Sankt-Peterburqda MDB Hökumət Başçıları

Şurasının növbəti iclası keçirilmişdir

Sankt-Peterburqda (Rusiya) MDB Hökumət Başçıları Şurasının növbəti iclası keçirilmişdir. Azərbaycanı iclasda Baş nazirin birinci müavini Yaqub Eyyubovun rəhbərliyi ilə nümayəndə heyəti təmsil etmişdir. İclasın gündəliyinə MDB çərçivəsində inteqrasiya sahəsində qarşılıqlı fəaliyyətə dair 30-dan çox məsələ daxil edilmişdir.

MDB İcraiyyə Komitəsinin mətbuat xidmətindən AzərTAc-a bildirmişlər ki, hökumət başçıları Böyük Vətən müharibəsində qələbənin 70 illik yubileyinə hazırlığa dair əsas tədbirlər planını təsdiq etmişlər.

Hökumət başçıları həmçinin MDB məkanında mallarının istehsalçısının müəyyən edilməsi qaydaları haqqında saziş imzalamış, 2020-ci ilədək turizm sahəsində əməkdaşlığın inkişafı strategiyasını, bərpa olunan enerji növlərindən istifadə olunması sahəsində əməkdaşlıq konsepsiyasını təsdiq etmişlər.

Bundan əlavə, iclasda informasiya təhlükəsizliyinin təmin olunması sahəsində əməkdaşlıq haqqında saziş imzalanmış, vahid dövlət radiolokasiya tanıma sisteminin inkişaf konsepsiyası və digər sənədlər təsdiq edilmişdir.

İclas iştirakçıları MDB Səhiyyə Sahəsində Əməkdaşlıq Şurasının fəaliyyəti, Moskvadakı Ümumrusiya Sərgi Mərkəzində daimi fəaliyyət göstərən MDB sərgi mərkəzinin yaradılması, dövlətlərarası radionaviqasiya proqramının həyata keçirilməsi, "Mir" Dövlətlərarası teleradio şirkətinin istehsal bazasının müasir rəqəmli və multimedia texnologiyalarına keçirilməsinə dair planın yerinə yetirilməsi haqqında məlumat dinləmişlər.

MDB Hökumət Başçıları Şurasının növbəti iclası gələn il mayın 30-da Kiyevdə (Ukrayna) keçiriləcəkdir.

Fəridə ABDULLAYEVA,

AzərTAc-ın xüsusi müxbiri

Moskva

Azərbaycan.-2013.- 22 noyabr.- S. 4.