Görüş səmimi olduğu qədər də məsuliyyətli idi

Bu tədbiri Prezidentin mediaya münasibətinin parlaq nümunəsi hesab etmək olar

İkinci dəfə "Jurnalistlərin dostu" mükafatına layiq görülən Azərbaycan Prezidenti İlham Əliyevin ölkənin aparıcı elektron və çap mediasının baş redaktorları, telekanal rəhbərləri, junalist təşkilatlarının sədrləri ilə keçirdiyi görüş kütləvi informasiya vasitələrində geniş müzakirə mövzusuna çevrilib.

Bu görüşdə iştirak edən və etməyən media qurumlarının rəhbərləri, gənclər xoş təəssüratlarını bölüşməkdə davam edirlər.

Prezidentə "Jurnalistlərin dostu" mükafatının təqdim olunma mərasimində iştirak etmiş Azad Azərbaycan Müstəqil Teleradio Kampaniyasının prezidenti, əməkdar jurnalist Vüqar Qaradağlı bildirdi ki, dövlət başçısının mətbuatın dostu seçilməsi və özü tərəfindən həmin mükafatın qəbul edilməsi əslində, onun mediaya olan münasibətinin həqiqi göstəricisidir: "Bu görüş bir daha sübut etdi ki, Azərbaycan Prezidenti inkişaf etmiş ölkə mediasına xüsusi diqqət göstərir və onun inkişafı üçün hər cür şərait yaradılmasının tərəfdarıdır".

Yeri gəlmişkən bu görüş Vüqar Qaradağlı üçün ikiqat xoş təəsürat yaradıb. Çünki noyabrın 24-də ömrünün 47-ci qışını yaşayan əməkdar jurnalist həmin gün dövlət başçısı ilə bir masada əyləşərək Azərbaycan mediasının durumu, problemləri və digər məsələlər ətrafında səmimi fikir mübadiləsi aparıb: "Bu görüş həyatımda xüsusi bir gün sayıla bilər. İndiyədək keçirdiyim doğum günlərində aldığım hədiyyələrin ən böyüyü həmin görüş oldu". Onun sözlərinə görə, görüşdə dövlət başçısının çıxışını professor Şirməmməd Hüseynovun söylədiyi kimi, "Prezident dərsi" adlandırmaq olar: "Çünki dövlət başçısı görüşdə həm ölkəmizdəki ictimai-siyasi durum, dövlətçilik, Azərbaycan mediasının vəziyyəti ilə bağlı çox maraqlı və dəyərli fikirlər səsləndirdi. Eyni zamanda, çıxış edən hər bir kəsi diqqətlə dinləyib onların səsləndirdikləri fikirlərə, təkliflərə münasibət bildirdi". V.Qaradağlı eyni zamanda, qeyd etdi ki, dövlət başçısının jurnalistika fakültəsinə tələbə qəbulunun yaradıcılıq müsabiqəsi yolu ilə keçirilməsinə müsbət münasibət bildirməsi həm də onun bu sahəyə daha çox diqqət ayırdığının göstəricisidir. Eyni zamanda, hər kəsə bəlli oldu ki, Prezident İlham Əliyev medianın problemlərinin həlli istiqamətində ortaya siyasi iradə qoyub. Prezidentin jurnalistlərlə görüşü bu mənada təsadüfi sayıla bilməz. Görüş çox yüksək səviyyədə təşkil olundu və ölkə başçısı medianın problemlərinin həlli istiqamətində öz tapşırıqlarını verdi.

Görüşdə iştirak edən "New Baku Post" qəzetinin baş redaktoru Tofiq Abbasov isə bildirdi ki, prinsip etibari ilə belə görüşlərə hər zaman ehtiyac var və dövlət başçısının təşəbbüsü ilə bu formatda keçirilən söhbət çox vacibdir. Bu, həm milli junalistikamızın inkişafı, həm cari məsələlərin həlli, həm də gələcəyə baxışın formalaşdırılması üçün çox gərəkli bir görüş hesab edilir. Bu gün strateji baxış ondan ibarət olmalıdır ki, hakimiyyət və mətbuat bir-birini yaxından tanısın. Bir-birinin mövqeyinə bələd olmalıdır ki, ölkədəki durum, regiondakı vəziyyətlə bağlı bütün bilgilərə sahib olsunlar: "Çünki istəsək də istəməsək də hakimiyyət təbii ki, idarəçilikdə mətbuatın da gücünə arxalanır. Lakin bu o demək deyil ki, mətbuat da həmin etimatdan sui-istifadə etməlidir. Çünki bəzi hallarda şahidi oluruq ki, mətbuatda lazımsız şərhlər, yersiz münasibətlər əksini tapır. Əksinə, biz çalışmalıyıq ki, Azərbaycan mətbuatı bizim həm inkişafımızın, həm ölkəmizdə olan ictimai-siyasi mədəniyyətin, etikamızın göstəricilərini özündə ehtiva etsin".

Tofiq Abbasov qeyd etdi ki, Azərbaycan Prezidenti "Jurnalistlərin dostu" mükafatını başqa formatda da ala bilərdi. Lakin mətbuat nümayəndələrinə böyük diqqət yetirməklə, onları qəbul edib dinləməklə dövlət başçısı sübut etdi ki, Azərbaycan mediasının durumu daim onun diqqətindədir. T.Abbasov ümid edir ki, bu cür görüşlər davamlı olacaq. Çünki bir çox ölkələrdə də belə görüşlər mütəmadi keçirilir və media nümayəndələri həmçinin baş nazir, dövlət strukturunun rəhbərləri ilə qeyri-formal şəraitdə ən mühüm problemləri nəzərdən keçirirlər. Hətta belə görüşlərdə müxalif mövqedə olan media nümayəndələri də olur: "Müxalif mövqedə olmaq o demək deyil ki, ölkənin maraqlarına zidd gedəsən. Biz bütün məsələlərdə azərbaycançılığı, dövlətçiliyi üstün tutmalıyıq. Çünki yazdıqlarımız, çəkib nümayiş etdirdiyimiz bütün materiallara başqa dövlətlərdə də baxılır. Ona görə də biz yüksək etik normalara riayət etməliyik".

Görüşün digər iştirakçısı "Olaylar" İnformasiya Agentliyi və "Olaylar" qəzetinin baş redaktoru, tarixçi-alim Yunus Oğuz da bildirdi ki, səmimi şəraitdə keçən görüşdə Azərbaycan Prezidentinin ölkə mediası ilə bağlı səsləndirdiyi fikirlər, təkliflər diqqəti çox cəlb edib: "Prezidentin çıxışında hiss olunurdu ki, ölkə mətbuatının problemləri ilə yanaşı, onun uğurları ilə də yaxından tanışdır. Problemləri sadalayır, ən xırda incəliklərinə qədər danışırdı. Hərdən özümə sual verirdim ki, Prezident bütün bunları haradan bilir? Başqa sözlə, səmimi görüş, səmimi olduğu qədər də məsuliyyətli idi. Prezident mesajlar verirdi. Bilirdi ki, onun dedikləri televiziyalarda səslənəcək, qəzetlərdə dərc olunacaq, sosial şəbəkələrdə yayılacaq, hər kəs özünə sərf edən fikirləri iqtibas kimi söyləyəcək, bəzi şəxslərsə məsələnin mahiyyətini kənara qoyub bu şəbəkələrdə mükamilə yazışmasının əndazəsindən kənara çıxıb hətta "atışacaqlar". Bu da normaldır, deməli, İlham Əliyevin dediyi sözlər heç kəsdən yan keçməyib, hər kəs öz payını götürür".

Onun sözlərinə görə bu görüşdə də Prezident açıq şəkildə dedi ki, Azərbaycan daxilində, fərqi yoxdur müxalifət olsun, ya iqtidar, hamı Azərbaycan vətəndaşıdır və azərbaycanlıdır. Hər bir azərbaycanlının bu dövlətdə xüsusi yeri var və bu işdə ayrı-seçkiliyi əsasən kütləvi informasiya vasitələri aradan qaldırmalıdır: "KİV-nin gücünü göstərməklə yanaşı, dövlət başçısı həm də daha bir mesajını verdi. Bu mesaj xaricdən maliyyə dəstəyi alan, qaynaqlarını xarici ölkələrdə axtaran, onun-bunun qapısında boynunu burub imdad gözləyənlərə bir mesaj idi. İstəklərinə nail ola bilməyənlər, bitib-tükənməyən yalanları hesabat şəklində beynəlxalq təşkilatlara ötürməklə başını qaldırıb irəliləmək və öz sözünü dünyada demək istəyən Azərbaycanın imicinə zərbə vurur. Çox düz qeyd olundu ki, siyasi partiyaların siyasiləşmiş qəzetləri bu işdə daha çox canfəşanlıq edirlər, çünki ortada siyasi sifarişlər olur".

"Azxeber.com" internet saytının baş redaktoru Hacıbəy Heydərli də hesab edir ki, Prezident İlham Əliyevin "Jurnalistlərin dostu" seçilməsi ölkə jurnalistlərinin mövqeyini birmənalı şəkildə ifadə edir. Ölkə rəhbəri öz əməli fəaliyyəti ilə, dövlətimiz və xalqımız üçün gördüyü işləri ilə jurnalistlərin rəğbətini qazanıb və bu ada layiq görülüb. Bu sorğu ölkənin 100 jurnalist təşkilatında keçirilib və sorğuda iştirak edənlərin 89 faizi bu mükafata Prezident İlham Əliyevi layiq görüb: "Əminliklə söyləyə bilərəm ki, cənab İlham Əliyev bu mükafata layiq ən şanslı namizəd idi və əslində, qeyri-adi bir şey baş verməyib. Dövlət başçısı daim ölkə jurnalistlərinə qayğı ilə yanaşıb, hər zaman onları dinləyib, mətbuat nümayəndələrinin problemlərinin həlli istiqamətində ortaya siyasi iradə qoyub".

Cənab Prezidentin bu adı ona layiq görən insanlarla görüşməsi, Azərbaycan mətbuatının problemlərini dinləməsi və bu məsələlərin həllinə dair tapşırıqlar verməsi də söylənilən fikirləri bir daha sübut edir. Dövlət başçısının media nümayəndələri ilə bu görüşünü həm də Azərbaycan dövlətinin medianın inkişafına böyük dəstəyi kimi qiymətləndirilməlidir. Ölkənin birinci şəxsinin media ilə, cəmiyyətlə məsləhətləşməsi, onlardan dəstək istəməsi təqdirəlayiq haldır.

Dövlət başçısının görüşdə söylədiyi təkliflər hər bir jurnalist, hər bir vətəndaş üçün ümdə vəzifə ola bilər: "Əgər inkişaf etmiş ölkələr sırasında olmaq istəyiriksə, şəffaflıq hər bir sahədə yüksək səviyyədə təmin olunmalıdır. Mətbuatın əsas vəzifəsi görülən işləri işıqlandırmaq, həllini gözləyən məsələləri qabartmaqla onların çözülməsinə dəstək olmaqdır". H.Heydərli onu da vurğuladı ki, dövlət başçısı ölkədəki azad internetin əhali arasında daha geniş yayılmasında maraqlıdır və vətəndaşların internetdən daha rahat istifadəsi üçün dövlət siyasəti həyata keçirir. Bu həm də Azərbaycan hakimiyyətinin ənənəvi media ilə yanaşı, yeni mediaya qayğısının, diqqətinin bariz göstəricisidir. Son zamanlar sosial şəbəkələrdə müşahidə etdiyimiz məmur-vətəndaş arasında virtual əlaqələrin qurulması, dövlət və hökumət qurumlarının sosial şəbəkələrdə aktiv fəaliyyəti də bu qəbildəndir.

Rəşad BAXŞƏLİYEV,

Azərbaycan.-2013.- 29 noyabr.- S.5.