Göyçayda VIII nar

bayramı keçirilmişdir

Noyabr ayının 2-də Göyçayda təşkil olunan sayca VIII nar bayramı möhtəşəmliyi ilə əvvəlkilərdən fərqlənmişdir. AzərTAc xəbər verir ki, dövlət və hökumət nümayəndələrinin, Milli Məclisin deputatlarının, xarici ölkələrin Azərbaycandakı səfirlərinin, diaspor nümayəndələrinin, beynəlxalq təşkilat əməkdaşlarının qatıldıqları möhtəşəm nar festivalı təbii sərvətimizin, milli adət-ənənələrimizin əyani nümayişinə çevrilmişdir. Narla bağlı müxtəlif yarış və müsabiqələrin təşkili xüsusilə yaddaqalan olmuşdur.

Nar bayramının iştirakçıları Heydər Əliyev prospektində musiqi sədaları altında qarşılanmışdır. Onlara yerli müəssisələrin istehsalı olan nar şirələri paylanılmışdır. Festivalın əsas qəhrəmanı olan Nar şahzadəsi meydana daxil olaraq qonaqları salamlamış, xalqımıza əmin-amanlıq, bol ruzi-bərəkət arzulamışdır. Tədbir iştirakçıları rayonun 30-a yaxın kəndinin nar və nar məhsullarından ibarət sərgisi ilə tanış olmuşlar. Meydanda təşkil olunmuş kitab sərgisi, əl işləri və qədim sənət növləri maraqla izlənilmiş, idmançıların, kəndirbazların, pəhləvan və sehrbazların, folklor rəqs və musiqi qruplarının, meyxanaçıların, xor kollektivinin bir-birini əvəz edən çıxışları bayramı daha da yaddaqalan etmişdir. Qonaqlar və ictimaiyyətin nümayəndələri ulu öndər Heydər Əliyevin abidəsini ziyarət etdikdən sonra mərasimin rəsmi hissəsi başlanılmışdır.

Göyçay Rayon İcra Hakimiyyətinin başçısı Mənsur Məmmədov bildirmişdir ki, Prezident İlham Əliyevin xeyir-duası ilə artıq səkkizinci dəfədir ki, təşkil edilən bu məhsul bayramı böyük əhəmiyyət kəsb edir. Çünki bu festival Göyçayda narçılığın inkişafına təkan vermişdir. Mütəxəssislərin qənaətlərinə görə, bu il bağlara göstərilən yüksək aqrotexniki qulluq və havaların əlverişli keçməsi bol məhsul yetişdirilməsinə zəmin yaratmışdır. İlkin hesablamalara görə, cari ildə məhsuldarlıq 45 min tona yaxın olacaqdır. Ötən il isə fermerlər və fərdi təsərrüfat sahibləri 40 min 342 ton nar tədarük etmişlər. Məhsulun 40 faizi Rusiya, Ukrayna və Gürcüstanın bazarlarına çıxarılmışdır. Göyçayda narçılığa olan maraq ildən-ilə artır, yeni və məhsuldar nar sortlarının yetişdirilməsi, təzə bağların salınması istiqamətində tədbirlər görülür. Son iki ildə rayonda 450 hektar sahədə yeni nar bağı salınmışdır. Bağlarda əsasən "Gülövşə", "Vələs", "Şəndi", "Şirin", "Bala Mürsəl" nar sortları əkilmişdir. İstehsal müəssisələri isə ilbəil imkanlarını genişləndirirlər. Bayram tədbirində Milli Məclisin deputatı Elton Məmmədov, Çinin ölkəmizdəki səfiri Xun Tsyuin çıxış edərək nar bayramının yüksək əhəmiyyətə malik olduğunu qeyd etmişdir.

Sonra yeni ailə quran gənclərə, "qızıl toy"u olan cütlüyə, eləcə də 2006-cı ildə ilk dəfə nar bayramının keçirildiyi gündə dünyaya gələn və bu gün 8 yaşını qeyd edən iki uşağa xatirə hədiyyələri təqdim olunmuş, ən xoş arzularını bildirmişlər. Qonaqlar tədbir boyu isti təndir çörəyinə, nardan hazırlanmış məhsullara, motal pendiri, yuxa, kətə və döşəməli plova qonaq edilmişlər. Festivalda müxtəlif müsabiqələr də keçirilmişdir. Ən böyük və kiçik narın sahibinə, giləsini yerə salmadan ən tez nar yeyən adama, ən sürətli nar şirəsi hazırlayana pul mükafatları verilmişdir. Sonda Azərbaycan və Türkiyə incəsənət ustalarının iştirakı ilə bayram konserti keçirilmiş və atəşfəşanlıq olmuşdur.

Azərbaycan.- 2013.- 3 noyabr.- S.6.