Siyasi partiyaların nümayəndələri Avropa Şurası Parlament Assambleyasının prezidenti Jan-Klod Minyon ilə görüşmüşlər

Mayın 27-də Milli Məclisdə təmsil olunan siyasi partiyaların nümayəndələri Avropa Şurası Parlament Assambleyasının prezidenti Jan-Klod Minyon ilə görüşmüşlər.

Görüşdə Yeni Azərbaycan, Ədalət, Vətəndaş Həmrəyliyi, Demokratik İslahatlar, Ümid, Ana Vətən, Sosial Rifah, Böyük Quruluş partiyalarının təmsilçiləri iştirak etmişlər.

Görüşdə qeyd olunmuşdur ki, Azərbaycan 20-ci əsrdə ikinci dəfə öz müstəqilliyinə qovuşduqdan sonra ona qarşı bir çox təzyiqlər olmuşdur. Ermənistanın təcavüzü nəticəsində Azərbaycanın Dağlıq Qarabağ bölgəsi və onun ətrafındakı yeddi rayon işğal edilmişdir. Bu işğal nəticəsində 1 milyondan artıq insanın hüquqları pozulmuş, onlar qaçqın və məcburi köçkün vəziyyətində yaşamaq məcburiyyətində qalmış, ağır məhrumiyyətlərə düçar olmuşlar. Münaqişənin sülh yolu ilə həlli istiqamətində fəaliyyət göstərən ATƏT-in Minsk qrupu uzun illərdir ki, heç bir irəliləyişə nail ola bilmir. Ermənistan danışıqlar prosesində həmişə qeyri-konstruktiv mövqe tutaraq münaqişəni uzatmağa çalışır. Beynəlxalq təşkilatlar isə bir çox hallarda məsələyə ikili standartlardan yanaşaraq Ermənistana təsir göstərib ondan beynəlxalq qanunlara hörmətlə yanaşmağı tələb etmirlər. Buna görə də Ermənistan Azərbaycan torpaqlarını işğal altında saxlamağa davam edir.

Görüşdə Milli Məclisin strukturu və fəaliyyəti, qanunların qəbul edilməsi prosesi haqqında qonağa məlumat verilmişdir. Diqqətə çatdırılmışdır ki, Milli Məclis siyasi partiyaların maliyyələşməsi haqqında qanun qəbul etmişdir və parlamentdə təmsil olunan bütün siyasi partiyalar dövlət büdcəsindən vəsait alırlar.

J.K.Minyon isə AŞ PA-nın fəaliyyəti və prinsipləri barəsində məlumat vermiş, quruma rəhbərlik etdiyi dövrdə Ermənistan-Azərbaycan, Dağlıq Qarabağ münaqişəsinin sülh yolu ilə həllinə yardımçı olacağını bildirmişdir.

Görüşdə qarşılıqlı maraq doğuran məsələlər ətrafında fikir mübadiləsi aparılmışdır.

AzərTAc

Azərbaycan.- 2013.- 28 may.- S. 4.