«Gələcəyə baxış» Forumunun «Ağ ev, xalq və dünya» mövzusundakı xüsusi sessiyasında Azərbaycanın ABŞ üçün əhəmiyyətindən danışılmışdır

Mayın 29-da Bakıda Heydər Əliyev Mərkəzində "Gələcəyə baxış" Azərbaycan-ABŞ Forumu çərçivəsində "Ağ ev, xalq və dünya" mövzusunda xüsusi sessiya keçirilmişdir.

AzərTAc xəbər verir ki, Almaniyanın Marşal Fondunun Transatlantik Akademiyasının tədqiqatçısı Coşua Volkerin moderatorluğu ilə keçirilən sessiyada ABŞ Prezidenti Barak Obamanın sabiq baş müşaviri Robert GİBS məruzə ilə çıxış etmişdir.

Məruzəçi ölkələrimiz arasında siyasi əlaqələrin yüksək səviyyədə olduğunu bildirərək iqtisadi, enerji, təhlükəsizlik sahələrində əlaqələrimizin regional əməkdaşlığın möhkəmlənməsi baxımından əhəmiyyətini qeyd etmişdir.

Vurğulanmışdır ki, Azərbaycan regionda həm iqtisadi, həm də siyasi baxımdan nüfuzlu və multi-mədəni cəmiyyəti olan müstəqil, çiçəklənən ölkədir. Azərbaycan regionda belə əhəmiyyətli, vacib tədbirlərin keçirilməsi baxımından lider ölkə sayıla bilər.

Sonda sessiya iştirakçılarını maraqlandıran suallar cavablandırılmış, mövzu ilə bağlı müzakirələr aparılmışdır.

Azərbaycan.-2013.- 30 may.- S.8.