HƏDƏFLƏR
...Məxmər örtüklü masanın ortasında üçbucaq çərçivəsində düzülmüş şarlar sərrast baxışların və güclü əllərin nişan aldığı ani bir zərbə ilə hərəkətə gələrək, müstəvinin müxtəlif qütblərinə doğru səpələnir, hərəsi müxtəlif səmtdə yerini tutur...
Sonrakı bir zərbə isə o qədər dəqiq və simvolik alındı ki, ilk baxışdan bunun sadəcə bir bilyard oyunu olduğuna inana bilmirsən...
Elə təkrarsız
kadrlar idi ki!...
O sərrast
baxışlar, çubuqla o dəqiq zərbə, məxmər
örtüklü masanın müxtəlif səmtlərindəki
koğuşlara doğru səpələnən bilyard
daşlarının o nizamı bu gün dünya müstəvisində
Azərbaycanın durumuna o qədər uyğun gəlirdi ki...
Prezident İlham Əliyevin şarları hədəfə
vurduğu o kadrları ilk dəfə televiziyada izləyəndə,
bir anlıq özümü dünya boyda bilyard masasında gedən
gərgin bir oyunun tamaşaçısı kimi hiss
etmişdim.
...Və
elə o anlarda düşünmüşdüm ki, əgər
günlərin birində Azərbaycanın çağdaş
dünyamızdakı mövqeyi barədə yazacaq olsam, ilk
cümlələrim nə vaxtsa izlədiyim o qənimət
kadrlardan, HƏDƏFİ dəqiq müəyyənləşdirən
o iti və sərrast baxışlardan, yaşıl məxmər
üzərində nizamla koğuşlara doğru diyirlənən
o bilyard şarlarından başlanmalıdır...
v v v
...Aradan
bir zaman ötəndən sonra indi həmin anlarla yenidən
baş-başayam, yelkənsiz qayıqla sahilə doğru
üzən dənizçi misalı tək
mən də içimdəki təəssüratlar
ümmanından o anların işığında - öz
sahilimə, qarşımdakı kağızların bəyazlığına
doğru can atıram.
İllərlə qəlbimdə kükrəyən
düşüncələri nizama salıb Sözün
hüzuruna gətirməkdən ötrü qələm və
kağız ən qüdrətli həmdəmimdir, amma
içində dolaşdığım təəssüratların
elə uzaq bir yerindəyəm ki, oradan üfüqlərə
nəzər salınca hələlik kağız və qələm
də məndən çox-çox kənar
görünür.
Yazmaq istədiyim
yüz minlərlə söz arasından nədənsə hələlik
tək bir söz var ağlımda...
"SAĞLAM"
sözü...
Onu müxtəlif kəlmələrin epitetinə
çevirirəm.
SAĞLAM
İNSAN...
SAĞLAM
RUH...
SAĞLAM
MƏNƏVİYYAT...
...Və
Müstəqil Azərbaycan!...
Bəlkə
bayaqdan axtardığım da elə budur?!.
Əslində, bütün həyatımız,
yaşantılarımız bu kəlmənin gücündən
asılı deyilmi?!
-
SAĞLAMLIQ həyatın və onunla birgə insanın
bütün arzularının, ümidlərinin
başlandığı yerdir, sağlam insan - həyatın
ümididir, sağlam ruh, sağlam mənəviyyat -
dünyanın, insanlığın xoşbəxtliyinə
doğru aparan yol...
Onun
öz həyat və fəaliyyəti ilə
yaratdığı nümunə də başqalarına ilk
növbədə bunu öyrədir: dünyaya fayda vermək
üçün sağlam cismə, sağlam ruha və
sağlam mənəviyyata sahib olacaqsan...
Belə
bir örnəyi hər bir fərdin, hətta cəmiyyətdə
böyük səlahiyyət yiyəsi olmayan ən sıravi
adamın da ömürlüyündə izləmək, əlbəttə,
böyük məmnuniyyətdir, amma əgər söhbət
dövlətə rəhbərlik edən, toplumun sabahına
görə məsuliyyət daşıyan Liderdən gedirsə,
yəqin ki, onun aid olduğu cəmiyyətin xoşbəxtliyi
barədə daha əlahiddə formullar axtarmağa lüzum
qalmır.
Çünki
Azərbaycan Prezidentinin aşıladığı dəyərlərdə
cəmiyyət xoşbəxtliyə doğru gedən yolunu
tapıb artıq...
v v v
İlham Əliyevin
içində olduğu böyük siyasətdə təsadüfi
heç nə yoxdur!..
Burada ilk baxışda sadədən-sadə görünən
hər kiçik jest də onun arxasında gizlənmiş incə
mətləblərin bələdçisidir.
Xaraktercə
sadə bir insan olan Azərbaycan Prezidenti idman-sağlamlıq
ocaqlarının açılış törənlərini,
el bayramlarını bəzən gözlənilməz və
böyük rəğbət doğuran hərəkətləri
ilə yaddaqalan edir...
Məsələn, hansısa idman kompleksinin
açılışında dövlət rəhbərimizin ətrafdakıların
və belə qiymətli anları əsla qaçırmayan
telekameraların kadrlarından onu izləyən milyonların
sevgi dolu baxışları altında pencəyini qəfil
çıxarıb, çevikliklə turnikə yönəlməsini
və illərin davamlı məşqlərindən xəbər
verən mahir idmançı vərdişləri ilə
çoxları üçün mümkünsüz olan
çətin idman təmrinlərini yerinə yetirməsini necə
unudasan?!
...Yaxud,
Milli Parkda Novruz bayramı gəzintisində onun pəhləvanlarla
biləyinin gücünü sınamasını...
Və yaxud,
atıcılıq mərkəzində güllələri dəqiq
və düzgün hədəfə vurması...
Çoxları üçün bəlkə də bu,
sağlam həyat tərzi keçirən və bunu öz vətəndaşlarına
da təlqin edən gənc ruhlu, enerjili, zəkası qədər
fiziki cəhətdən də qüvvətli Liderin idmana olan
qeyri-iradi həvəsidir.
Amma
bütün bunlar daha çox dünyaya ünvanlanmış
bir ismarış kimi də gəlir mənə...
Prezidentimiz
bununla sanki Onun şəxsində ümumən MÜSTƏQİL
AZƏRBAYCAN dövlətinin sağlamlığını,
gücünü, heç bir maneəyə, təhdidə
baxmadan öz qolunun qüvvəsi ilə HƏDƏFLƏRİNƏ
yetişmək əzmini, heç bir kimsənin bizi öz
yolumuzdan sapdıra, başımıza hakim kəsilə bilməyəcəyini
göstərir...
v v v
...Vaxtın
dövlət adamlarından cəngavərlik tələb elədiyi
illər çoxdan geridə qalıb. Amma indi dünya siyasətində
tətbiq edilən hiyləgər fəndlərin
döyüş meydanlarındakı mərdanə təhdidlərdən
daha az təhlükəli olduğunu kim
iddia edə bilər ki?!
Bu təhlükələrdən yayınmaq
üçün indiki dövrün dövlət rəhbəri
mükəmməl təhsillə, fundamental biliklərlə
silahlanmalıdır. İlham Əliyevin böyük siyasət
ustasının ailəsində dünyaya gəlməsi,
elmi-siyasi elitar mühitdə böyüməsi,
dünyanın ən nüfuzlu universitetlərindən birində
təhsil alması, apardığı elmi tədqiqatlarla
dünyada cərəyan edən yeni meyilləri incəliklərinə
qədər öyrənməsi ona zamanında bu imkanları
qazandırıb.
Azərbaycan
Prezidenti müasir dünya siyasətinin gözlənilməz fəndlərlə
dolu mübarizə meydanlarında həmişə
güclü tərəfdir!
Çünki o, milli maraqlarımıza qarşı
yönələn gedişləri əvvəlcədən duyub
vaxtında güclü müdafiə taktikası
qurmağı və həmişə də ölkəmizin mənafelərinin
qalibiyyətini təmin etməyi bacarır.
Geosiyasi məkanda ona qarşı hansısa təzyiq
metodlarından istifadə etmək mümkündür, siyasət
tarixində əsrlər boyu sınaqdan
çıxarılmış uğurlu-uğursuz
üsulları da bir-birinə calamaq olar. Amma bütün bu təzyiqlər,
təsirlər, müdaxilələr nəticəsiz qalacaq - Azərbaycan
Prezidentinin qərarlarına hansısa formada təsir göstərmək,
onu dövlət maraqlarına zidd nələrəsə vadar
etmək, sadəcə, mümkün deyil...
Hər
bir məsələ haqqında onun öz fikri var, məqamında
bu fikirlərini cəsarətlə bütün dünyaya bəyan
edər, doğru bildiyi addımı atmaqda heç kimdən
çəkinməz...
Çünki söykəndiyi dayaq sağlamdır - əbədi
olmayan dostlarını həmişə əbədi
maraqlarına satmağa hazır beynəlxalq oyunçular deyil
söykəndiyi, yeddidən yetmiş yeddiyə öz
Prezidentinə dəstək verən, bütün qərarlarında
onun yanında olan qosqocaman Azərbaycan xalqıdır.
Bu
gücü, bu vəhdəti kim sarsıda bilər?!.
"...Əgər
tarixi perspektiv nöqteyi-nəzərindən baxsaq, prinsipcə
ötən yüz il ərzində dünya siyasətində milli
və qlobal maraqları təmin etmək formalarından
başqa heç nə dəyişməyib. Sadəcə,
indi başqa formalar mövcuddur. Praktiki olaraq elə həmin
üsullardan istifadə edilir: əmin etmək, əgər bu,
alınmasa təzyiq, bu da baş tutmasa, onda daha sərt
üsullar tətbiq olunur. Ona görə də
prinsipcə dünyada heç nə dəyişməyib.
Sadəcə örtük dəyişib və
hansısa müddətdə 1990-cı illərdə müstəqilliklərini
bərpa edən bəzi dövlətlər nə baş
verdiyini anlamırdılar. Düşünürəm
ki, indi xoş günlər xülyası quran və hansısa
strukturlara daxil olanların bir çoxu dərin təəssüf
hissi keçirirlər. Nüfuz dairəsinə
dair müəyyən qarşıdurma indi də var,
keçmişdə də olub.
Düşünürəm ki, bu, bəzi dairələr
tərəfindən sadəlövhcəsinə qəbul olunur. Nüfuz dairəsi
guya sənə hesabat verilən yerdir. Əslində isə
nüfuz dairəsi sənə rahat olan, hörmət edilən,
dəstək göstərilən yerdir"...
Bu
sözlər möhtərəm Prezidentimizin dedikləridir...
20 ildən
çoxdur ki, taleyinə sahib çıxıb, kiminsə
himayəsinə sığınmadan müstəqillik
yollarında böyük nailiyyətlər əldə
etmiş dövlətin milli maraqlarına bütün
dünyanın hörmətlə yanaşmalı olduğunu
göstərməkdən ötrü Azərbaycan Prezidentinin səsləndirdiyi
bu həqiqətlər müasir dünya siyasətinin iç
üzünü açmaq üçün mümkün fikirlərin
nə birincisi, nə də sonuncusudur.
Amma razılaşaq ki, yenicə müstəqillik
qazanmış ölkələrin müasir dünyadakı
yeri barədə bundan mükəmməl fikirlərlə hələ
heç bir siyasət, elm adamının
çıxışlarında rastlaşmamışıq.
v v v
...Tarix
ömrünü at belində keçirərək
ucsuz-bucaqsıq ərazilərdə imperiyalar quranlarla bu ərazinin
hansısa kiçik məkanında taleyini özünə
yurd bildiyi bir parça torpağın səxavətinə
bağlamış insanlar arasındakı sadə və
güclü qarşıdurmalarda öz əksini tapır.
Min illər boyu insanlar öz dünyalarında bu cür
ömür sürüblər.
Bəs onlardan hansının seçdiyi yol daha çox
rəğbətə layiqdir?
Zənnimizcə,
bu hökmün ən ədalətli münsifi ZAMANIN
özü olar, onun reallığında da nə vaxtsa at belində
qurulmuş ucsuz-bucaqsız imperiyalardan daha heç nə
yoxdur, onlar səhradakı qum təpəcikləri
kimi çoxdan göyə sovrulmuşlar.
Taleyini torpağa bağlayıb torpağın bərəkətindən
barınanların yaratdıqları mənzərələrdən,
tikib-yaratdıqlarından isə dünyanın bugünkü
qüdrətli dövlətləri, onun daşlarda
naxışlanmış tarixi və indiki dünyamızda
öz dövlətinin qüdrətinə güvənən,
onun tarixi ilə öyünən xoşbəxt vətəndaşları
qalıb.
...Xəyalım
bir anlıq doğma məkanlardan ötür, fikrimdə şəhərlərimizin,
rayonlarımızın küçələrində,
parklarında, keçmişlə bugün arasında
dolaşıram, bugünə doğru addımladıqca,
öz görkəmini dəyişir hər şey. Nə zamansa gəncliyimin bir parçası ilə
vidalaşdığım məkanlarda bahar fərəhini
yaşayan ağaclardan və xoş xatirələrdən
başqa indi heç nə qalmır.
Keçmişdən
daha az şey var bu məkanlarda, sanki
ağaclar kimi, binaların, daşın, dəmirin də
baharı başlanıb, onlar da libasını dəyişib.
Allahın quruca daşı da elə bil adamla dil açıb
söhbətləşmək, üstündə qərar
tutduğu divarın üzərindəki yöndəmsiz sovet
izlərini itirdiyini, zamanında mesenatlarımızın
inkişaf etmiş Avropa ölkələrində görüb
bəyənib oxşarını şəhərlərimizdə
qurub-yaratdıqları tikililərin möhtəşəm ahənginə
qarışdığını və beləliklə, bundan
sonra min illərə iddialı yeni bir tarixin
başlanğıcına çevrildiyini anlatmaq istəyir...
Dövlətçilik
memarı Heydər Əliyevin irsindən güc alan
Azərbaycan Prezidentinin tikinti-quruculuq işlərinə
ayırdığı bu qədər böyük diqqətin
sirrini bir də bu həqiqətin işığında
açmağa çalışıram...
...İndiyə qədər, sadəcə, vətəndaşların
həyatını rahatlaşdıran, uzaq yolumuzu yaxın edən,
gün-güzəranımızı
yaxşılaşdıran layihələr, tikinti-abadlıq tədbirləri
kimi yanaşdığım bütün bu işlərə
artıq bir də vaxtın hündürlüyündən
baxıram...
Ölkəmizin
qiyafəsini dəyişən bu tikililər mənim
baxdığım yerdən sadəcə bina, körpü, yol
deyil, Azərbaycan xalqının dünyanın bəlli bir məkanında
özünüifadəsidir, Yer üzündə bu dövlətin
özü qədər əbədiləşən DAŞ
İMZALARDIR...
XX əsrin
əvvəllərində müsəlman Şərqində yox
yerdən ilk demokratik cümhuriyyət bina etmiş, indi nur
içində uyuyan zəkası işıqlı kişilərin
ümidlərində qırılmış tarixin o zaman
qaldığı yerdən davam etməsidir...
Xalqların
həyatına gətirdiyi yaxşılı-pisli bütün
dəyişikliklərə rəğmən sovet quruluşu
tarixin böyük yanlışı idi və əgər
zamanı felin şərt şəklində
danışdırıb bu yanlışın təkcə elə
Azərbaycana vurduğu ziyanları onun faydaları ilə bir
çəki-tərəziyə qoya bilsəydik, ziyan tərəfinin
xeyli ağır gəldiyini görəcəkdik...
Amma
başa gələn çəkilər, demişlər... Və
yaşananları geri çevirib yenidən yaşamağa nə
lüzum... Keçmişi dəyişib inkar etmək də
mümkünsüz...
Bu halda ən düzgün yol - keçmişə tarix
kimi sayğı bəsləməklə onun müsbət ənənələri
üzərində bugünün - dünyaya
açılmış demokratik, sivil Azərbaycanını
formalaşdırmaqdır.
O
keçmişdən uzaqlaşdıran hər addım bizi xəyallarımızda
təsəvvür etdiyimiz Azərbaycana, Heydər Əliyevin
arzularında şəkillənmiş və bu gün Prezident
İlham Əliyevin xalqla çiyin-çiyinə, dünyada
işimizə dəstək olanların iş
avandlığı diləyi ilə daş-daş, kərpic-kərpic
torpağın köksünə köçürdüyü
gələcəyin Azərbaycanına doğru
yaxınlaşdırır...
v v v
...Dahi
avstriyalı yazar Stefan Sveyqin XX əsrin birinci yarısında
Avropanın mədəni və siyasi həyatında baş verənləri
öz xatirələri fonunda təsvir etməkdən
ötrü qələmə aldığı "Dünənin
dünyası" kitabını az qala yüzüncü dəfə
vərəqləyirəm...
Diqqətli oxucu üçün bu kitab Avropanın ən
qibtə ediləsi ölkələrini indiki uğurlarına qədər
aparmış izləri tapmaqdan ötrü etibarlı yol bələdçisidir.
Birinci dəfə
oxuyanda əsərin ilk cümlələri məni çox
heyrətləndirmişdi...
"...O dövr üçün uyğun bir formul
tapmağı təcrübədən keçirsəm,
düşünürəm ki, ən dəqiq ifadə bu
olardı: əmin-amanlıq içində yaşamağın
qızıl dövrü. Burada hər şey
möhkəm zəmin üzərində qurulmuş kimiydi və
dövlət bu davamlılığın ən böyük
qarantıydı. Dövlətin vətəndaşlarına
verdiyi haqlar xalqın sərbəst şəkildə
seçdiyi nümayəndələrindən təşkil
olunan parlamentdə təsdiqlənirdi. Pul
vahidimiz dəyişməz və dəyərini itirməzdi.
Hamı nəyə sahib olduğunu, payına nə
düşdüyünü, nəyə icazə verildiyini, ya
da nəyin qadağan edildiyini bilirdi. Hər
şeyin bir qaydası, ölçüsü,
tarazlığı vardı. ...Heç kim
müharibəni, inqilabı, ya da hərbi çevrilişi
ağlına belə gətirməzdi. Hər
cür köklü dəyişiklik, hər cür
zorakılıq ağlın müstəqil olduğu bu
dövrdə imkansız görünürdü.
Bu əmin-amanlıq hissi milyonlara insanın əldə
etmək istədiyi bir sərvət, ortaq həyat idealı
idi. Həyat sadəcə bu əmin-amanlıq duyğusuyla
yaşanmağa dəyər olurdu. Hər
keçən gün daha geniş dairələr bu dəyərli
sərvətdən öz payına düşəni almaq istəyirdi.
...İnsanlar talelərinin mümkün zərbələrinə
qarşı həyatlarının bütün zəif nöqtələrini
möhkəmləndirə biləcəklərinə inanır
və etibar edirdilər. Onlar XIX əsr
liberal idealizmi sayəsində "mövcud dünyaların ən
yaxşısına" doğru səhvsiz yolla dümdüz
getdiklərindən çox əmindilər".
Şərhə ehtiyac yoxdur əslində, amma bayaqdan
zülməti yaran işıq kimi gözlərimə hopan sətirləri
bugünün Azərbaycanından keçirməkdən də
özümü saxlaya bilmirəm.
Axı
bunlar indi bizim ölkəmizdə yaşananlardır...
Burada hər
sətrin ifadə etdiyi həqiqət - bugünün Azərbaycanına
aid bir reallığın güzgüsüdür və bu
güzgüdə Azərbaycanı gördükcə Birinci
Dünya savaşının acılarından sonrakı xiffətli
xatirələrinin bir küncündən boylanan "Dünənin
dünyası"nı bacardıqca daha
yaxşı təsvir etməkdən ötrü irəli
sürdüyü formulun sərrastlığına görə
böyük söz ustadına həsəd aparmaya bilmirəm.
...Doğrudan
da, əmin-amanlıq içində yaşamağın
qızıl dövrü...
Və bu
düşüncə ürəyimin yanından sözlə
ifadəsi mümkün olmayan qəribə bir rahatlıq mehi
kimi əsir...
Sveyq qələminin
təsvir etdiyi bu dövr Azərbaycan üçün
"Dünənin dünyası" deyil, içində
yaşadığımız bugünün və hər
gün bir yeni başlanğıc kimi ümidlə, ruhla
gözlədiyimiz növbəti sabahların dan yerinin
söküldüyü yepyeni bir dünyadır...
v v v
Dövlət adamlarının qəribə taleləri
var, onların hətta adları da tarixin parçasına
çevrilir, bu adlarda onların rəhbərliyi ilə
yaşanmış, yaşanan vaxtın ruhu, ab-havası əks
olunur.
Böyük ŞƏXSİYYƏT Heydər Əliyevin
adı gələndə qeyri-ixtiyari Azərbaycanın
keçdiyi əzablı yolları xatırlayırsan,
zamanın ağır tapdağı ilə əzib keçmək
istədiyi köməksiz insanları öz ardınca qorxusuz,
hamar, sabit bir yola çıxarmış liderin mübarizə
dolu ömrü keçir gözlərinin önündən.
Eyni zamanı paylaşmış dövlət xadimlərinin
taleyi arasında da oxşarlıqlar olur və
görünür, bu, vaxtın irəli sürdüyü
şərtlərdən irəli gələn ortaq əlamətdir.
Əgər
zamanı qabaqlayıb Azərbaycan Prezidenti İlham Əliyevin
adında öz ifadəsini tapan tarixi təsəvvür etməyə
çalışsaq, bu, heç şübhəsiz ki, Azərbaycanın
bütün mənalarda rifahının tarixi olacaq!..
Azərbaycan
tarixinin İlham Əliyev dövrü elə bir vaxta təsadüf
edir ki, adına qloballaşma deyilən
zaman seli özünün sənətkarlıq, manufaktura,
mexanikləşmə və avtomatlaşdırma mərhələlərindən
keçərək indi bütün dünyanı daha sürətlə
ağuşuna almaqdadır. Bu, yaxşıdır, ya pisdir, -
demək bizə düşməz, çünki hər şey
iradəmizdən çox-çox kənarda baş verir, onu
yönəltmək, qloballaşma meyillərinə hansısa
formada təsir göstərmək imkanında da deyilik.
Dövlətləri, xalqları, milli mədəniyyətləri
sürətlə öz subyektinə çevirib ölkələr
arasındakı sərhədləri bir anda ortadan götürən,
ibtidai insanlardan üzü bəri
yaşadığımız real dünyanın virtual alternativini
yaradan qloballaşmanın insanlara rəhbərlik edən liderlər
qarşısında irəli sürdüyü tələblər
də bambaşqadır. Bu tələblərə cavab verən
dövlət adamları xalqlarını irəli aparır,
vaxtın sürətində özünü itirib
yanlış qərarlar verənlərsə öz dövlətlərini,
xalqlarının milli kimliyini qloballaşma nəhrində
itib-batmağa məhkum edir.
Belə
bir zamanda Azərbaycana qlobal çağırışları
hamıdan daha düzgün dəyərləndirən, onun
müsbət meyillərindən faydalanmaq, mənfi təsirlərini
isə mümkün qədər dəf etmək
üçün mükəmməl bilik və bacarıqlara,
insanları yeni məqsədlər ətrafında səfərbər
etməyə qabil Liderin - İlham Əliyevin rəhbərlik
etməsi, yəqin ki, zamanın belə bir əhəmiyyətli
anında taleyin bizimlə xoş davranmasıdır...
Qloballaşma bu gün ölkəyə rəhbərlik
missiyasını üzərinə götürmüş hər
bir şəxs qarşısında yaxşı menecerlik tələbini
aktuallaşdırır, önündəki məqsədlərin,
bu məqsədlərə doğru aparan yolların,
qazanılmış nəticələrin düzgün
ayırd edilməsi şərtlərini irəli sürür.
Azərbaycan
Prezidenti üçün menecerlik məcburən yiyələnməli
olduğu bacarıq deyil, anadangəlmə istedaddır!
Təfəkkür
tərzidir!
Və bunu dövlət rəhbərimizin istənilən
məsələlərə yanaşmalarında izləyə
bilərik.
O,
müxtəlif tədbirlərdəki
çıxışlarında bir adamın malik olduğu bu qədər
geniş bilgi dairəsi, informasiyalarla işləmək
bacarığı, analitik qabiliyyətləri ilə öz izləyicilərini,
sözün əsl mənasında, heyrətləndirir.
Azərbaycan
Prezidenti çıxışlarında müxtəlif məsələlər
haqqında söhbət açır, bu sahələrin hər
biri üzrə müqayisəli məlumatları, rəqəmləri,
göstəriciləri təqdim edir, proqnozlar irəli
sürür, nəticələrə uyğun qərarlar verir
və bütün bunların heç birində hər
hansı konspektdən, əvvəlcədən
hazırlanmış məruzə mətnlərindən istifadə
etmir, toxunduğu bütün məlumatlar, səsləndirdiyi
bütün faktlar məhz öz düşüncələrinə
istinaddır.
İlham Əliyevin
bir neçə xarici dildə sərbəst və sərrast
danışması, informasiya-kommunikasiya texnologiyalarından
istifadə vərdişləri dövrün siyasi liderlər
qarşısında müəyyənləşdirdiyi tələblərə
uyğun olmaqla yanaşı, Müasir Şəxsiyyət
Obrazının əyaniliyi baxımından da özündə
bu obrazı formalaşdırmağa can atan hər bir Azərbaycan
vətəndaşı üçün parlaq örnəkdir.
v v v
Azərbaycan
Prezidentinin irəli sürdüyü vəzifələrə
diqqət yetirək, imzaladığı fərman və sərəncamların,
dövlət proqramlarının məqsədlərinə nəzər
salaq - bunların hər biri müasir dünyamızda istənilən
toplumun xoşbəxtliyini təmin edəcək yeni meyillərdir,
sivil dünyanı gələcəyə doğru aparan
aydın istiqamətlərdir, cənab İlham Əliyevin gələcəyin
Azərbaycanını bu yolun öncüllərindən biri
kimi görmək arzusudur...
Dövlət rəhbərimiz zamanında
çoxlarına əfsanə kimi görünən bu
arzuların mühüm qismini reallığa çevirdi. O, ulu öndər Heydər Əliyevin
parçalanma təhlükəsindən xilas edib, min bir zəhmət
bahasına ayaq üstə qaldırdığı kiçik
ölkədən bütün dünyanın hesablaşmaq,
hörmətlə yanaşmaq məcburiyyətində
qaldığı qüdrətli bir dövlət
formalaşdırdı.
Azərbaycan
Prezidenti on illərlə dünyanın siyasi çevrələrində
kabus kimi dolaşan erməni mifini darmadağın etdi, Azərbaycanın
günbəgün yüksələn sosial-iqtisadi
üstünlüyü ilə, tutduğu qətiyyətli
mövqe ilə, apardığı məqsədyönlü
işlə təcavüzkar qonşularımızı da,
onların beynəlxalq aləmdəki havadarlarını da yerdən-yerə
vurdu, cəsarətlə üzərlərinə yeriyərkən
onların necə aciz, rəzil bir duruma düşdüklərini
bütün dünyaya sərgilədi.
O,
dövləti öz vətəndaşlarına daha da
doğmalaşdırdı, Azərbaycanı hər bir
soydaşımızın özünə isti ocaq bildiyi,
qayğısından barınıb, qeyrətini çəkdiyi
böyük bir ailəyə çevirdi.
Ən
yaxın silahdaşlarının - ölkəmizin birinci
xanımı Mehriban xanım Əliyevanın, doğma
övladlarının aləmə nur saçan xeyirxah əməlləri
misalında bu gün məhz Azərbaycanın bəşəriyyətə
təlqin etməli olduğu dəyərləri önə
çəkdi, ölkəmizi Yer üzündə
sülhün, mədəniyyətlər arasında dialoqun,
tolerantlığın qibləsi kimi tanıtdı.
İlham Əliyev
öz şəxsiyyəti ilə Azərbaycan insanının
kamillik haqqında təsəvvürlərini bütünləşdirdi,
sadəliyi, təvazökarlığı, lazımsız dəbdəbədən
uzaqlığı, kimliyindən asılı olmayaraq hər
bir insana sevgi ilə yanaşmağı, comərdliyi, kimsəsizlərə,
möhtaclara mərhəmətli, yolunu azmışlara,
harınlamışlara sərt olmağı, doğrunu
yanlışdan, yaxşını pisdən ədalətlə
ayırmağı bu təsəvvürlərin əsas cizgilərinə
çevirdi.
...Azərbaycanın
körpə vətəndaşları indi bu təsəvvürlərin
işığında boy atır.
Onlar
böyüdükcə biz daha güclü oluruq!..
Və əmin-amanlıq,
sabitlik, stabillik duyğusu ilə yaşanmağa dəyər
olan həyatın əsl xoşbəxtliyi də elə budur!..
Sübhçağı
- dünya şişmani və yuxulu gözlərini
ovxalayıb oyanmaq istəyəndə, mən də bu son sətirləri
yazıram və... yazıma ağaclardan süzülən
kövrək bir şeh damlası kimi nöqtə qoymaq istəyirəm...
Orda,
uzaqda - Xəzərin gömgöy sularının dünya ilə
qovuşduğu yerdəcə - topalanmış buludları,
dumanı, çəni, çiskini Xəzər və Günəş
şəfəqləri qovalayıb aparır, əridib yoxa
çıxarır...
Günəş
zərrin şəfəqlərini yaydıqca, gözlərim
önündə böyük sevgi ilə işlənmiş
MÜSTƏQİL AZƏRBAYCANIMIN tablosu açılır...
Bu
Xoşbəxtlik Əsərinin Müəllifinin - Azərbaycan
Prezidentinin işıqlı çöhrəsi
gülümsünür...
Seyr etdikcə,
qeyri-ixtiyari pıçıldayıram:
Həmişə
xoşbəxt ol, mənim günəşli, nurlu AZƏRBAYCANIM!..
İmamverdi İSMAYILOV,
Milli Məclisin deputatı
Azərbaycan.- 2013.- 31 may.- S. 7.