Azərbaycan Xalq Cümhuriyyətinin yaranmasının 95-ci ildönümü və ümummilli lider Heydər Əliyevin anadan olmasının 90 illik yubileyi münasibətilə Təbrizdə təntənəli mərasim keçirilmişdir

Azərbaycan Xalq Cümhuriyyətinin yaranmasının 95-ci ildönümü və ümummilli lider Heydər Əliyevin anadan olmasının 90 illik yubileyi münasibətilə Təbrizdə təntənəli mərasim təşkil edilmişdir.

Azərbaycanın Təbrizdəki baş konsulluğu tərəfindən təşkil olunan qəbulda İran rəsmiləri, şəhər ictimaiyyətinin nümayəndələri, kütləvi informasiya vasitələrinin rəhbərləri, Türkiyənin Təbrizdəki baş konsulluğunun əməkdaşları iştirak etmişlər.

Mərasimi giriş sözü ilə açan vitse-konsul Nəriman Orucəliyev tədbirin mahiyyəti və proqramı barədə iştirakçılara məlumat vermişdir.

Azərbaycanın və İranın dövlət himnlərinin səsləndirilməsi ilə başlanan mərasimdə çıxış edən baş konsul Əli Əlizadə Şərqdə ilk demokratik respublika olan Azərbaycan Xalq Cümhuriyyətinin yaranması, fəaliyyəti və süqutunun səbəbləri barədə danışmışdır. Cümhuriyyətin dövlətçilik ənənələri və ümummilli lider Heydər Əliyevin siyasi fəaliyyətinin istiqamətləri arasında paralellər aparan Əli Əlizadə qeyd etmişdir ki, cümhuriyyət parlamenti çox qısa bir zaman ərzində mütərəqqi qanunlar qəbul etmiş, düşünülmüş xarici siyasət yürüdərək böyük tarixi əhəmiyyətə malik diplomatik addımlar atmışdır. Azərbaycan xalqının ümummilli lideri Heydər Əliyev siyasi fəaliyyətinin bütün dövrlərində Azərbaycanın tanınması, dövlətimizin qüdrətlənməsi, xalqımızın xoş və firavan həyatı üçün məqsədyönlü strategiya həyata keçirmişdir. Ulu öndər siyasi hakimiyyətə qayıdışından sonra müstəqilliyin yaratdığı imkanlardan maksimum bəhrələnərək Azərbaycan Respublikasını hərtərəfli inkişaf mərhələsinə çıxarmışdır. Heydər Əliyevin müəyyənləşdirdiyi mehriban qonşuluq və səmimi dostluq siyasəti ölkəmizin ikitərəfli və çoxtərəfli münasibətlərində, o cümlədən Azərbaycan-İran münasibətlərinin inkişafında yeni bir mərhələ açmışdır. Bu məqsədyönlü siyasətin nəticəsidir ki, ölkələrimiz arasında tarixi, mədəni, iqtisadi və humanitar əlaqələr davamlı şəkildə inkişaf etməkdədir.

Mərasimdə çıxış edən İran Xarici İşlər Nazirliyinin şimal-qərb nümayəndəliyinin rəhbəri Seyid Əhməd Neməti 28 May - Respublika Günü münasibətilə İran tərəfinin səmimi təbriklərini çatdıraraq qeyd etmişdir ki, ölkələrimiz arasında əlaqələrin inkişaf dinamikasının qorunub saxlanması xalqlarımızın hərtərəfli maraqlarını əks etdirir.

Mərasimdə Azərbaycanın tarixindən və keçdiyi inkişaf mərhələlərindən bəhs edən film nümayiş etdirilmiş, iştirakçılara Azərbaycan həqiqətləri ilə bağlı əyani vəsaitlər paylanmışdır. Tədbir mədəni proqramla davam etmişdir.

Türkiyənin Təbrizdəki baş konsulluğunun və şəhərdəki müəssisə və təşkilatların adından ziyafət salonuna gül çələngləri düzülmüşdür.

Sabir ŞAHTAXTI,

AzərTAc-ın xüsusi müxbiri

Təbriz

Azərbaycan.- 2013.- 28 may.- S. 10.