Azərbaycan ilə İordaniya arasında İKT sahəsində əməkdaşlığın perspektivləri müzakirə olunmuşdur

İordaniyada, Ölü dənizin sahilində Yaxın Şərq və Şimali Afrika regionu üzrə Ümumdünya İqtisadi Forumunun növbəti iclası işə başlamışdır.

Forumda İordaniya Kralı II Abdullah, ABŞ-ın dövlət katibi C.Kerri, Fələstin Prezidenti M.Abbas, Beynəlxalq Valyuta Fondunun icraçı direktorunun müavini C.Men, dünyanın bir sıra ölkələrinin sabiq hökumət başçıları, siyasi, ictimai xadimlər, iqtisadçı ekspertlər, 50-dən çox ölkənin parlament üzvləri, habelə vətəndaş cəmiyyəti təşkilatlarının nümayəndələri iştirak edirlər. Bu mötəbər tədbirdə Azərbaycanı rabitə və informasiya texnologiyaları naziri Əli Abbasovun başçılıq etdiyi nümayəndə heyəti və Azərbaycanın İordaniyadakı səfiri S.Ağabəyov təmsil edir.

Tədbiri giriş nitqi ilə açan Kral II Abdullah İordaniyanın son illər üzləşdiyi iqtisadi və maliyyə problemləri, bir çox region ölkələrinin büdcə kəsiri problemi, dünya iqtisadi böhranının bütün regiona mənfi təsiri barədə fikirlərini bölüşmüş, forumun işinə uğurlar arzulamışdır. Forum çərçivəsində Yaxın Şərq və ərəb dünyasının üzləşdiyi bir sıra iqtisadi problemlər və onların həll yolları ətrafında seminarlar da təşkil edilmişdir.

Forum çərçivəsində mayın 26-da nazir Ə.Abbasov İordaniyanın sənaye və ticarət naziri, eyni zamanda, rabitə və informasiya texnologiyaları naziri H.Həlvani ilə görüşmüşdür.

Söhbət zamanı rabitə və informasiya texnologiyaları sahəsində iki ölkə arasında əməkdaşlığın hazırkı vəziyyəti və bu əməkdaşlığın perspektivləri ətrafında geniş fikir mübadiləsi aparılmışdır. Ölkəmizin İKT sahəsində böyük uğurlar əldə etdiyini bildirən Ə.Abbasov, bu sahədə geniş investisiya yatırımı imkanlarının olduğunu iordaniyalı həmkarının diqqətinə çatdırmış, onu cari ilin dekabrında Bakıda keçirilməsi planlaşdırılmış "Bakutel-2013" konfrans və sərgisinə dəvət etmişdir.

Azərbaycana üç dəfə səfər etdiyini, respublikamızın hər yerində, xüsusən də Bakıda aparılan nəhəng yenidənqurma və quruculuq işlərini yüksək qiymətləndirən H.Həlvani ölkəmizlə İKT sahəsinə əməkdaşlığın inkişafında maraqlı olduğunu bildirmişdir. Elə həmin gün Azərbaycan nümayəndə heyətinin başçısı nazir Ə.Abbasov forumda çıxış etmişdir.

Azərbaycan.- 2013.- 28 may.- S. 6.