«Gələcəyə baxış» ABŞ-Azərbaycan Forumu çərçivəsində «Azərbaycan-ABŞ strateji münasibətləri: atılacaq növbəti addımlara doğru» mövzusunda yekun sessiya keçirilmişdir

Mayın 29-da Bakıda "Gələcəyə baxış" ABŞ-Azərbaycan Forumu çərçivəsində "Azərbaycan-ABŞ strateji münasibətləri: atılacaq növbəti addımlara doğru" mövzusunda yekun sessiya keçirilmişdir.

AzərTAc xəbər verir ki, sessiyada çıxış edən ABŞ senatoru Riçard Luqar Azərbaycan Prezidenti İlham Əliyevin forumun açılış mərasimində söylədiyi nitqin tədbir iştirakçılarında dərin təəssürat yaratdığını bildirmişdir. Azərbaycanın ABŞ üçün çox vacib dost və tərəfdaş olduğunu söyləyən R.Luqar bildirmişdir ki, ölkələrimiz arasında əməkdaşlığın bütün istiqamətlərdə, o cümlədən siyasi, iqtisadi, təhlükəsizlik və digər sahələrdə daha da genişləndirilməsi üçün yaxşı imkanlar vardır.

Azərbaycanın dünyada nüfuzunun getdikcə artdığını deyən senator ölkəmizin terrorçuluğa qarşı mübarizəyə verdiyi töhfələrdən danışmış, Azərbaycan hərbçilərinin Əfqanıstanda sülhməramlı əməliyyatlarda ABŞ əsgərləri ilə çiyin-çiyinə dayandığını vurğulamışdır.

ABŞ-ın Azərbaycandakı səfiri Riçard Morninqstar ölkələrimiz arasında əməkdaşlığın hazırkı vəziyyəti barədə məlumat vermiş və ikitərəfli strateji münasibətlərin hər iki dövlətin maraqlarına uyğun olduğunu bildirmişdir. Qeyd edilmişdir ki, beynəlxalq miqyasda terrorçuluğa qarşı mübarizədə Azərbaycan ABŞ-a fəal dəstək verən ölkələrdən biridir. Azərbaycanın Əfqanıstandakı əməliyyatlara həm əsgəri qüvvə, həm də quru və hava məkanından istifadəyə imkan yaratmaqla mühüm töhfələr verdiyini söyləyən səfir Ermənistan-Azərbaycan, Dağlıq Qarabağ münaqişəsinə toxunmuş, hazırkı status-kvonun qəbuledilməz olduğunu söyləmişdir.

ABŞ Konqresinin üzvü Ted Po Azərbaycanın milli bayramı - Respublika Günü münasibətilə xalqımızı təbrik etmişdir. O, Azərbaycanın müsəlman dünyasında ilk demokratik və dünyəvi respublika kimi nümunə olduğunu söyləmiş, müstəqilliyini bərpa etdikdən sonra respublikamızda bütün sahələrdə əldə edilmiş nailiyyətləri yüksək qiymətləndirmişdir.

Azərbaycanda gedən sürətli inkişaf proseslərinin dünya dövlətləri üçün model olduğunu söyləyən T.Po ölkəmizin demokratiyanın inkişafı istiqamətində də bir çox uğurlar qazandığını diqqətə çatdırmışdır. ABŞ Konqresinin üzvü yerləşdiyi həssas regionda Azərbaycanın tam müstəqil siyasət yürütdüyünü, bunun da çox vacib amil olduğunu vurğulamışdır.

Azərbaycanın ABŞ-dakı səfiri Elin Süleymanov bildirmişdir ki, dini və mədəni tolerantlıq baxımından zəngin tarixi ənənələrə malik olan Azərbaycan bir çox dövlətlər üçün nümunə sayılır. Azərbaycan ABŞ və Avropa ölkələri, bütövlükdə Qərb üçün əsas tərəfdaşlardan biridir.

ABŞ-ın Azərbaycanda enerji layihələrində əməkdaşlıq, təhlükəsizlik məsələləri və siyasi-iqtisadi islahatlar istiqamətlərində marağının olduğunu söyləyən E.Süleymanov ölkələrimizin artıq bu sahələrdə mühüm nailiyyətlər əldə etdiklərini söyləmişdir. Diqqətə çatdırılmışdır ki, zəngin enerji ehtiyatlarına, nadir geosiyasi, geostrateji və geoiqtisadi mövqeyə malik Azərbaycan öz potensialı ilə ABŞ-ın regiondakı maraqlarının reallaşmasına cavab verir. Bildirilmişdir ki, hər iki ölkənin regional və qlobal təhlükəsizlik sahələrində əməkdaşlığı əhəmiyyətli dərəcədə genişlənmişdir. Bu əməkdaşlıq artıq regional sərhədləri aşmış və qlobal əhəmiyyət kəsb edir.

Tədbirdə çıxış edən konqresin digər üzvləri Azərbaycan kimi güclü dövlətin ABŞ üçün böyük əhəmiyyətə malik olduğunu söyləmişlər. Bildirilmişdir ki, məhz Azərbaycan kimi ölkələrlə strateji tərəfdaşlıq münasibətləri ABŞ-a üzləşdiyi çağırışlara daha uğurla cavab verməyə imkan verir. Qeyd edilmişdir ki, bu gün Azərbaycan Prezident İlham Əliyevin rəhbərliyi altında sürətlə inkişaf edir.

Natiqlər "Gələcəyə baxış" ABŞ-Azərbaycan Forumunun ölkələrimiz arasında əlaqələrin daha da inkişafı baxımından əhəmiyyətini vurğulamış, tədbirin yüksək səviyyədə təşkilinə görə Azərbaycan hökumətinə, xüsusilə də Prezident İlham Əliyevə təşəkkür etmişlər.

Azərbaycan.- 2013.- 30 may.- S. 8.