Səfərbərlik və Hərbi Xidmətə Çağırış üzrə Dövlət Xidmətinin

rəisi Sumqayıtda vətəndaşları qəbul etmişdir

Dövlət başçısı İlham Əliyevin tapşırıq və tövsiyələrinə, vətəndaşların yerlərdə qəbulu cədvəlinə uyğun olaraq noyabrın 16-da Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant Arzu Rəhimov Sumqayıtda vətəndaşları qəbul etmişdir.

Xidmətin şəhər idarəsinin inzibati binasında gün ərzində aparılan qəbul zamanı Sumqayıt şəhərinin, həmçinin Abşeron rayonunun sakinlərinin müraciətlərinə baxılmışdır.

AzərTAc xəbər verir ki, vətəndaşların müraciətləri daha çox Xidmətin Sumqayıt Şəhər İdarəsi və Abşeron Rayon Şöbəsində işə və ya həqiqi hərbi xidmətə qəbula, veteran adı və vəsiqəsinin verilməsinə, hərbi xidmətə çağırılan övladlarının ailə vəziyyətləri ilə əlaqədar yaşadıqları əraziyə yaxın olan hərbi hissələrdə xidmət keçmələri məsələlərində kömək göstərilməsinə dair olmuşdur.

Qəbul zamanı irəli sürülən bəzi məsələlər yerindəcə həllini tapmışdır. Araşdırılması tələb olunan müraciətlər nəzarətə götürülmüş və müvafiq araşdırmalardan sonra cavablandırılacağı bildirilmişdir. Eyni zamanda, Səfərbərlik və Hərbi Xidmətə Çağırış üzrə Dövlət Xidmətinin səlahiyyətlərinə aid olmayan müraciətlər aidiyyəti üzrə baxılması və müvafiq qurumlara çatdırılması üçün qeydiyyata alınmışdır.

Sakinlər vətəndaşların qəbulunun təşkilindən və yaradılmış şəraitdən razı qaldıqlarını söyləmiş, göstərilən diqqət və qayğıya görə Azərbaycan Prezidenti İlham Əliyevə minnətdarlıqlarını bildirmişlər.

Azərbaycan.-2013.- 17 noyabr.- S.4.