Ankarada Azərbaycan Xalq Cümhuriyyətinin qurulmasının 95-ci ildönümü və ümummilli liderin anadan olmasının 90 illiyi münasibətilə möhtəşəm tədbir həyata keçirilmişdir

 

Azərbaycan Respublikasının Türkiyədəki səfirliyi tərəfindən Ankara şəhərində yerləşən Heydər Əliyev Parkında Azərbaycan Xalq Cümhuriyyətinin qurulmasının 95-ci ildönümü və ümummilli liderin anadan olmasının 90 illiyi münasibətilə rəsmi qəbul və möhtəşəm tədbir həyata keçirilmişdir.

Səfirlikdən AzərTAc-a bildirmişlər ki, tədbirdə Azərbaycan Respublikası Prezidentinin Administrasiyasının İctimai-siyasi məsələlər şöbəsinin müdiri Əli Həsənov, ARDNŞ-nin prezidenti Rövnəq Abdullayev, Türkiyə Böyük Millət Məclisinin sədr müavini Mehmet Sağlam, enerji və təbii sərvətlər naziri Taner Yıldız, daxili işlər naziri  Muammer Güler, Türkiyə-Azərbaycan parlamentlərarası dostluq qrupunun rəhbəri Necdet Ünüvar və bu ölkənin digər rəsmi şəxsləri, yüksək rütbəli zabitləri, ictimai, elm və incəsənət xadimləri, Ankarada akkreditə olunmuş diplomatik korpusun rəhbərləri və təmsilçiləri, habelə KİV nümayəndələri iştirak etmişlər.

Səfir Faiq Bağırov, Prezidentin Administrasiyasının İctimai-siyasi məsələlər şöbəsinin müdiri Əli Həsənov, türkiyəli nazirlər - Taner Yıldız, Muammer Güler və digərləri iki qardaş ölkə arasındakı əlaqələr və ulu öndər Heydər Əliyevin Azərbaycanın inkişafı sahəsində əvəzsiz xidmətləri barədə geniş çıxış etmişlər.

Daha sonra "Eurovision-2013" mahnı müsabiqəsində ikinci yerə çıxmış Fərid Məmmədovun ifasında mahnılar səsləndirilmiş, Azərbaycan Dövlət rəqs ansamblı tərəfindən milli rəqslər nümayiş etdirilmişdir.

Tədbir iştirakçılarına türk dilində nəşr etdirilmiş "Heydər Əliyev" və "İlham Əliyev" kitabları ilə yanaşı, "İrs-Miras" və "Diplomatik atlas" jurnalları təqdim olunmuşdur.

Ankarada ARDNŞ tərəfindən əsaslı surətdə təmir edilən Heydər Əliyev Parkı çoxsaylı qonaqlarda xoş təəssürat yaratmış, ölkəmiz haqqında müsbət fikirlərin möhkəmlənməsinə səbəb olmuşdur.

 

Azərbaycan.- 2013.- 30 may.- S. 5.