Dəyişməz seçim

Prezident seçkiləri bütün sivil cəmiyyətlərdə olduğu kimi, Azərbaycanda da mühüm siyasi hadisə kimi xarakterizə olunur. Bu il oktyabrın 9-da keçirilən prezident seçkiləri mühüm siyasi hadisə olmaqla yanaşı, həm də Azərbaycan dövləti və xalqının demokratiya yolu ilə inamla irəlilədiyini bir daha bütün dünyaya nümayiş etdirdi. Bu seçki bütün parametrləri ilə Azərbaycanın siyasi tarixinə ən demokratik, ən şəffaf, ədalətli və azad seçkilər kimi düşdü. Azərbaycan xalqı özünün tarixi və ən doğru seçimini edərək cənab İlham Əliyevə səs verdi.

Azərbaycan xalqı ilk dəfə hələ 10 il əvvəl İlham Əliyevə səs verməklə Heydər Əliyev siyasi kursunun davamına, Azərbaycanın dünya birliyində özünə layiqli yer tutaraq söz sahibinə çevrilməsinə, Qafqazdakı lider rolunun möhkəmlənməsinə, enerji və nəqliyyat təhlükəsizliyinin davamlılığına, ərzaq təhlükəsizliyinin təmin olunmasına, güclü və müasir ordu quruculuğuna, ölkə vətəndaşlarının xoşbəxt və firavan yaşayışının etibarlı şəkildə təmin edilməsinə dəstək verdi. Prezident İlham Əliyev verdiyi bütün vədlərə sadiq qalaraq həm birinci, həm də ikinci prezidentliyi dövrlərində Azərbaycanı bütün sahələrdə inkişaf etdirdi və ötən 10 il tariximizin qızıl dövrü kimi yaddaşlara həkk olundu. Ötən 10 ilin sosial-iqtisadi göstəricilərinə nəzər salsaq görərik ki, bu müddətdə dövlət büdcəsinin həcmi 20 dəfəyədək artıb, strateji valyuta ehtiyatlarının həcmi 30 dəfə çoxalaraq 50 milyard dollara çatıb. Cənubi Qafqazda iqtisadiyyatın 80 faizi, strateji valyuta ehtiyatlarının isə 91 faizi respublikamızın payına düşür. Bunlardan başqa, MDB məkanında iqtisadiyyatda keçid dövrünü başa vuran ilk dövlət olan Azərbaycan həm də milli iqtisadiyyatın rəqabət qabiliyyəti göstəricilərinə görə 144 dövlət sırasında 39-cu yerdədir. Ötən 10 ildə sahibkarlıq subyektlərinin sayı 2,9 dəfə çoxalıb, 3592 istehsal və xidmət müəssisəsi yaradılıb, 1 milyon 200 mindən artıq iş yeri açılıb, işsizlik 5 faizə düşüb.

Son 10 ildə Azərbaycanda sosial-iqtisadi infrastruktur da tamamilə yenilənib. Ölkədə 2708 məktəb, 500-ə yaxın tibb ocağı tikilib və əsaslı təmir olunub. 35 olimpiya idman kompleksi istifadəyə verilib, idman qurğularının sayı 10 minə çatdırılıb. 5 beynəlxalq hava limanı, 4 avtovağzal kompleksi, 4 metropoliten stansiyası tikilib, 10 min km-ə yaxın avtomobil yolu və 207 yeni körpü istifadəyə verilib və s. Bütün bunlar çoxsaylı statistik göstəricilərin cüzi hissəsidir. Bütün beynəlxalq qurum və təşkilatlar da birmənalı şəkildə etiraf edirlər ki, İlham Əliyev dövlət sükanı arxasına keçdikdən sonra Azərbaycanın inkişafı sürətlənmiş, ümumi daxili məhsul istehsalının artım tempinə görə dünyanın lider dövlətlərindən birinə çevrilmişdir. Odur ki, bu gün cənab İlham Əliyevin timsalında hər bir Azərbaycan vətəndaşı, hər bir seçici ölkənin tərəqqisinin simvolunu görür, bu böyük şəxsiyyəti inkişafın, müasirləşmənin təminatçısı kimi dəstəkləyir.

Bütün bunlara görə qətiyyətlə deyə bilərik ki, Prezident İlham Əliyev çox qısa müddətdə bütün sahələrin inkişafı istiqamətində çoxşaxəli islahatlar həyata keçirməklə Azərbaycanın ən yeni tarixinə qızıl hərflərlə yazılan uğurların müəllifi oldu. Ölkə rəhbərində olan yüksək keyfiyyətlər - qətiyyətlilik, prinsipiallıq, zamanında sözünü demək, radikal tədbirlər görmək bacarığı Azərbaycanın inkişafını və müxtəlif sferalarda qazanılan uğurları şərtləndirən əsas amillərdəndir. Cənab Prezidentin istər xarici, istərsə də daxili məsələlərdə nümayiş etdirdiyi siyasi iradə Azərbaycan dövlətçiliyinin daha da qüdrətlənməsinin, ölkənin dinamik inkişafının əsas leytmotivini təşkil etmişdir.

Bütün bunlarla yanaşı, dövlət başçısının cəmiyyətin sosial sifarişinə uyğun çevik qərarlar qəbul etməsi, problemlərə böyük həssaslıqla yanaşması, daim ictimaiyyət arasında olması cəmiyyətin nəinki tərəqqisini, həm də xoş ovqatını təmin edən mühüm nüanslardır. Ötən 10 ildə ölkəmizin sosial-iqtisadi inkişafı istiqamətində böyük məsafələr qət edən, xalqa verdiyi bütün vədləri yerinə yetirən və beləliklə, Heydər Əliyev siyasi kursunun alternativsizliyini ortaya qoyan dövlət başçısı cənab İlham Əliyev hər bir addımda vətəndaşların mənafeyini əsas götürüb. Prezident İlham Əliyevin xarakterinə xas humanistlik və xeyirxahlıq elementləri, bununla yanaşı, zəruri anda yüksək qətiyyət, prinsipiallıq göstərmək məharəti onun daim cəmiyyətdə ulu öndərin layiqli davamçısı kimi dəstəklənməsini təmin edib.

Xüsusilə qeyd edilməlidir ki, prezidentlik fəaliyyəti ölkəmizin bütün şəhər və rayonlarına intensiv səfərlərlə əlamətdar olan cənab İlham Əliyevin səfər proqramlarında əsas yeri məhz sakinlərlə görüşlər təşkil edir. Rəsmiyyətçilik baryerlərini aşaraq son dərəcə səmimiyyət fonunda keçən bu görüşlər cənab Prezidentin vətəndaşların məhz qayğılarına və problemlərinə həssas münasibətini nümayiş etdirib. Odur ki, Prezident İlham Əliyevin regionlara səfəri şəhər və rayonlarda təkcə sosial-iqtisadi inkişafın yeni mərhələsinin başlanğıcı olmayıb, eyni zamanda, sadə insanların həyatında dərin və silinməz iz buraxıb. Elə buna görə də Azərbaycan vətəndaşları Prezident İlham Əliyevin simasında özlərinin ən yaxın hamilərini, güvənc yerlərini görür və bununla da fəxr edirlər. Müxtəlif yerli və xarici təşkilatlar tərəfindən keçirilən sosioloji sorğularda Prezident İlham Əliyevin reytinqinin daim artmasının səbəblərindən biri də budur.

2003-cü il prezident seçkiləri ərəfəsində ulu öndər Heydər Əliyev Azərbaycan xalqına müraciətində demişdi: "İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıracaq". Qazandığımız uğurlar göstərir ki, Prezident İlham Əliyev Azərbaycanı Heydər Əliyevin arzuladığı bir səviyyəyə çatdırıb, Heydər Əliyevin görmək istədiyi ölkəyə çevirib. Ölkə rəhbərinin əzmkarlıqla həyata keçirdiyi siyasət hər bir sahədə böyük uğurlara yol açıb, Azərbaycanın beynəlxalq imicini gücləndirib, ölkəmizin BMT Təhlükəsizlik Şurasına üzv seçilməsini, kosmik kluba qoşulmasını təmin edib. Bu gün Azərbaycan ulu öndərin ideyalarından nur alaraq gələcəyə doğru inamla addımlayır. Bu ideyaların alternativinin olmadığını xalqımız çox gözəl bilir. Bu ideyaların layiqli davamçısı cənab İlham Əliyevin rəhbərliyi ilə Azərbaycanın öz inkişafının yeni mərhələsinə qədəm qoyması Heydər Əliyev yolunun nə qədər doğru-düzgün olduğunu əyani şəkildə göstərir. Odur ki, bu il keçirilən prezident seçkilərində də Azərbaycan vətəndaşları cənab İlham Əliyevin ətrafında sıx birləşməklə Heydər Əliyev ideyalarının dövlətimiz və xalqımız üçün alternativsizliyini nümayiş etdirdilər.

Uğurla başa çatan prezident seçkilərinin nəticələri bütün beynəlxalq siyasi dairələr tərəfindən yüksək qiymətləndirildi. Seçkini müşahidə edən bütün xarici müşahidəçilər öz rəylərində, açıqlamalarında seçkinin şəffaf keçirildiyini və ölkəmizin demokratiya yolu ilə inkişaf etməsinin şahidi olduqlarını birmənalı şəkildə bəyan etdilər. Beynəlxalq müşahidəçilər keçirdikləri mətbuat konfranslarında yekdilliklə Azərbaycanın ATƏT və Avropa Şurasının qətnamələrini, habelə ölkəmizin həmin beynəlxalq təşkilatlar qarşısında götürdüyü öhdəlikləri yerinə yetirməsini yüksək qiymətləndirərək, respublikamızın dinc və sabit ölkə olduğunu sübut etdiyini, demokratiya yolu lə uğurla irəlilədiyini diqqətə çatdırdılar. Beynəlxalq müşahidəçilər Azərbaycanın demokratik seçkilərin keçirilməsinə görə bir çox ölkələrə örnək olduğunu birmənalı şəkildə qeyd etdilər.

İdmançı olduğum üçün bir qədər bu sahədə görülən işlərə toxunmaq istəyirəm. Ümumiyyətlə, dinamik inkişaf edərək regionun lider dövləti statusunu təmin edən Azərbaycan artıq müxtəlif mövzulu - siyasi, iqtisadi, mədəni, humanitar tədbirlərin keçirildiyi məkana çevrilib. Bütün bunlar ölkəmizin artan gücündən və nüfuzundan xəbər verir. Artıq Azərbaycanın mədəniyyətlərarası və sivilizasiyalararası dialoq üzrə mərkəzlərdən biri olmasını bütün dünya qəbul edir.

Beynəlxalq səviyyəli yarışların hər hansı ölkədə baş tutması üçün ciddi rəqabət aparılır, çünki bir çox dövlətlər bu yarışlara ev sahibliyi etmək istəyirlər. Sevindirici haldır ki, Azərbaycanın beynəlxalq idman tədbirlərinin də keçirildiyi ünvana çevrilməsi reallıqda özünü göstərən həqiqətdir. İdman sahəsində gerçəkləşdirilən dövlət siyasəti, Olimpiya ideallarının təbliği, idmanın maddi-texniki bazasının möhkəmləndirilməsi, tikilmiş müasir olimpiya kompleksləri və digər tədbirlər nəticəsində ölkəmiz mötəbər beynəlxalq idman yarışlarının keçirildiyi məkana, dünyanın idman mərkəzlərindən birinə çevrilib.

Artıq indiyədək bir sıra ali, mötəbər idman tədbirləri ölkəmizdə keçirilib və bu da Azərbaycanın idman sahəsindəki uğurlarının, dövlətin bu sahəyə qayğısının nəticəsidir. Azərbaycan təkcə müəyyən kateqoriyalı beynəlxalq yarışların deyil, eyni zamanda, qitə və dünya çempionatlarının keçirildiyi dövlətdir. Bu tədbirlərin Azərbaycanda keçirilməsi üçün ölkəmizdə təşkilati baxımdan yüksək şərait, imkan var. Bunu dünya idman təşkilatları təsdiqləyir və bu səbəbdən də yarışlar reallaşır. İndiyədək Bakıda bədii gimnastika, boks, bodibildinq, güləş, həndbol, şahmat və idmanın digər növləri üzrə onlarca beynəlxalq yarışların, turnirlərin keçirilməsi, Olimpiya oyunlarına ev sahibliyi üçün Azərbaycanın namizədliyinin irəli sürülməsi bunu təsdiq edir. Ölkəmizdə beynəlxalq yarışların regionlarda təşkili sahəsində də böyük nailiyyətlər qazanılıb. Onu da demək yerinə düşər ki, Azərbaycanda keçirilən Avropa, dünya çempionatları silsilə xarakter daşıyır. Hər il müxtəlif beynəlxalq yarışların Azərbaycanda keçirilməsi ölkəmizin idman şöhrətini daha da ucaldıb.

Prezident İlham Əliyevin rəhbərliyi altında son 10 ildə möhtəşəm inkişaf yolu keçən Azərbaycan dövlətçiliyini inkişaf etdirmiş, siyasi və iqtisadi müstəqilliyini daha da möhkəmləndirmişdir. Məhz İlham Əliyevin sayəsində dünyada sürətli iqtisadi inkişaf dinamikası nümayiş etdirən, liberal prinsiplərə əsaslanmış iqtisadi modelini yaradan Azərbaycanın bu dövrdə həm regional, həm qlobal miqyasda nüfuzu yüksəlmiş, ölkəmiz geoiqtisadi və geosiyasi oyunçuya çevrilmiş, əhalinin sosial rifahı daha da yaxşılaşmışdır. Odur ki, bu seçkilərdə də xalqımız cənab İlham Əliyevin ətrafında sıx birləşməklə Heydər Əliyev ideyalarının və siyasətinin davamına səs verdi. O cümlədən, ölkəmizin idman ictimaiyyəti də hər zaman olduğu kimi cənab İlham Əliyevə dəstəyini ifadə etdi. Bu, xalqın seçimidir. Xalqın seçimi isə dəyişilməzdir.

Vüqar NAMAZOV,

Ağırlıqqaldırmanın pauerliftinq növü üzrə dünya və Avropa çempionu

Azərbaycan.- 2013.- 3 noyabr.- S.5.