Ucal, mənim üçrəngli bayrağım!

Qardaş Türkiyədə səsin və sözün sehrindən boylanan istedadlıları seçmək üçün bir tele-layihə var: "O səs Türkiyədir". O gün Dövlət Bayrağı Meydanında "Bu səs Azərbaycandır", - deyənlər böyük qürur hissi keçirirdilər.

O gün paytaxtımızın Bayraq Meydanında bu əlamətdar günlə bağlı keçirilən ədəbi-bədii kompozisiyada üçrəngli bayrağımızı vəsf edən şeirlər ilahi səsə çevrilib səmada pərvazlanmışdı. O səsin sehrinə düşənlər az deyildi. O səsin sahibi Bakı şəhəri Qaradağ rayonunun Müşfiqabad qəsəbəsindəki 274 saylı orta məktəbin şagirdidir. Məktəbin direktoru Atakişi Cəfərov rəhbərlik etdiyi pedaqoji və şagird kollektivinin də sevimlisinə çevrilən 8-c sinif şagirdi Fatimə İbadovanı daha yaxşı tanımaq üçün bu istedadlı yeniyetmənin sinif rəhbəri, dil-ədəbiyyat müəllimi Yeganə Əliyeva ilə görüşməyi məsləhət bildi.

Fatimə, sən demə, yalnız isdedad və qabiliyyəti ilə çoxsaylı tamaşaçılarının deyil, həm də oxuduğu məktəbin sevimlisi imiş. Bu barədə məktəbdə fəallığı ilə seçilən bədii qiraət dərnəyinin rəhbəri Yeganə Əliyevanın söylədiklərindən:

- Məktəbimizdə şagirdlərin, xüsusən də istedadlıların qabiliyyət və bacarıqlarının üzə çıxarılması üçün son illər hər cür şərait yaradılıb. Buna cavab olaraq biz müəllimlərin, eləcə də şagirdlərin üzərinə daha çox məsuliyyət düşür. Çalışırıq ki, əməli fəaliyyətimizdə bunu təsdiqləyək. Fatiməyə gəlincə, onun barəsində daha ürəklə söz açmaq olar. O, həm istedadlı və bacarıqlı şagird, həm də fəal ictimaiyyətçidir.

Fatimə kimi məktəbdə öz qabiliyyət və istedadını göstərmək bacarığına malik Bənövşə Hacızadə, Məryəm Quliyeva, Vaqif Məmmədov, Leyla Abbasova, Zeynəb Verdiyeva, Aytən Novruzlu kimi seçilən, istər məktəbdaxili, istər rayon, istərsə də respublika miqyaslı tədbirlərdə fəal iştirak edib qalib olanlar, diplom və fəxri fərmanlarla təltif edilən şagirdlər az deyil.

Dövlət Bayrağı Günü münasibətilə Bakı şəhəri məktəbliləri arasında "Mənim üçrəngli bayrağım" devizi altında keçirilən ədəbi-bədii kompozisiyasında Fatimə İbadova xüsusu seçildi:

Dalğalan sən göylərimdə,

Obalar, həm ellərimdə,

Nəğməyə dön dillərimdə,

Sənsən zirvəm, sənsən dağım,

Mənim üçrəngli bayrağim!..

Yaxud:

Bayrağım dalğalanır!

Dalğasında bir səs var -

elə bil ki, əzandır,

O səs çağırır məni

gör bir neçə zamandır.

O, anadır, Vətəndir, candır,-

Azərbaycandır,

İlahi sözün dəli-divanəsi də olub - Nizami, FüzuliE kimi, səsin şimşəklisi də - Koroğlu tək. Sözlə səs qoşalaşıb ruhumuzun ifadəsinə çevrilir. Üzeyirin musiqisi, Bülbülün nəğməsi, Mehdi Məmmədovun, Ənvər Əblucun səsinin sehrində əbədi yuxuya gedən Səməndər Rzayevin, bulaq suyu ifası könülləri oxşayan Məhluqə Sadıqovanın... adları mədəniyyət və incəsənət tariximizə nəyə görə yazılıb?! Fatimə İbadova, təbii ki, özünü gələcəkdə incəsənət aləmində, o sirli-sehirli səhnədə, çoxsaylı tamaşaçılar qarşısında hiss edir. Söz və səs onun həyat uğrunda mübarizəsinin əsasını təşkil edir.

Səsinin sehri ilə tamaşaçısını indidən ovsunlayan balaca qiraətçi ona bu işdə dəstək göstərənlərin hər birinə təşəkkürünü bildirməklə yanaşı, indiyə kimi iştirak etdiyi tədbirlərdə qazandığı nailiyyətləri təsdiqləyən diplom və fəxri-fərmanları yan-yana düzür: "Bunlar məktəb rəhbərliyi tərəfindən aldığım fəxri-fərmanlardır. Bunlar isə Azərbaycan Təhsil İşçiləri Azad Həmkarlar İttifaqı Qaradağ Rayon Komitəsi ilə Bakı Şəhər Gənclər və İdman Baş İdarəsi tərəfindən verilənlərdir. Bu ilin sentyabr ayının 23-də keçirilən "Gənc qiraətçilərin ümumrespublika müsabiqəsi"nin iştirakçısı və qalibi də olmuşam. Ötən il isə Ana Dili Günü münasibətilə ilə keçirilən "Şagirdlərin ən yaxşı yaradıcılıq işi" kompozisiyasındakı ifama görə mükafata layiq görülmüşəm".

Budəfəki təltifi isə ona Dövlət Bayrağı Günü münasibətilə Bakı Şəhəri Gənclər və İdman Baş İdarəsi ilə Azərbaycan Respublikası Gəncliyə Yardım Fondunun birgə təşkil etdiyi "Mənim bayrağım" şeir müsabiqəsindəki uğurlu çıxışı qazandırıb. "Abşeron" Rəsm Qalareyasında "Üçrəngli bayrağınla məsud yaşa" adı altında keçirilən şagirdlərin ümumrespublika müsabiqəsində iştirak edən uşaq rəssamlarla yanaşı, səsinin tellərində Vətənə məhəbbət yaşadanlar da vardı. Fatimə İbadova növbəti dəfə burada da dostlarından seçildi, "Ən yaxşı şeir" nominasiyasındakı qaliblərdən biri kimi. Onun səsində rənglərin çalarını görmək çətin deyil. Orada elə rənglər var ki, bu səsin işığında bir yol başlamaq olar üzü dağlara, itirilmiş yurd yerlərinə - Zəngəzurumuza, Dərələyəzimizə, ulu Göyçəmizə, nəhayət, külli-Qarabağımıza...

Məhəmməd NƏRİMANOĞLU,

Azərbaycan.-2013.- 14 noyabr.- S.9.