Azərbaycan və Türkiyə arasında hərtərəfli əlaqələrdən məmnunluq ifadə olunmuşdur

Mayın 30-da Azərbaycan Respublikasının mədəniyyət və turizm naziri Əbülfəs Qarayev Bakıda keçirilən İkinci Ümumdünya Mədəniyyətlərarası Dialoq Forumu çərçivəsində Türkiyə Böyük Millət Məclisinin sədr müavini Mehmet Sağlam ilə görüşmüşdür.

Görüşdə Azərbaycan ilə Türkiyə arasında dostluq və qardaşlıq münasibətlərinin müxtəlif sahələrdə uğurla inkişaf etdiyi vurğulanmış, qarşılıqlı əlaqələrin bundan sonra da genişlənəcəyinə tam əminlik ifadə olunmuşdur.

Görüşdə Əbülfəs Qarayev Azərbaycan və Türkiyə əlaqələrinin tarixinə nəzər salmış və ölkələrimiz arasında mövcud siyasi, iqtisadi, mədəni əlaqələrdən danışmışdır.

İkinci Ümumdünya Mədəniyyətlərarası Dialoq Forumunun əhəmiyyətindən danışan nazir belə tədbirlərin mədəniyyətlərarası təcrübənin yayılmasında önəmindən bəhs etmişdir.

Ölkələrimiz arasında mədəni əlaqələrin yüksək səviyyədə olduğunu vurğulayan tərəflər Azərbaycanda və Türkiyədə qarşılıqlı mədəniyyət günlərinin keçirildiyini və qarşılıqlı səfərlərin əhəmiyyətini xüsusilə vurğulamışlar.

Azərbaycanın qardaş Türkiyə ilə əməkdaşlığının hər sahədə genişləndiyini vurğulayan Əbülfəs Qarayev əlaqələrin inkişafı üçün böyük potensialın olduğunu xüsusilə qeyd etmişdir.

Mehmet Sağlam forumda iştirakından məmnunluğunu dilə gətirmişdir.

Görüşdə ikitərəfli, regional və beynəlxalq məsələlər ətrafında fikir mübadiləsi aparılmışdır.

AzərTAc

Azərbaycan.- 2013.- 31 may.- S. 5.