu problemlər və
münaqişələr yaratdığına görə,
başqa Avropa ölkələri belə yol seçməkdən
uzaq durmağa çalışırlar.
Bu gün Azərbaycanda müstəqil dövlət
quruculuğunun uğurla davam etdirildiyi bir şəraitdə
qarşıda həm də tarixin bərpa olunması, onun
bütövlüyünün təmin olunması kimi məsul
bir vəzifə də durur. Təsadüfi deyil ki, Heydər Əliyev
müstəqil Azərbaycan dövlətinin möhkəmləndirilməsi,
müstəqilliyin dönməzliyinin təmin olunması,
dövlətçilik tariximizin müasir mərhələsinin
kəsilməzliyinin təmin edilməsi kimi şərəfli
bir vəzifəni yerinə yetirməklə məhdudlaşmayıb,
həm də tarixi şüurumuzun bərpa olunması,
dövlətçilik ənənələrinin qədim
köklərinin üzə çıxarılması və
müasir tariximizə qatılması sahəsində də məqsədyönlü
iş aparırdı. Onun tərəfindən dəfələrlə
nümayiş etdirilən tariximizə xüsusi diqqət və
həssas münasibət, sadəcə olaraq, tarixin bir milli-mənəvi
sərvət kimi qorunması ilə məhdudlaşmırdı.
Bu xüsusi diqqət daha çox dərəcədə
bugünkü milli dövlət quruculuğu işində, vətəndaşlıq
duyğusunun, millətə, dövlətə, vətənə
sevgi hissinin gücləndirilməsində tarixə söykənmək
və gələcəyə gedən yolu daha möhkəm,
daha dərin əsaslar üzərində salmaq istəyinin təzahürü
idi.
Dövlət və onun müxtəlif formaları
haqqında çox nəzəriyyələr vardır. Dövlətçilik
ideyası isə öz nəzəri-konseptual şərhini hələ
layiqincə tapmamışdır. Akademik
Ramiz Mehdiyevin məqalələri bu sahədə aparılan tədqiqatlar
üçün metodoloji təməl rolunu oynamağa yönəlmişdir.
Klassik Qərb ölkələrində olduğu kimi,
heç şübhəsiz, bir sıra qədim Şərq
ölkələrində də dövlətçilik ənənələri
yaşamaqda davam edir. Hətta ilk baxışda belə
görünə bilər ki, Şərqdə bu ənənələr
daha qədim və daha möhkəm olmalıdır. Çünki ilk dövlətlər Şərqdə
yaranmışdır. Lakin tarixdə
qalmış dövlətlər başqa şeydir, yaşayan
dövlətin tarixi bir başqa şey. Dövlətçilik
ənənələrinin yaşaması əsasən kəsilməz
tarixlə, indi də yaşamaqda olan dövlətlərin təcrübəsi
ilə bağlıdır.
Azərbaycanda dövlət olanda Fransada, Almaniyada hələ
stabil dövlət yox idi. Belə ki, Səfəvilər
dövlətindən də xeyli əvvəl,
xalqımızın kifayət qədər güclü
dövlətçilik ənənəsi olmuşdur. Yoxsa boş yerdə belə möhtəşəm
bir dövlət qurula bilməzdi.
Lakin çağdaş Avropada dövlətçilik ənənələrinin
güclü olmasının səbəbi əsasən Yeni
Dövr adlanan 500 illik bütöv bir epoxada kəsilməz
tarixin olmasıdır. Azərbaycan tarixində isə
böyük fasilələr ənənələrin qismən
itməsinə və ya zəifləməsinə gətirmişdir.
Məhz buna görədir ki, ulu öndər Heydər
Əliyev müasir dövlət quruculuğunda bugünkü həyatımızla
və düşüncə tərzimizlə daha çox kəsilməz
əlaqələri olan yaxın keçmişin rolunu
xüsusilə vurğulayırdı. Yeni əsr və
üçüncü minillik münasibətilə Azərbaycan
xalqına müraciətində Heydər Əliyev bununla əlaqədar
belə deyir: "XX əsrdə bizim
qazandığımız uğurlar, o cümlədən
müstəqil dövlət qurmaq əzmimizin köklərini
uzaq və yaxın tariximizdə, xüsusilə XIX əsrdə
formalaşmış və təşəkkül
tapmış qaynaqlarda axtarıb tapmaq lazımdır". Son 10 ildə bu sahədə ciddi tədqiqatlar
aparılmış, müəyyən uğurlar əldə
edilmişdir. Xüsusən Azərbaycanda
ilk cümhuriyyətin qurulması ilə bağlı həm
dövlətin, həm də onu şərtləndirən ictimai-siyasi
fikir tarixinin öyrənilməsi sahəsində böyük
işlər görülmüşdür. Akademik
Ramiz Mehdiyev də bu istiqamətdəki tədqiqatların Azərbaycan
tarixinin dərinliklərinə doğru davam etdirilməsinin
vaxtı çatdığını vurğulayır. Çünki istər müasir Azərbaycan dövləti,
istərsə də ilk demokratik respublikanın yaranması
Rusiyadan ayrılma kontekstində baş verən proseslərdir.
Halbuki, Azərbaycanda dövlətçilik
tarixi Rusiyadan daha qədimdir və dövlətçilik
şüurunun tam müstəqil surətdə
formalaşması üçün bizim əvvəlki tarixi
dövrlərdə tam müstəqil dövlətlərimiz
olduğunu xatırlamaq, həm də, sadəcə,
xatırlamaq deyil, bu duyğunu yaşamaq və
çağdaş düşüncəyə transfer etmək
çox vacibdir.
Əlbəttə, Azərbaycanda dövlətçiliyin
inkişafı ən çox onun ərazisində milli dövlət
qurumlarının və milli siyasi liderlərin fəaliyyət
göstərdiyi dövrlərlə bağlıdır. Və belə dövrlər
Azərbaycan tarixində az
olmamışdır: "Cavanşir və Babək kimi sərkərdələrin
qəhrəmanlıqları böyük vətənpərvərlik
məktəbinə çevrilmiş, vətənin
bütövlüyü xalqın birliyinin təcəssümü
olmuşdur. Məhəmməd Cahan Pəhləvanın,
Qızıl Arslanın, Uzun Həsənin, Şah
İsmayıl Xətainin və başqa dövlət xadimlərimizin
həyat və fəaliyyəti xalqın vətən sevgisi və
dövlətçilik hissini daha da inkişaf etdirmiş, onu həyatın
ən vacib, ən ümdə məqsədinə
çevirmişdir" (Heydər Əliyev).
Məlum olduğu kimi, azərbaycanlıların tarixi vətəni
ancaq Azərbaycan Respublikası ilə məhdudlaşmır. Və biz Azərbaycan
tarixindən danışarkən, təbii ki, ancaq Azərbaycan
Respublikasının tarixini deyil, azərbaycanlıların
öz yaşadıqları bütün ərazilərdə
qurub-yaratdıqları sivilizasiyanı və dövlət
quruculuğunu nəzərdə tuturuq.
İranda da böyük dövlətçilik ənənələri,
dövlətçilik təfəkkürü vardır. Və bu ənənə,
bu təfəkkür etnik-milli hissdən, milli
özünüdərkdən yüksəkdə durur. Lakin İranda bu vəziyyət təkcə dövlətçilik
təfəkkürünün inkişafı sayəsində
deyil, daha çox milli hissin və etnik-milli özünüdərkin
inkişafdan qalması, aşağı səviyyədə
olması ilə bağlıdır.
Bizdə isə əksinə olmuşdur. Rusiyanın tərkibində
olarkən etnik-milli hiss hər halda xeyli dərəcədə
qorunub saxlansa da, dövlətçilik duyğusu və təfəkkürü
tədricən zəifləmişdir. XX əsrin
əvvəllərində burjua ictimai-siyasi münasibətlərinin
yaranması ilə əlaqədar milli özünüdərk
istiqamətində böyük addımlar atılsa da, milli
dövlətimizin fəaliyyət dövrü çox qısa
olduğundan, dövlətçilik şüuru
formalaşmağa macal tapmamışdır. Əsrin axırında yenidən müstəqillik əldə
etdikdən sonra ilkin olaraq yenə də etnik-milli şüurun
inkişafı müşahidə olunur. (Əslində,
bu inkişaf ən çox əsrin əvvəllərinə, Ə.Hüseynzadə,
M.Rəsulzadə və başqalarının
dünyagörüşünə və milli
baxışlarına qayıdış kimi özünü
göstərir.) Dövlətçilik ənənələri
isə 200 illik fasilə ərzində xeyli dərəcədə
zəiflədiyindən, siyasi özünüdərk və
dövlətçilik şüurunun bərpası daha çətin
və ləng həyata keçir. Əksinə,
müvazinət pozulduğundan vətəndaşlıq hissləri,
dövlətçilik duyğuları xeyli dərəcədə
zəif ikən etnik-milli hisslərin sürətli
inkişafı və hətta hansı isə qüvvələr
tərəfindən kortəbii və ya məqsədyönlü
surətdə qızışdırılması ölkədə
stabilliyin pozulması üçün istifadə oluna bilər.
Tarix və humanitar təfəkkür
Tarix də, ədəbiyyat da, fəlsəfi fikir də
milli-mənəvi varlığın formalaşmasında
mühüm rol oynayır. Tarix bir elm kimi
başqa dildə də yazıla bilər. Lakin
müəyyən bir xalqın varlığını ifadə
edən tarixi prosesin özü, ilk növbədə, milli dillə
bağlıdır. Başqa sözlə
desək, Azərbaycan dili bizim milli
varlığımızın atributlarından biri olmaqla
yanaşı, eyni zamanda, milli tarixi prosesdə də
aparıcı amillərdən biridir.
Xalqımız üçün bütün bu amillər
"azərbaycançılıq" məfkurəsinin tərkib
hissələridir. Heydər Əliyev ona görə "azərbaycançılıq"
ideyasına xüsusi əhəmiyyət verirdi ki, Azərbaycanın
dövlət müstəqilliyinin dönməzliyinin təmin
edilməsində uğurlu daxili və xarici siyasətlə
yanaşı, milli-ictimai şüurun, tarixi yaddaşın da
böyük rolu vardır. Ramiz Mehdiyev də
öz məqalələrində "azərbaycançılıq"
şüurunun daha qədim köklərə malik olduğunu
göstərməyə çalışmışdır.
"Mən fəxr edirəm ki, mən azərbaycanlıyam,"
- deyən Heydər Əliyevlə orta əsrlərdə
yaşayan və öz qurduğu dövlətin yaxın ətrafdakı
digər dövlətlərdən fərqini konseptual şəkildə
ifadə edə bilməsə də, duyan və bu
duyğularını şeirlərində və əməllərində
ifadə edən başqa bir böyük azərbaycanlının
müqayisəsi azərbaycançılıq haqqında
düşüncələrin tarixini bir neçə əsr əvvələ
aparır. Əslində, milli təkamülün yalnız
dövlətçilik müstəvisində deyil, həm də
özünüdərk müstəvisində keçdiyi
neçə minillik yolun izlənməsi zərurəti
tarixçilərlə filosofların birgə fəaliyyətini,
əməkdaşlığını tələb edir. Söhbət məhz Şah İsmayıldan və
Heydər Əliyevdən getmir. Onlar, sadəcə,
tarixin uzaqdan görünən sütunlarıdır. Ölçü şkalasını bir qədər
dəyişməklə bu sütunların sayını
artırmaq, buraya Şah İsmayıldan əvvəl və
sonra digər tarixi şəxsiyyətlərimizi də əlavə
etmək olar. Akademik Ramiz Mehdiyevin əsərində
məqsəd ancaq bu iki tarixi şəxsiyyəti müqayisə
etmək deyil. Söhbət tarixin metodoloji
oriyentasiyasından gedir. Tarixi, sadəcə,
hadisələrin salnaməsi kimi yox, həm də milli
özünüdərk tarixi kimi təqdim etmək zərurəti
təsbit olunur. Tarixə ancaq məlumat mənbəyi
kimi yox, həm də milli qürur mənbəyi kimi; ancaq idrak
üsulu kimi deyil, həm də tərbiyə üsulu kimi
baxmaq imkanı dəyərləndirilir. Bu
isə tarix adlandırdığımız böyük məbədin
bütövlüyü naminə onun sütunları ilə
yanaşı, arakəsmələri və
naxışlarını da zehniyyətə həkk etdirmək
zərurətini ifadə edir.
Söhbət həm də sıravi azərbaycanlının
zehniyyətindəki təkamüldən gedir; yəni
hökmdarlar, dövlət başçıları ilə
yanaşı, zehniyyəti təmsil edən söz və sənət
adamlarının keçdiyi mədəni-mənəvi
inkişaf yolundan gedir. Biz dövlət və siyasət tarixi ilə
yanaşı, mədəniyyətin və ədəbiyyatın
da tarixinin həmin bu metodoloji xətt üzərində, bir
bütövün hissələri kimi yenidən nəzərdən
keçirilməsini zəruri sayırıq. Buna görə
də sənətin
zehniyyətə təsir imkanlarını və milli
özünüdərkin formalaşmasında onun rolunu da
tarixin ümumi konsepsiyasına uyğun surətdə
araşdırmaq imkanları barədə düşünməliyik.
Ədəbiyyatın tarixi rakursu yalnız
yazıçının, sənətkarın öz şəxsiyyəti
ilə məhdudlaşmır. Yəni "Nizami
kimdir?" sualı ətrafında geniş müzakirələrin
önəmini azaltmadan Nizaminin obrazlarının da kimliyini və
önəmini vurğulamaq istərdik. Xüsusilə
tədris proqramlarına daxil edilən bütün bədii əsərlərə
milli özünüdərk meyarı ilə yenidən baxılmalı
və onlara ədəbi tənqidi şərhlə
yanaşı, tarixi-fəlsəfi şərh də verilməlidir.
Ona görə də biz bu sırada Tomrisi, Əfrasiyabı,
Siyavuşu, Məhinbanunu, Nüşabəni, Bəhram Guru, Fərhadı,
Şirini də görürük.
Məsələn,
tarixdən bəlli olan Qızıl Arslanla M.S.Ordubadinin
"Qılınc və qələm"ində təqdim
olunan Qızıl Arslan eyni olmaya bilər, lakin zehniyyət təkamülündə
onların hər birinin öz yeri var. Şah
İsmayılın da şifahi xalq ədəbiyyatında,
dastanlarda, film və operalarda təqdimatının hər biri
ayrıca bir mədəni-tarixi gerçəklikdir. Yaxud Nadir şahın, Ağa Məhəmməd
şah Qacarın ədəbiyyatda yaradılmış müxtəlif
obrazları - hər biri zehniyyətə müəyyən dərəcədə
təsir göstərir. Tarixdən və ədəbiyyatdan
gələn obrazları məhz zehniyyət kontekstində və
milli özünüdərkə aparan yolun dolanbaclarında nəzərdən
keçirmək, onları gəncliyə milli ideologiyamıza
uyğun yeni tarixi konsepsiyanın işığında təqdim
etmək zərurəti də ortaya çıxır.
Biz
Haqverdiyevin, Nərimanovun, Ordubadinin, Səməd Vurğunun və
s. tarixi mövzuya toxunmaqla yazdıqları bədii əsərlərə
elmi tarix meyarından tələblər qoya bilmərik. Əksinə, əgər müasir tarixi biliklər səviyyəsindən
baxdıqda müəyyən fərqlər ortaya
çıxırsa, bu faktların özü dərslik müəllifinə,
müəllimə imkan verir ki, tarixlə ədəbiyyatın
müqayisəsini aparsın və konkret nümunə əsasında
bu iki düşüncə tərzinin, yanaşma üsulunun
spesifikasını izah etsin. Həm də
bu zaman yazıçının öz əsərini hansı
dövrdə yazdığının nəzərə
alınması həmin dövrün öz düşüncə
tərzi, ideoloji prioritetləri və meyarları haqqında da
əlavə məlumat vermək imkanı açır. Habelə fənlərarası əlaqə imkanı
ortaya çıxır. Müəllim
şagirdə bir tarix deyil, iki tarix, iki fərqli zaman və hər
zamanın öz meyarlar sistemi olması barədə məlumat
verməli, müqayisələr, paralellər
aparmalıdır. Əgər birinci tarix bədii
əsərdə təsvir olunan dövrü əks etdirirsə,
ikinci tarix həmin əsərin yazıldığı
dövrün səciyyəsini əhatə edir. Təəssüf ki, bəzən müasir tədqiqatçı
və pedaqoqlar öz üzərinə düşən bu
missiyasını yerinə yetirmək əvəzinə,
böyük yazıçılarımıza "səhv tutur",
onları tarixi bilməməkdə və ya təhrif etməkdə
təqsirləndirirlər ki, bu da həm metodiki, həm də
metodoloji baxımdan qüsurlu və yolverilməzdir.
Ancaq
peşəkar tədqiqatçı, əgər o, eyni zamanda
müxtəlif fənlərin sərhəd bölgəsində
də çalışa bilirsə, tariximizi və ədəbiyyatımızı
gənc nəslə məhz milli fəlsəfi fikir məcrasında
çatdırmaq iqtidarında ola bilər.
Həm tarixi, həm də ədəbiyyatı tədris
edən müəllimlər üçün "Dədə
Qorqud" ən etibarlı mənbədir. Təsadüfi
deyil ki, Heydər Əliyev dövlətçiliyimizin tarixində
"Kitabi Dədə Qorqud"un rolunu,
dilin və mədəniyyətin rolunu neçə-neçə
müharibələrdə qələbə çalan,
adlı-sanlı sərkərdələrin rolundan heç də
az qiymətləndirmirdi. "Dövlət dilinin tətbiqi
işinin təkmilləşdirilməsi haqqında" fərmanında
Heydər Əliyev deyir: "Azərbaycan dilinin bugünkü
inkişaf səviyyəsi göstərir ki, Azərbaycan
xalqı dünyanın ən qədim xalqlarındandır... "Kitabi Dədə Qorqud"un meydana çıxa
bilməsi üçün Azərbaycan dili böyük tarixi-ədəbi
hazırlıq mərhələsi keçməli idi".
Yaxud başqa bir yerdə: "İki mininci ildə 1300 illik
yubileyini təntənə ilə qeyd etdiyimiz "Kitabi Dədə
Qorqud" kimi möhtəşəm bir abidəyə malik
olmaq da onu göstərir ki, bu torpaqda hələ bizim
eramıza qədərki dövrdə böyük bir mədəniyyət
mövcud olmuşdur". Dil və dövlətçiliyin,
mədəniyyət və dövlətçiliyin sıx əlaqələrə
malik olduğuna istinad edən Heydər Əliyev dövlətçiliyin
inkişaf etdirilməsində bu amilləri həmişə
ön plana çəkirdi.
Çox önəmli məsələlərdən biri
budur ki, tariximizi və tarixi coğrafiyanı tam dəqiq bilməyənlər
qədim dövrə aid ərazi adlarının müasir
anlayışlarla zahiri səsləşməsindən
sui-istifadə edən əcnəbi tarixçilərin felinə
uymuş, toruna düşmüşlər. Məsələn,
Azərbaycanda İslamdan öncəki tarix yaxşı
araşdırılmadığından və sovet
dövründə ictimai şüura düzgün
çatdırılmadığından, ədəbiyyatda və
publisistikada da alban abidələrinin erməniləşdirilməsinə
adekvat reaksiya verilməmişdir. Yaxud Nizaminin də
istifadə etdiyi "ərmən" anlayışı əcnəbi
"bələdçilərin" yüngül əli ilə
və sadəlövhlüklə "erməni" kimi qəbul
olunmuşdur. Əslində, "Ərməniyyə"
tarixən türklərə məxsus olmuş yer
adıdır. Eramızın III əsrində
manixeylik də bu ərazidə yayılmışdır və
manixey tarixçilərinin də göstərdiyi kimi, bunun
haylara (bizim adi şüur səviyyəsindəki anlamda - ermənilərə)
heç bir aidiyyəti yoxdur. Bütün
bunlar öz gerçək, elmi tədqiqatını gözləyir.
Yəni klassik bədii ədəbiyyat da tarix
üçün həm suallar qoyur, həm də
düşüncənin yönləndirilməsinə xidmət
edir. Sadəcə olaraq, ədəbiyyatçılar,
tarixçilər və filosoflar - hərə özü
üçün deyil, birlikdə, ümumi səylərlə
çalışmalıdırlar.
Akademik Ramiz Mehdiyevin müzakirə olunan məqalələri
məhz bütün bu sahələrin ortaq məxrəcə gətirilməsi
və milli maraqlar müstəvisində yenidən nəzərdən
keçirilməsi zərurətini qarşıya qoyur. Bu baxımdan
həmin məqalələr ictimai və humanitar fənlər
üçün həm əlaqələndirici, həm də
inteqrativ təməl rolunu oynayır.
Səlahəddin XƏLİLOV,
AMEA-nın müxbir üzvü,
Professor
Azərbaycan.-2013.- 23 may.- S.6.