Dünənə ehtiram, bu günə inam, sabaha ümidlə

Azərbaycanın gələcək müqəddəratı baxımından son dərəcə mürəkkəb və taleyüklü bir siyasi prosesə yekun vuruldu: mütləq çoxluğun iradəsinə əsaslanan azad, ədalətli, şəffaf və demokratik seçkilərdə layiqli qələbə qazanan cənab İlham Əliyev xalqa və dövlətə sədaqət andı içərək növbəti beş il üçün ölkəyə rəhbərlik missiyasını üzərinə götürdü. Dövlətimizin hərtərəfli inkişafında keyfiyyətcə yeni mərhələnin əsasını qoymuş bu seçkilər xalqın sabitlik, tərəqqi və intibah kursuna dərin etimadını növbəti dəfə təsdiqlədi. Siyasi təfəkkürü kifayət qədər yetkinləşmiş Azərbaycan vətəndaşları sabitlik, tərəqqi və intibaha xidmət edən mövcud siyasi kursu dəstəklədiklərini bir daha nümayiş etdirdilər.

Xalqın mənafeyi ön plandadır...

Böyük əksəriyyət müdrik seçim edərək xalq üçün çalışan, dövlətin hərtərəfli inkişafını təmin edən, gələcək nailiyyətlərinə etibarlı zəmin hazırlayan komandaya, konkret, əməli siyasətə səs vermişdir. Ötən dövrdə respublikamızın inanılmaz sosial, iqtisadi, siyasi, diplomatik və s. uğurları, habelə əvvəlki illərdə əsası qoyulmuş qlobal layihələrin davam etdirilməsi zərurəti ictimai rəyin düzgün və birmənalı seçiminə təsir etmiş, səsvermədə iştirak edənlərin 84,54 faizi özünü tam təsdiqləmiş komandanın zəfərini dəstəkləmişdir. Son seçkilərdə ölkə vətəndaşları, ilk növbədə xalqının və dövlətinin gələcəyini düşünərək davamlı sabitliyin və sürətli inkişafın təminatçısı olan Prezident İlham Əliyevə etimad göstərmişdirlər.

Cənab İlham Əliyevin prezident seçkilərində qazandığı parlaq qələbənin bir mühüm səbəbi də var: dövlət başçısı son 10 ildə insan və şəxsiyyət amilini ucaltmaqla, hər bir vətəndaşın maraqlarının dövlət üçün üstün olduğunu nümayiş etdirmişdir. Oktyabrın 19-da xalqa və dövlətə sədaqət andı içən Prezident İlham Əliyev dərin məzmunlu nitqində bu siyasətin qarşıdakı 5 ildə də davam etdiriləcəyini vurğulamışdır: "Son on ilin təcrübəsi onu göstərir ki, "xalq", "millət" anlayışları ön planda olanda istənilən problem öz həllini tapa bilər. Bizim siyasətimiz milli maraqlar üzərində qurulub. Bizim siyasətimiz müstəqilliyin möhkəmlənməsinə istiqamətləndirilibdir. Bu gün Azərbaycan müstəqil dövlət kimi dünya miqyasında özünə layiq yerini tuta bilibdir. Azərbaycan daha da güclü ölkə olmalıdır. Biz qüdrətli Azərbaycan dövləti qururuq və əminəm ki, quracağıq".

Vətəndaşa layiqli xidmət örnəyi

Son 10 ildə dövlət idarəçiliyinə yeni ruh və müasirlik çalarları gətirmiş İlham Əliyev hökumətin mütəmadi olaraq xalq qarşısında hesabat verməsini sosal-iqtisadi sahədə qazanılan nailiyyətlərin başlıca təminatı hesab etmiş, eyni zamanda mövcud nöqsanlar, çatışmazlıqlar ətrafında obyektiv müzakirələrin açılması yolu ilə onların tez bir zamanda aradan qaldırılmasına çalışmışdır. Hökumətin hər rüb üzrə hesabatlarının açıqlanması Azərbaycanda dövlət idarəçiliyinin səmərəliliyi ilə yanaşı, şəffaflığına, hesabatlığa dəlalət edir. İctimaiyyətin böyük maraqla qarşıladığı bu toplantılar, eyni zamanda ölkəmizin qısa müddətdə qazandığı böyük uğurlara, möhtəşəm nailiyyətlərə işıq salır. İqtisadi sahədə əldə edilən uğurlar özünü quru və çansıxıcı rəqəmlərdə deyil, vətəndaşların gündəlik həyatında, məişətində, yaşayış tərzində əksini tapır. Bir daha təsdiqlənir ki, möhtərəm Prezident İlham Əliyev çoxşaxəli fəaliyyəti ilə xalqın xoş gününün, səadətinin təminatçısı, firavanlığının səbəbkarıdır.

"Mən hər bir azərbaycanlının Prezidenti olacağam" - deyən cənab İlham Əliyev son 10 illik fəaliyyətində bu vədinə sadiqliyini dəfələrlə əməli işi ilə sübuta yetirmişdir. Xalqın firavanlığına, yüksək sosial rifahına çalışan dövlət rəhbəri ən çətin və qayğılı günlərdə də vətəndaşlara diqqət və qayğısını, köməyini, mənəvi dəstəyini əsirgəməmişdir. Cənab İlham Əliyevin xaraktercə sadə və səmimi, praktik siyasətçi olması onun sıravi vətəndaşlarla təmaslarında bir daha üzə çıxmışdır. Dövlət başçısı bütün müdrik rəhbərlərə xas qabiliyyətlə hər kəslə dil tapmağa, dövlət məmurları ilə sadə vətəndaşlar arasındakı psixoloji səddi aradan götürməyə nail olmuşdur. Bütün bunlar dövlət rəhbərinə xalqın böyük rəğbətini, inamını qazandırmış, iri layihələri qısa zamanda gerçəkləşdirmək imkanı yaratmışdır. Ulu öndər Heydər Əliyevin həyata keçməmiş arzularını praktik şəkildə reallaşdırmaqla xalqa rəhbərlik missiyasının öhdəsindən layiqincə gəlmişdir.

Ekstremal vəziyyətlərə çevik reaksiya

Siyasi liderliyi şərtləndirən mühüm meyarlardan biri də ekstremal situasiyalara hazır olmaq və yaranmış çətinliklərdən optimal çıxış yolları tapmaqdır. Əsl siyasi lider dövlət və cəmiyyət həyatı üçün istənilən təhlükə meyillərinə qarşı qətiyyətli mövqe tutur, mövcud şəraitə adekvat tədbirlər həyata keçirməklə yanaşı, ən çətin anlarda xalqının önündə olur. Bütün bunlar da hər bir dövlət rəhbərindən siyasi peşəkarlıq, erudisiya, uzaqgörənlik, praqmatizm, qətiyyətlilik, ən başlıcası, xalqına bağlılıq kimi mühüm keyfiyyətlər tələb edir.

Hələ 2003-cü ilin prezident, 2005-ci ilin parlament seçkilərindən sonra ölkə başçısının xalqın dəstəyi ilə nümayiş etdirdiyi yüksək siyasi sayıqlıq, iradə və qətiyyət Azərbaycanda ictimai-siyasi sabitliyi pozmaq, cəmiyyətdə qarşıdurma yaratmaq istəyən qüvvələrin çirkin niyyətlərini puça çıxarmışdır. Cənab İlham Əliyev eynilə ulu öndər Heydər Əliyev kimi ən çətin, təbəddülatlı vəziyyətlərdə yüksək iradə və prinsipiallıq nümayiş etdirərək dövlətçiliyə yönəlmiş qəsdləri qətiyyətlə zərərsizləşdirərək, eyni zamanda liberal dəyərlərə, demokratik prinsiplərə, insan hüquq və azadlıqlarına sadiqliyini hər zaman qoruyub saxlamışdır.

Dövlət başçısı İlham Əliyevin ötən illərdə ölkədə siyasi barışığın, vətəndaş həmrəyliyinin və sülhün təmin olunması, əksqütblü qüvvələr arasında etimad mühitinin formalaşdırılması istiqamətində atdığı addımlar onun ədalətli rəhbər obrazını şərtləndirən amillər sırasında xüsusi vurğulana bilər. Ölkədə kadr siyasəti və dövlət idarəçiliyi məsələlərində Azərbaycanın bütün vətəndaşlarının iştirakının təmin edilməsi, müxalifətin sağlam, konstruktiv dialoqa dəvət olunması, əldə edilən iqtisadi nailiyyətlərdən hamının öz bacarıq, zəhmət və əqli imkanlarına görə bəhrələnməsi Prezident İlham Əliyevin milli birliyin möhkəmləndirilməsi istiqamətində atdığı addımlardandır.

Prezident İlham Əliyevin son 10 ildə apardığı kadr dəyişiklikləri, məmurlara, dövlət rəsmilərinə fəaliyyətlərini məhz vətəndaşların mənafelərinin müdafiəsi, onların problemlərinin həlli istiqamətində qurmaları barədə qəti tapşırıqlar verməsi ictimai fikirdə demokratik inkişafa xidmət edən islahatların uğurla gedəcəyinə böyük inam yaratmışdır. Dövlət başçısı idarəçiliyin təkmilləşdirilməsi prosesini daim diqqət mərkəzində saxlamaqla, cəmiyyətin inkişaf qanunauyğunluqlarından irəli gələrək yeni, çevik və işlək strukturların, dövlət komitələrinin, nazirliklərin yaradılmasını vacib sayır. Nazirlər Kabinetinin bir müddət əvvəl təsdiqlənmiş yeni tərkibi fonunda bunu bir daha əminliklə söyləmək mümkündür.

İnsan amilinə həssas münasibət

Prezident İlham Əliyevin fəaliyyətində diqqəti çəkən üstün məqamlardan biri də onun ölkədə baş vermiş istənilən ekstremal vəziyyətdə operativ və düzgün qərarlar qəbul etməsi, bu zaman vətəndaşların mənafeyini ön plana çəkməsidir: "Bizi xalq seçib, bizim də vəzifəmiz odur ki, xalqın etimadını öz fəaliyyətimizlə doğruldaq" - deyən cənab İlham Əliyev hər hansı fövqəladə vəziyyət zamanı hökumət üzvlərini dərhal monolit komanda kimi səfərbərliyə alır, lazımi tapşırıqlar, göstərişlər verir. Eyni zamanda həyata keçirilməli işlərlə bağlı dəyərli təklif və tövsiyələrini açıqlayır.

Dövlət rəhbəri komandasında təmsil olunan şəxslərlə səmimi və qarşılıqlı hörmətə, məsuliyyətə əsaslanan rəftarın tərəfdarıdır. Amma bütün bunlar yeri gəldikcə İlham Əliyevin yetərincə prinsipial qərarlarını, qəti addımlarını da istisna etmir. Dövlət başçısı hökumətin fəaliyyətini son 10 ildə özünəməxsus tələbkarlıqla saat mexanizmi kimi təkmilləşdirmiş, cilalamışdır. İdarəçilik sistemində özünü göstərən cüzi qüsurların belə aradan qaldırılması üçün ardıcıl kadr və struktur islahatları həyata keçirmiş, xalqa layiqli xidmət məramını irəli çəkdiyi kadrlar qarşısında ümdə vəzifə kimi aktuallaşdırmışdır. "Xalqa doğru - haqqa doğru" prinsipinə əsaslanan bu siyasət vətəndaşların dövlət rəhbərinə olan sevgisini, rəğbətini, inamını artırmışdır.

Ölkə vətəndaşları çətin anlarda ilk dəstəyi həmişə inanaraq etimad göstərdikləri liderdən almışlar. Prezident İlham Əliyev hələ səlahiyyətlərinin icrasına başladığı ilk aylarda - 2004-cü ilin yanvarında Lənkəran şəhərində yaşayış binasının uçmasına çevik reaksiya göstərmiş, dərhal hadisə yerinə getmiş, zərərçəkənlərə maddi yardım ayrılması üçün tapşırıqlar vermişdir. Eyni zamanda qayğısı və insanpərvərliyi ilə dövlət məmurlarına əsl nümunə, örnək göstərmişdir.

Əslində, son 10 ildə bu cür faktların yetərincə şahidi olmuşuq: məsələn, İlham Əliyev 2005-ci ilin iyun ayında "Bakı Soveti" metrostansiyasının eskalatorundakı nasazlıq üzündən ciddi xəsarət almış vətəndaşlara, eləcə də həmin ilin dekabrında təyyarə qəzasında həlak olanların yaxınlarına zəruri yardımlar edilməsi barədə də tapşırıqlar vermişdir.

2007-ci il avqustun 29-da Bakının Yasamal rayonu ərazisində hündürmərtəbəli binanın uçmasına göstərilən çevik reaksiyanı da xüsusi qeyd etmək lazımdır. Prezident İlham Əliyev dərhal hadisə yerində olaraq uçqunun altında qalmış insanların xilas edilməsi, hadisənin səbəblərinin tam araşdırılaraq lazımi ölçülərin götürülməsi üçün xüsusi hökumət komissiyası yaratmışdır.

Kürətrafı ərazilərin su altında qalması zəminində yaranmış fövqəladə vəziyyətlə bağlı 2010-cu il mayın 7-də İlham Əliyevin sədrliyi ilə keçirilmiş müşavirə dövlət başçısının ölkə vətəndaşlarının problemlərinə böyük həssaslıqla yanaşmasının təzahürüdür. Zaqatalada zəlzələdən zəzərçəkmiş insanlar üçün yeni fərdi evlərin inşası, Misirdəki gərgin vəziyyətlə bağlı orada yaşayan azərbaycanlıların xüsusi təyyarə ilə təxliyə olunması, Azərbaycan zabiti Ramil Səfərovun Macarıstandan ekstradisiya olunaraq dərhal əfv edilməsi, habelə son vaxtlar Rusiyadakı soydaşlarımızın problemlərinin həlli üçün qətiyyətli addımların atılması və sadalamadığımız digər faktlar İlham Əliyevin fəaliyyətində insan və vətəndaş amilinin daim ön planda dayandığını göstərir.

Davamlı inkişaf - sosial rifah!

Prezident İlham Əliyev son 10 ildə hər bir vətəndaşın layiqli həyat tərzinin təmin olunmasını, insanları narahat edən problemlərin aradan qaldırılmasını hökumət qarşısında ciddi vəzifələrdən biri kimi müəyyənləşdirmişdir. Müstəqil Azərbaycanın bu müddətdə əldə etdiyi böyük makroiqtisadi uğurlar, ilk növbədə sistemli və ardıcıl şəkildə gerçəkləşdirilən islahatların nəticəsidir. Hazırda ən müxtəlif iqtisadi mərkəzlər respublikanın davamlı iqtisadi yüksəlişi timsalında XXI əsrin yeni iqtisadi fenomenini görür, "İnkişafın Azərbaycan modeli"nin mahiyyətini öyrənməyə çalışırlar.

Praqmatik liderlik keyfiyyətlərinə malik ölkə başçısı keyfiyyətcə yeni mərhələdə Azərbaycanın müasir dövlətə çevrilməsini və tam müstəqil siyasət yürütməsini milli ideyanın başlıca hədəfi kimi müəyyənləşdirmişdir. İqtisadi məsələlərə xüsusi diqqətin ayrılması da əsaslı yanaşma olaraq dövlət müstəqilliyinin iqtisadi bazisini möhkəmlətmək, cəmiyyətin davamlı inkişafı üçün zəmin hazırlamaq məqsədindən irəli gəlmişdir. Nəticədə respublikada milli ideya səviyyəli məqsəd kimi nəzərdən keçirilən daha bir məsələ də müsbət həllini tapmış, Azərbaycan iqtisadi sahədə keçid dövrünü uğurla başa vuraraq iqtisadi və sosiomədəni modernləşmənin keyfiyyətcə yeni mərhələsinə qədəm qoymuşdur.

Dövlətimizin rəhbərinin oktyabrın 19-da keçirilmiş andiçmə mərasimində son 10 ildə Azərbaycan qədər sürətlə inkişaf edən ikinci bir ölkənin olmadığını vurğulamışdır: "On ildə Azərbaycan iqtisadiyyatı 3,4 dəfə artmışdır. Əgər ilk illərdə bu artım daha çox neft amili sayəsində olmuşdusa, hazırda qeyri-neft sektorunun inkişafı bu artımı təmin edir və gələcəkdə də təmin edəcəkdir. Son on il ərzində Azərbaycanda 1 milyon 200 min yeni iş yeri açılmışdır ki, onlardan 900 mini daimi iş yeridir. İşsizlik kimi ciddi problemin böyük hissəsi demək olar ki, həllini tapmışdır. İşsizliyin səviyyəsi təxminən 5 faiz civarındadır. Ancaq elə etməliyik ki, biz növbəti illərdə işsizliyi tamamilə aradan götürək. İki regional beşillik proqram icra edilmişdir. Bölgələr abadlaşdı, canlandı. Bölgələrdə infrastruktur yaradıldı və regional proqramların icrası nəticəsində bölgələrlə paytaxt arasında fərq azaldı. Son on il ərzində ölkə iqtisadiyyatına 150 milyard dollar sərmayə qoyulmuşdur və bu sərmayənin təxminən yarısı xarici sərmayədir".

2003-2013-cü illərdə əldə olunan iqtisadi inkişaf sosial problemlərin həlli istiqamətində qətiyyətli addımların atılmasına imkan yaratmış, yoxsulluğun səviyyəsi 44,7 faizdən 5,5 faizə düşmüşdür. Azərbaycanda güclü və ciddi iqtisadi islahatlar düşünülmüş sosial siyasətlə tamamlanır, bu məqsədlə dövlət büdcəsindən böyük vəsaitlər ayrılır. Son 10 il ərzində orta maaş 5,6 dəfə, orta pensiya 9,2 dəfə artmış, sosial infrastrukturun yaradılması üçün böyük vəsait səfərbər edilmişdir. Ötən illərdə Azərbaycanda 2700 məktəb, 500-ə yaxın xəstəxana, 35 olimpiya mərkəzi tikilmiş, tarixi abidələrimiz bərpa edilmişdir.

İlham Əliyevin son on ildə ən böyük uğurlarından biri də Azərbaycan kəndinə şəhər simasının gətirilməsi olmuş, cənubdan şimala, şərqdən qərbə çoxsaylı yaşayış məntəqələrində yeni sosial-mədəni obyektlər - ən müasir tələblərə cavab verən yeni məktəblər, səhiyyə ocaqları, körpülər, yollar tikilmişdir. Hətta sovet dövründə də mavi yanacaq üzü görməyən Yardımlıya, Lerikə qaz çəkilmiş, Qubanın ucqar dağ kəndi Xınalığa yol çəkilmiş, daha bir fantastik layihənin - strateji əhəmiyyətli Quba-Şamaxı yolunun inşasına start verilmişdir. Bütün bunlar regionlarda mənəvi ab-havanın yaxşılaşmasına səbəb olmaqla, Azərbaycan insanının dövlətə, onun rəhbərinə etimadını, sevgisini və rəğbətini daha da artırır.

Qadın hüquqlarının müdafiəçisi

Azərbaycanda insan amilinin yüksəlişinə xidmət edən siyasətin mühüm tərkib hissəsi olaraq son 10 ildə qadınların cəmiyyətdə öz layiqli yerini tapmalarına, ictimai həyatın bütün sahələrində təmsil olunmalarına lazımi şərait yaradılmışdır. Bu da təsadüfi deyildir - xalqımız tarixən özünəməxsus dəyərlərə, adət-ənənələrə bağlı olan yüksək zəkalı, nəcib və xeyirxah xanımları ilə qürur duymuş, ana adını uca tutmuş, qadına dərin hörmət və ehtiramla yanaşmışdır.

Ölkədə uğurla həyata keçirilən gender siyasəti fonunda ölkə qadınları üzərlərinə düşən vəzifələrin öhdəsindən layiqincə gəlir, cəmiyyətin ictimai-siyasi həyatında yaxından iştirak edirlər. Ölkədə gender siyasətinin tələblərinə uyğun olaraq qadınlarla kişilərin hüquq bərabərliyi təmin olunmuş, dövlət strukturlarında qadınların rolunun artırılması istiqamətində ciddi addımlar atılmışdır. Hazırda ölkədə 100-ə yaxın qeyri-hökumət qadın təşkilatı fəaliyyət göstərir. Ölkə rəhbərliyinin vətəndaş cəmiyyətinin inkişafına hərtərəfli dəstək verməsi qeyri-hökumət təşkilatları şəbəkəsinin genişlənməsi üçün etibarlı zəmin formalaşdırır.

Azərbaycan Respublikası Prezidentinin 2006-cı il 6 fevral tarixli Sərəncamı gender sahəsində vahid dövlət siyasətini həyata keçirən komitənin adı dəyişdirilmiş, Ailə, Qadın və Uşaq Problemləri üzrə Dövlət Komitəsi kimi yenidən formalaşdırılmışdır. Bu təşkilatın Cənubi Qafqazda gender sahəsində fəaliyyət göstərən yeganə dövlət strukturu olduğu da xüsusi qeyd olunmalıdır. Milli Məclisdə qəbul olunmuş "Gender (kişi və qadınların) bərabərliyinin təminatları haqqında", habelə "Məişət zorakılığı haqqında" qanunlar respublikamızda qadınların hüquqlarının etibarlı müdafiəsi baxımından mühüm əhəmiyyətə malikdir.

Ümumilikdə, Yeni Azərbaycan Partiyasının fəal iştirakı ilə son illərdə ölkədə qadınların ictimai-siyasi fəallığı artmış, dövlət idarəçiliyi sistemində onların iştirakı təmin edilmişdir. Müxtəlif nazirliklər və icra hakimiyyəti orqanlarında qadınların hüquqlarının müdafiəsi ilə məşğul olan cavabdeh şəxslər təyin edilmişdir. Qürurla deyə bilərik ki, 2010-cu ildə keçirilmiş parlament seçkilərinin nəticələrinə görə, YAP-ı Milli Məclisdə təmsil edən xanım deputatların sayı 7 nəfərdən 15 nəfərə yüksəlmişdir.

YAP-ın ilbəil güclənməsi, sıralarını artırması onun tərkibində qadınların rolunu da gücləndirir. Hakim partiyanın üzvü olan qadınlar idarəetmə orqanlarında, elm, təhsil, mədəniyyət müəssisələrində öncül sıralarda təmsil olunur, ölkəmizin inkişafına layiqli töhfələrini verirlər. Hazırda partiya üzvlərinin təxminən 47 faizini qadınlar təşkil edir. Bu baxımdan YAP Qadınlar Şurasının partiya fəaliyyətinin uğurla həyata keçirilməsində özünəməxsus yeri və rolu var. YAP Qadınlar Şurası son seçki kampaniyasının uğurla aparılmasında və partiya həyatı ilə bağlı digər tədbirlərdə daim yüksək fəallıq göstərmişdir. Qadınlar Şurasının keçirdiyi müxtəlif tədbirlər YAP rəhbərliyi tərəfindən də daim dəstəklənir, lazımi qiymətini alır.

Yeni Azərbaycan Partiyasının V qurultayında Siyasi Şuranın və Qadınlar Şurasının üzvü Mehriban xanım Əliyevanın partiyanın sədr müavini seçilməsi bizim üçün son dərəcə əlamətdar hadisə olmuşdur. Düşünürəm ki, bu seçim təkcə partiyamızın çoxminlik üzvlərinin deyil, ümumilikdə, Azərbaycan cəmiyyətinin Mehriban Əliyeva fenomeninə sonsuz rəğbət və hörmətinin əyani təcəssümüdür. YAP Qadınlar Şurasının partiya fəaliyyətinin uğurla həyata keçirilməsində Mehriban Əliyevanın özünəməxsus yeri və rolunu qeyd etmək istərdim. Azərbaycanın birinci xanımı partiya həyatı ilə bağlı bu və digər tədbirlərdə daim yüksək fəallıq göstərmiş, bu fəaliyyəti qadınlarımız tərəfindən rəğbətlə qarşılanmışdır. Mehriban Əliyevanın YAP sədrinin müavini seçilməsi isə partiyamızın cəmiyyətdəki nüfuzunu daha da yüksəltmiş, qadınların təşkilata sürətlə axınına yeni təkan vermişdir.

Əminliklə deyə bilərik ki, ölkədə həyata keçirilən sosial-iqtisadi siyasət qadınların ictimai-siyasi həyatda daha fəal iştirakını təmin edir, onların gələcəyə ümidlərini artırır. Cəmiyyətin əsas dayaqlarından, fəal sosial zümrələrindən sayılan qadınlar ölkəmizin uğurlarına ürəkdən sevinir, Prezident İlham Əliyevin rəhbərliyi altında daha böyük uğurlar qazanacağımıza ürəkdən inanırlar. Elə bu səmimi inamın təcəssümü olaraq 9 oktyabr prezident seçkilərində qadınlarımız yüksək fəallıq və vətəndaş təəssübkeşliyi nümayiş etdirdilər, xalqımızın, dövlətimizin, övladlarımızın gələcəyi naminə ən layiqli namizədə səs verdilər.

Mədəni müxtəliflik məkanı

Son vaxtlar Azərbaycanın iqtisadiyyatı və elmi-mədəni potensialı elə bir səviyyəyə çatmışdır ki, biz sadəcə olaraq Şərq və Qərb sivilizasiyası arasında körpü rolunu oynamırıq; biz bu sivilizasiyaların hər ikisinin daşıyıcısı olmaqla, multikulturalizm məkanına çevrilmişik. Müxtəlif xalqların, millətlərin, dinlərin xüsusiyyətlərinə tolerant münasibətin azərbaycanlıların mentalitetinə xas bir dəyər olduğunu nəzərə alsaq fərqli baxışlara, adətlərə, vərdişlərə dözümlülük mövqeyini özündə ehtiva edən multikulturalizmin Azərbaycan üçün xüsusi əhəmiyyətini dərk etmək çətin deyildir.

Azərbaycan son illərdə bu sahədə aparılan müzakirələrin sadəcə iştirakçısı qismində çıxış etmir, eyni zamanda bəşəriyyətin gələcək inkişafı naminə mədəniyyətlərarası, konfessiyalararası və sivilizasiyalararası dialoq üçün real imkan və mexanizmlərin müəyyən edilməsinə xidmət göstərən bu cür müzakirələrin təşəbbüskarı və təşkilatçısı missiyasını yerinə yetirir. 2011, 2012 və 2013-cü ilin oktyabrında paytaxtımızda keçirilmiş birinci, ikinci və üçüncü Bakı beynəlxalq humanitar forumları bunu bir daha təsdiqləyir.

Bu günlərdə keçirilmiş III Bakı Beynəlxalq Humanitar Forumunda dərin məzmunlu nitq söyləmiş Prezident İlham Əliyev multikulturalizmin əhəmiyyətini xüsusi önə çəkmişdir: "XXI əsrdə multikulturalizmə alternativ yoxdur. Əlbəttə ki, biz XXI əsrdə ayrı-seçkilik, diskriminasiya, ksenofobiya, islamafobiya kimi xoşagəlməz meyillərə biganə yanaşa bilmərik. Ona görə multimədəniyyətli cəmiyyətlərin formalaşması, bu ideyaların təbliği hesab edirəm ki, hər bir məsuliyyətli siyasətçinin, ictimai xadimin fəaliyyətinin tərkib hissəsi olmalıdır. Əfsuslar olsun, bəzi hallarda biz başqa fikirləri də eşidirik ki, multikulturalizmin gələcəyi yoxdur. Bəzi ölkələrdə bu məsələ ilə bağlı çox bədbin əhval-ruhiyyə hökm sürür. Hesab edirəm ki, biz dünyada müsbət təcrübə üzərində öz təhlilimizi aparmalıyıq və müsbət təcrübəni təbliğ etməliyik. Çünki dünyada multikulturalizmin bir çox ünvanları vardır. Dünyanın əksər ölkələrində çoxmillətli cəmiyyətlər mövcuddur və müxtəlif dinlərin, müxtəlif xalqların birgə yaşaması zəmanənin tələbidir".

Güclü insan kapitalının formalaşdırılması strateji hədəfdir

Dövlət başçısının rəhbərliyi altında son 10 ildə Azərbaycanda həyata keçirilən elm və təhsil islahatlarının başlıca qayəsi ölkədə güclü insan kapitalının formalaşdırılması, dünya təhsil sisteminə inteqrasiyanın təmin edilməsidir. Cənab İlham Əliyev xüsusi qeyd edir ki, respublikamızda "qara qızıl"ı "insan qızılı"na, insan kapitalına çevirməyin vaxtı gəlib çatmışdır. Bu çağırışın əsasında Azərbaycanda güclü intellektual bazanın, müasir biliklərə əsaslanan yeni tipli iqtisadi sistemin formalaşdırılması, elmtutumlu istehsal sahələrinin inkişafı yolu ilə milli iqtisadiyyatın neft amilindən asılılığının azaldılması ideyası dayanır.

Cənab İlham Əliyev dəfələrlə vurğulamışdır ki, iqtisadi resursların insan kapitalının inkişafına yönəldilməsi yolu ilə formalaşan yeni təfəkkürlü intellektual elita ölkənin perspektiv inkişafının əsas lokomotivi - aparıcı qüvvəsi kimi çıxış edəcəkdir. Prezident İlham Əliyev bu və digər ali məqsədləri sadəcə deklorativ bəyanatlarla ifadə etmir, onun konkret icra mexanizmlərinin müəyyənləşdirilməsi istiqamətində konkret addımlar atır. Ölkə başçısının 24 oktyabr 2013-cü il tarixli Fərmanı ilə təsdiq edilmiş "Azərbaycan Respublikasında təhsilin inkişafı üzrə Dövlət Strategiyası" bunu bir daha təsdiqləyir. Strategiyada təhsil sahəsində əldə olunan uğurlara toxunulmaqla yanaşı, qeyd olunur ki, sürətlə modernləşən Azərbaycanda təhsil sisteminin insan kapitalının inkişafı çağırışlarına cavab verməsi istiqamətində yeni addımların atılmasına və ümumi təhsilin keyfiyyət göstəricilərinin Avropa standartlarına uyğunlaşdırılmasına ehtiyac vardır.

Təhsilin keyfiyyətinin yaxşılaşdırılması üçün təhsili idarəetmə sisteminin yenidən qurulması, bu sahədə insan resurslarının inkişaf etdirilməsi və müəllim peşəsinin nüfuzunun artırılması zəruridir. "Azərbaycan Respublikasında təhsilin inkişafı üzrə Dövlət Strategiyası" da respublikada keyfiyyət nəticələri və əhatəliliyinə görə dünya ölkələri sırasında aparıcı mövqe tutan, səriştəli müəllim və təhsil menecerlərinə, qabaqcıl texnologiyalara əsaslanan infrastruktura malik təhsil sisteminin yaradılması üçün beş strateji istiqamətdə genişmiqyaslı tədbirlərin görülməsini nəzərdə tutur. Belə ki, strategiyada səriştəyə əsaslanan şəxsiyyətyönlü təhsil məzmununun yaradılması; təhsil sahəsində insan resurslarının müasirləşdirilməsi; təhsildə nəticələrə görə cavabdeh, şəffaf və səmərəli idarəetmə mexanizmlərinin yaradılması; müasir tələblərə uyğun təhsil infrastrukturunun yaradılması; iqtisadi cəhətdən dayanıqlı və dünyanın aparıcı təhsil sistemlərinin standartları ilə eyni səviyyəyə uyğun təhsil sisteminin maliyyələşdirilməsi modelinin qurulması kimi 5 strateji istiqamət önə çəkilmişdir:

- ölkənin modernləşməsi üçün zəruri olan insan kapitalını inkişaf etdirmək və bununla Azərbaycan Respublikasının beynəlxalq rəqabət qabiliyyətini yüksəltmək;

- məsuliyyətini dərk edən, demokratiya prinsiplərinə və xalqının milli ənənələrinə, insan hüquq və azadlıqlarına hörmət edən, azərbaycançılıq ideyalarına sadiq olan, müstəqil və yaradıcı düşünən vətəndaş və şəxsiyyət yetişdirmək;

- milli mənəvi və ümumbəşəri dəyərləri qoruyan və inkişaf etdirən, geniş dünyagörüşünə malik olan, təşəbbüsləri və yenilikləri qiymətləndirməyi bacaran, nəzəri və praktiki biliklərə yiyələnən, müasir təfəkkürlü və rəqabət qabiliyyətli kadrlar hazırlamaq;

- sistemləşdirilmiş bilik, bacarıq və vərdişlərin mənimsənilməsini və əlavə təhsili təmin etmək, təhsilalanları ictimai həyata və səmərəli əmək fəaliyyətinə hazırlamaq.

Belə bir strategiyanın imzalanması həm də "Azərbaycan 2020: gələcəyə baxış" İnkişaf Konsepsiyasında nəzərdə tutulmuş hədəflərin gerçəkləşdirilməsi baxımından vacib əhəmiyyətə malikdir. Azərbaycanın gələcək inkişafının məhz innovasiya yönümlü iqtisadiyyat hesabına təmini nəzərdə tutulur. Bu baxımdan təhsil, elm və texnologiyalar sferasında modernləşmə prosesinin genişləndirilməsi də qarşıda ciddi vəzifə kimi dayanır.

Təhsilin inkişafı, yeniləşməsi və daha aydın hədəflərinin müəyyənləşməsi, bu hədəflərə çatmaq istiqamətində səylərin gücləndirilməsi bütövlükdə Azərbaycanın inkişafının fundamental əsaslarını təşkil edir. 2020-ci ilədək 12 illik təhsil sisteminə keçidin təmini, orta ümumtəhsil məktəblərinin hər bir sinfində 1 noutbuk və 1 proyektorun quraşdırılması, hər şagirdə 1 netbuk və ya planşet verilməsi, "Elektron məktəb" layihəsinə qoşulan təhsil ocaqlarının sayının 1000-ə çatdırılması və s. məsələlər nəzərdə tutulmuşdur.

Elm və təhsil, ilk növbədə, gələcəyə açılan qapılar deməkdir. Bu reallıq nəzərə alınmaqla qəbul edilmiş Təhsil Strategiyası Azərbaycanda uşaq və yeniyetmələrin, gənclərin intellektual yüksəlişinə, cəmiyyət üçün layiqli şəxsiyyət kimi yetişməsinə, yaradıcı potensialının, bilik və bacarıqlarının üzə çıxarılmasına hesablanmış əlahiddə əhəmiyyətli sənəddir. Belə bir strategiyanın qəbulu ölkə rəhbərinin Azərbaycanın sabahına biganə olmadığını, elm və təhsilin problemlərinin həllini davamlı inkişafın əsas şərti hesab etdiyini bir daha təsdiqləmişdir. Bu gün ölkədə həyata keçirilən elm və təhsil siyasətinin başlıca məqsədi modernləşmə mərhələsini də sürətlə başa vuraraq Azərbaycanı inkişaf etmiş ölkələr səviyyəsində yüksəltmək, demokratik idealların cəmiyyətdə tam möhkəmlənməsinə nail olmaq, yeni düşüncəli kamil vətəndaş yetişdirməkdir.

Sabaha böyük ümidlə...

Hər bir kəs taleyin onu əbədi məhkum etdiyi missiya ilə həm də ömür səhifələrini yazır. Görünür, müdriklərdən biri əbəs yerə deməmişdir: əgər bir insanın həyatını başlanğıcdan sonadək yazıya köçürməyi bacarsaydıq bu, hansısa xalqın tarixindən daha oxunaqlı olardı. Üzərinə götürdüyü missiya ilə xalqı, dövləti üçün faydalı olmağın məsuliyyətini başa düşənlərlə yanaşı, bunu alın yazısı, qəzavü-qədər kimi qəbul edərək özünün həyat amalına çevirənlər böyük şəxsiyyətlərdir. Həm də ona görə ki, tarixi proseslər bu şəxsiyyətləri ardınca apara bilmir, əksinə, onlar özləri dərk edilmiş məsuliyyətdən doğan cahanşümul fəaliyyətləri ilə yeni bir tarixin müəllifinə çevrilirlər.

Xalqı üçün məhz belə bir lider olan Prezident İlham Əliyev də qısa zamanda Azərbaycanın möhtəşəm nailiyyətlərə imza atmasını, dünyada sayılıb-seçilən, habelə öz sözü, müstəqil mövqeyi olan modern dövlətə çevrilməsini təmin etmişdir. 9 oktyabr seçkilərinin nəticələrinə əsasən həm də əminliklə demək olar ki, ölkəmiz etibarlı əllərdədir. Azərbaycan ölkə rəhbərliyinin yüksək və idarəçilik keyfiyyətləri sayəsində ildən-ilə inkişaf edir, strateji hədəflərə doğru inamla irəliləyir.

Bu siyasətin uğurlarını gündəlik həyatında hiss edən hər bir Azərbaycan insanı sabahına böyük inamla, ruh yüksəkliyi ilə baxır. Hamı ürəkdən inanır ki, Azərbaycan qarşıdakı illərdə daha da sürətlə qüdrətlənərək dünyanın ən inkişaf etmiş ölkələri sırasında layiqli yerini tutacaqdır.

Nurlana ƏLİYEVA,

YAP Qadınlar Şurasının sədri,

filologiya elmləri doktoru, professor

Azərbaycan.-2013.- 8 noyabr.- S.6.