Senator Riçard Byor yenidən Azərbaycan Prezidenti seçilməsi

münasibətilə İlham Əliyevi təbrik etmişdir

ABŞ senatoru Riçard Byor Senatda çıxış edərək yenidən Azərbaycan Respublikasının Prezidenti seçilməyi münasibətilə İlham Əliyevi və Azərbaycan xalqını təbrik etmişdir.

Bu yaxınlarda Bakıya səfərindən söz açan senator bildirmişdir ki, Birləşmiş Ştatlar və Azərbaycan, habelə regiondakı müttəfiqlərin qarşısında duran mürəkkəb məsələləri müzakirə etmək üçün Prezident İlham Əliyev ilə şəxsən görüşmüşdür. Senator demişdir: "Fürsətdən istifadə edərək Birləşmiş Ştatlara və Amerika xalqına göstərdiyi möhkəm dəstəyə görə Prezident İlham Əliyevə, Azərbaycan hökumətinə və xalqına şəxsi minnətdarlığımı bildirdim". Senator demişdir ki, mərhum Prezident Heydər Əliyev 2001-ci il 11 sentyabr terror aktlarından dərhal sonra dəstəyini bildirmək üçün Prezident Corc Buşa zəng etmiş ilk dövlət rəhbərlərindən biri olmuşdur.

Sonra senator R.Byor terrorizmə qarşı mübarizədə, enerji təhlükəsizliyinin qorunub saxlanılmasında, habelə ABŞ və NATO materiallarının Azərbaycan ərazisindən keçən tranzit yolla Əfqanıstana göndərilməsində ABŞ-ın strateji tərəfdaşı olan Azərbaycanın rolunu vurğulamışdır. Azərbaycan NATO-nun "Sülh Naminə Tərəfdaşlıq" proqramının üzvüdür, habelə İraqda və Əfqanıstanda koalisiya qüvvələrinin tərkibində əməliyyatlar aparmaq üçün öz əsgərlərini göndərmiş ilk dövlətlərdən biridir.

Senator çıxışını yekunlaşdıraraq demişdir: "Cənubi Qafqaz regionunda Azərbaycanın sabitliyi və inkişafı, habelə onun demokratik islahatlara sadiq olması mürəkkəb bir regionda ümid işığı rolu oynayır".

Senator R.Byor 2005-ci ildən Şimali Karolina ştatını təmsil edir. Daha əvvəl - 1995-ci ildən ABŞ Konqresində elə həmin ştatın 5-ci seçki dairəsini təmsil etmişdir.

Yusif BABANLI,

AzərTAc-ın xüsusi müxbiri

Vaşinqton

Azərbaycan.-2013.- 2 noyabr.- S. 2.