III Bakı Beynəlxalq Humanitar Forumu xarici mətbuatda

Misirin nüfuzlu "Əl-Məsəiyyə" qəzetində III Bakı Beynəlxalq Humanitar Forumu haqqında məqalə dərc edilmişdir. Məqalənin müəllifi qəzetin forumda iştirak etmiş redaktor müavini Məhəmməd Sələmədir.

M.Sələmə yazır ki, 70 ölkədən çoxsaylı qonaqların, eləcə də Nobel mükafatı laureatlarının, sabiq prezidentlərin iştirak etdikləri forumun açılışında Prezident İlham Əliyev nitq söyləyərək qloballaşma dövründə dünyada insan haqlarının qorunmasına, beynəlxalq əməkdaşlıq məsələlərinə, müxtəlif mədəniyyətlərə mənsub olan xalqlar arasında dialoqa lazımi diqqət göstərilməsinin, sülh və tolerantlıq dəyərlərinin yayılmasında yaxından iştirak etməyin vacibliyini vurğulamışdır. Müəllif əlavə edir ki, Prezident İlham Əliyev həmçinin Azərbaycan torpaqlarının 20 faizinin Ermənistan tərəfindən işğal olunduğunu, bir milyondan çox qaçqın və məcburi köçkünün doğma yurdlarından ayrı düşdüyünü, BMT Təhlükəsizlik Şurasının münaqişə ilə bağlı qəbul etdiyi dörd qətnaməyə Ermənistanın məhəl qoymadığını qonaqların diqqətinə çatdırmışdır.

Məqalədə İSESCO-nun baş direktoru Əbdüləziz bin Osman əl-Tuveycrinin forumun açılışındakı çıxışına da yer verilmişdir. Müəllif yazır ki, ISESCO-nun baş direktoru Prezident İlham Əliyevin istər regional, istərsə də beynəlxalq səviyyədə sülhün təşviqinə böyük önəm verdiyini, tolerantlığın və dialoqun inkişafı istiqamətində mühüm səylər göstərdiyini vurğulamış, beynəlxalq təşkilatların Dağlıq Qarabağ münaqişəsi ilə bağlı qəbul etdiyi qərar və qətnamələrə rəsmi Yerevanın hörmət etməməsindən təəssüfləndiyini bildirmişdir.

Məqalədə zorakılıq, təcridolunma, ekstremizm, islamofobiya kimi dünyanı narahat edən problemlərin kökündə duran məsələləri araşdırmaqda, insan haqlarının qorunmasında, dözümlülük və dialoqun təşviqində Humanitar Forumun xüsusi önəm daşıdığı vurğulanmışdır.

***

Misirin məşhur "Dostorasly" internet portalında III Bakı Beynəlxalq Humanitar Forumu haqqında məqalə yerləşdirilmişdir.

Forumda iştirak edən jurnalist Məhəmməd Ramahın müəllifi olduğu məqalədə tədbirin siyasi, iqtisadi, humanitar, media və texnologiya sahələrində mövcud problemlərin müzakirəsi və həlli baxımından böyük əhəmiyyət daşıdığı qeyd edilir.

M.Ramah yazır ki, forumda dünyanın müxtəlif ölkələrindən çoxsaylı nümayəndələr iştirak etmişdir. Onlar arasında nüfuzlu ictimai-siyasi xadimlər, sabiq dövlət başçıları, Nobel mükafatı laureatları və digər şəxslər olmuşdur. Forumda "Texnologiyaların konvergensiyası və gələcəyin konturları: XXI əsrin əsas çağırışları", "İqtisadi inkişafın humanitar aspektləri", "Elmi innovasiyalar və onların təhsil mühitinə transferi", "Multikulturalizm və özgünlük: cəmiyyətdə dəyər konsensusu axtarışında", "Postmodern dövründə milli özünüdərk", "Davamlı inkişaf və ekoloji sivilizasiya", "Molekulyar biologiya və biotexnologiyanın nailiyyətləri: nəzəriyyədən təcrübəyə", "Qloballaşan informasiya məkanında medianın aktual məsələləri" mövzularında "dəyirmi masa"lar keçirilmiş, səmərəli diskussiyalar aparılmışdır.

***

Misirin nüfuzlu "Əl-Əhram" qəzetinin saytında III Bakı Beynəlxalq Humanitar Forumu ilə bağlı məqalə yerləşdirilmişdir. Forumda iştirak etmiş jurnalist Mahmud Nubinin müəllifi olduğu məqalədə bildirilir ki, müasir dövrümüz üçün aktuallıq kəsb edən bir çox məsələlərin müzakirə edildiyi bu tədbirdə Nobel mükafatı laureatları, sabiq prezidentlər, tanınmış ictimai-siyasi, elm, mədəniyyət xadimləri iştirak etmişlər.

Müəllif forumun XXI əsrin qlobal problemləri, cəmiyyətin inkişafında texnologiyanın rolu, sosial-iqtisadi durumun yaxşılaşdırılması, elm və təhsilin daim diqqət mərkəzində olması, qloballaşma dövründə medianın aparıcı rol oynaması və s. vacib məsələləri əhatə etdiyini, dünya xalqlarının siyasi, iqtisadi, humanitar sahələrdə üzləşdikləri problemlərin və onların həlli yollarının müzakirə olunduğunu vurğulamışdır.

***

"Hürriyet" qəzeti Türkiyənin 9-cu Prezidenti Süleyman Dəmirələ Azərbaycanın "Şərəf" ordeni verilməsindən yazmışdır.

Türkiyənin nüfuzlu "Hürriyet" qəzeti Prezident İlham Əliyevin Sərəncamı ilə qardaş ölkənin 9-cu Prezidenti Süleyman Dəmirəlin "Şərəf" ordeni ilə təltif olunmasından yazmışdır.

"89 Nişanı" başlıqlı məqalədə Azərbaycan Prezidenti İlham Əliyevin "Şərəf" ordenini Süleyman Dəmirələ təqdim etməsi, dövlətimizin başçısının iki qardaş ölkə arasında əlaqələrin inkişafında Türkiyənin 9-cu Prezidentinin xidmətlərini qeyd etməsi yazılmışdır.

S.Dəmirəlin də Azərbaycan Prezidentinə dərin təşəkkürünü ifadə etdiyi vurğulanan məqalədə qeyd olunur ki, Türkiyənin keçmiş Prezidenti Azərbaycanın ümummilli lideri, yaxın dostu Heydər Əliyevin Fəxri xiyabandakı məzarını da ziyarət etmişdir. Ulu öndərin ruhuna dualar oxuyan S.Dəmirəl xatirəsini əziz tutduğu dostu və qardaşının dövlətçilik əmanətinin etibarlı əllərdə olduğunu söyləmişdir.

Azərbaycan.-2013.- 5 noyabr.- S. 6.