Elnur ASLANOV: «Dünyanın gələcək

humanitar fəaliyyət xəritəsi Azərbaycanda cızılır»

Artıq dünyada multikulturalizm sahəsində ən optimal

model kimi Azərbaycan nümunəsi öyrənilir

"Bakıda keçirilən Üçüncü Beynəlxalq Humanitar Forumu dünyanın gələcək humanitar fəaliyyət xəritəsinin Azərbaycanda cızılması deməkdir". Bunu Prezident Administrasiyasının Siyasi təhlil və informasiya təminatı şöbəsinin müdiri Elnur ASLANOV söyləyib.

Prezident Administrasiyasının rəsmisinin sözlərinə görə, forum çərçivəsində müzakirəyə çıxarılan bütün istiqamətlər bəşəri aktuallıq kəsb etməklə Bakı prosesinə növbəti təkandır: "Artıq dünyada multikulturalizm sahəsində ən optimal model kimi- Azərbaycan nümunəsi öyrənilir. Bura bütün dinlərin, mədəniyyətlərin, fərqli baxışların bir ailə kimi yaşadığı tolerantlıq məkanıdır. Biz haqlı olaraq öz ölkəmizlə fəxr edirik".

Şöbə müdiri söyləyib ki, Azərbaycanın sürətli iqtisadi inkişafı, sosial dövlət kimi mövqeyini gücləndirməsi, qlobal müstəvidə siyasi çəkisini getdikcə artırması "multikulturalizmin gələcəyi yoxdur" deyənlərə ən yaxşı cavabdır: "Biz gələcəyin konturlarını cızarkən hər şeydən əvvəl, insan amilini ön plana çıxarırıq. Cənab Prezident İlham Əliyevin yürütdüyü uğurlu siyasətin mərkəzində Azərbaycan vətəndaşı dayanır.

Biz istəyirik ki, insanlar sülh, əmin-amanlıq, firavanlıq şəraitində yaşasınlar. Üçüncü Bakı Beynəlxalq Humanitar Forumu həm də Ermənistan-Azərbaycan, Dağlıq Qarabağ münaqişəsi nəticəsində humanitar fəlakətlə üzləşən Azərbaycanın dünyaya bu mesajını ifadə edir. Təəssüflər olsun ki, Ermənistan rəhbərliyinin siyasi korluğu bu problemin həllində ən böyük maneə kimi qarşıya çıxır. Bu münaqişə Azərbaycanın ümumi inkişafına ciddi zərbə vurmaqla yanaşı, bütün bölgəni təhdid altında saxlayır. Biz bu vəziyyətlə barışmaq fikrində deyilik".

E.Aslanov əlavə edib ki, 70-dən çox ölkədən 800-ə yaxın rəsmi şəxsin, tanınmış elm, mədəniyyət xadiminin, Nobel mükafatı laureatlarının iştirakı ilə keçirilən Üçüncü Bakı Beynəlxalq Humanitar Forumu narahatedici bütün məsələlərin müzakirəsi üçün unikal tribuna, platformadır.

Azərbaycan.-2013.- 6 noyabr.- S.2.