Azərbaycan nümayəndə heyəti İordaniyada Dünya İqtisadi Forumunun iclasında iştirak etmişdir

Mayın 24-dən 26-dək İordaniyada Yaxın Şərq və Şimali Afrika regionu üzrə Dünya İqtisadi Forumunun növbəti iclası keçirilmişdir.

Forumda İordaniya Kralı II Abdullah, ABŞ-ın dövlət katibi Con Kerri, dünyanın bir sıra ölkələrinin sabiq hökumət başçıları, siyasi, ictimai xadimlər, iqtisadçı ekspertlər, 50-dən çox ölkənin parlament üzvləri, vətəndaş cəmiyyəti təşkilatlarının nümayəndələri iştirak etmişlər.

Beynəlxalq tədbirdə Azərbaycanı rabitə və informasiya texnologiyaları naziri Əli Abbasovun başçılıq etdiyi nümayəndə heyəti təmsil etmişdir.

Nazirliyin mətbuat xidmətindən AzərTAc-a bildirmişlər ki, tədbiri giriş nitqi ilə açan Kral II Abdullah İordaniyanın son illər üzləşdiyi iqtisadi və maliyyə problemlərindən danışmış və forumun işinə uğurlar arzulamışdır.

Forum çərçivəsində Yaxın Şərq və Ərəb dünyasının üzləşdiyi bir sıra iqtisadi problemlər və onların həlli yolları ilə bağlı seminarlar təşkil olunmuşdur.

Forumda nazir Əli Abbasov çıxış etmişdir.

Ə.Abbasov İordaniyanın sənaye və ticarət naziri, eyni zamanda rabitə və informasiya texnologiyaları naziri Hatəm Həlvani ilə görüşmüşdür. Görüşdə iki ölkə arasında rabitə və informasiya texnologiyaları sahəsində əməkdaşlığın perspektivləri ətrafında fikir mübadiləsi aparılmışdır.

Ölkəmizin informasiya-kommunikasiya texnologiyaları (İKT) sahəsində böyük uğurlar əldə etdiyini deyən Ə.Abbasov bu sahədə geniş investisiya yatırımı imkanlarının olduğunu diqqətə çatdırmış, H.Həlvanini cari ilin dekabrında Bakıda keçiriləcək "Bakutel-2013" konfrans və sərgisinə dəvət etmişdir.

Azərbaycana üç dəfə səfər etdiyini deyən, respublikamızın hər yerində, xüsusən də Bakıda aparılan yenidənqurma və quruculuq işlərini yüksək qiymətləndirən H.Həlvani ölkəmiz ilə İKT sahəsində əməkdaşlığın inkişafında maraqlı olduğunu bildirmişdir.

Azərbaycan.- 2013.- 28 may.- S. 6.