Los-Ancelesdə Azərbaycanın milli bayramı - Respublika Günü və Heydər Əliyevin 90 illik yubileyi təntənəli şəkildə qeyd olunmuşdur

Azərbaycan Xalq Cümhuriyyətinin yaradılmasının 95-ci ildönümü və ümummilli lider Heydər Əliyevin 90 illik yubileyi münasibətilə Azərbaycanın Los-Ancelesdəki baş konsulluğu geniş ziyafət vermişdir. Tədbirdə Kaliforniya, Nevada, Nyu-Meksiko, Oreqon, Vaşinqton və ABŞ-ın bir sıra digər qərb ştatlarının təmsilçiləri, Los-Anceles dairəsinin və meriyasının məsul əməkdaşları, ABŞ Dövlət Departamentinin nümayəndələri, xarici dövlətlərin Los-Ancelesdəki baş konsulları, Kaliforniya universitetlərinin professorları, yerli KİV təmsilçiləri, həmçinin Azərbaycan, türk, yəhudi və İran icmalarının üzvləri iştirak etmişlər.

Azərbaycanın Los-Ancelesdəki baş konsulu Nəsimi Ağayev çıxışında Respublika Gününün Azərbaycan üçün xüsusi önəm daşıdığını, 95 il öncə Şərq aləmində ilk demokratik və dünyəvi respublikanın yaradıldığını qeyd edərək, bu möhtəşəm hadisənin Azərbaycan xalqının milli dövlətçilik ənənələrinin inkişafında müstəsna rol oynadığını bildirmişdir. Diplomat, həmçinin cümhuriyyətin əldə etdiyi nailiyyətlərdən, həyata keçirdiyi mütərəqqi islahatlardan, Ə.Topşubaşovun rəhbərlik etdiyi nümayəndə heyətinin Parisdə ABŞ Prezidenti V.Vilson ilə keçirdiyi görüşdən söz açmışdır. 1920-ci ildə xarici müdaxilə nəticəsində cümhuriyyətin mövcudluğuna son qoyulmasından sonrakı 71 il ərzində Azərbaycan xalqının öz müstəqil dövlətçiliyinin bərpasına inamını əsla itirmədiyini qeyd edən N.Ağayev bu arzuların, nəhayət, 1991-ci ildə gerçəkləşdiyini söyləmişdir.

Baş konsul müstəqilliyinin ilk illərində Azərbaycanın böyük çətinliklərlə üzləşdiyini, hətta müstəqilliyini itirmək və parçalanmaq təhlükəsi ilə üz-üzə qaldığını diqqətə çatdırmışdır. Diplomat belə ağır bir zamanda görkəmli dövlət və siyasət xadimi Heydər Əliyevin yenidən hakimiyyət sükanı arxasına keçərək, Azərbaycanı böyük təhlükələrdən xilas etdiyini bildirmişdir. N.Ağayev ulu öndər Heydər Əliyevin rəhbərliyi altında aparılan məqsədyönlü islahatlardan, uğurlu daxili və xarici siyasətdən bəhs edərək, Azərbaycanın qısa zaman ərzində regionda öz mövqelərini gücləndirdiyini və sürətli inkişafının əsasını qoyduğunu vurğulamışdır.

Tədbirdə Kaliforniya qubernatoru, Los-Anceles və Orinc vilayətləri, San Dieqo və Monterey şəhərləri adından təbriklər səslənmiş və müvafiq şəhadətnamələr təqdim edilmişdir. Tədbir iştirakçıları Heydər Əliyevin həyat və fəaliyyətinin müxtəlif dövrlərini, eləcə də ABŞ-a rəsmi səfərlərini əks etdirən fotosərgi ilə tanış olmuşlar. Azərbaycan Dövlət Mahnı və Rəqs Ansamblının üzvləri Anar Şahmuradov və Nigar Məmmədovanın ifa etdikləri Azərbaycan milli rəqs nümunələri ziyafət iştirakçılarının hərarətli alqışları ilə qarşılanmışdır.

Yusif BABANLI,

AzərTAc

Vaşinqton

Azərbaycan.- 2013.- 28 may.- S. 11.