Mətbuat Şurasında Həsən bəy Zərdabinin

xatirəsini anma tədbiri keçirilmişdir

Noyabrın 28-də Azərbaycan Mətbuat Şurasında Həsən bəy Zərdabinin xatirəsini anma tədbiri keçirilmişdir.

Şuradan AzərTAc-a bildirmişlər ki, toplantını açan qurumun sədri Əflatun Amaşov bildirmişdir ki, xalqımızın böyük maarifpərvər ziyalısı Həsən bəy Zərdabinin vəfatından 106 il ötür. Bu tarixi şəxsiyyətin fəaliyyətindən və bütövlükdə ömür yolundan, xüsusən də "Əkinçi" qəzetini nəşr etdirərkən çəkdiyi əzab-əziyyətlərdən hər bir azərbaycanlı məlumatlı olmalıdır. Bu məlumatlılığı təmin etmək üçün Mətbuat Şurası bir neçə il əvvəl Həsən bəy Zərdabinin xatirəsini anma gününün keçirilməsi təşəbbüsünü qaldırmışdır. Hər il Milli Mətbuat Günü ilə yanaşı, eyni zamanda, noyabrın 28-də böyük ziyalı ilə bağlı tarixi faktlara müraciət edilir, onun xalqı qarşısındakı xidmətləri yada salınır. Hər dəfə də xatirələri çözələdikcə böyük fəxarət hissi keçiririk, - deyən Mətbuat Şurasının sədri vurğulamışdır ki, kütləvi informasiya vasitələrinin Həsən bəy Zərdabinin keçdiyi ömür yolunun ayrı-ayrı məqamlarını misilsiz vətənpərvərlik nümunəsi kimi təqdim etmələri cəmiyyət üçün son dərəcə zəruridir.

Mətbuat Şurasının idarə heyətinin üzvü, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli rəhbərlik etdiyi qurumun milli mətbu irsimizdə xüsusi yeri olan nəşrlərin təbliğinə böyük önəm verdiyini vurğulamışdır. Bildirmişdir ki, bu günlərdə fondun maliyyə dəstəyi ilə "Ziya" qəzetinin nüsxələrinin ərəb əlifbasından latın qrafikalı Azərbaycan əlifbasına çevrilməsi işi həyata keçirilmiş və toplanmış materiallar kitab şəklində nəşr edilmişdir.

Bundan başqa, fond "Azərbaycan mətbuat tarixi antologiyası"nın da nəşrini reallaşdırmışdır. Ümumən qurum bu qəbildən olan layihələrə həmişə dəstək verir. Düşünürəm ki, Həsən bəy Zərdabi irsinin daha genişmiqyaslı tətbiqinə şərait yaratmaq da qarşımızda duran mühüm vəzifələrdəndir", - deyə o, vurğulamışdır.

Mətbuat Şurası idarə heyətinin üzvü, "İki sahil" qəzetinin baş redaktoru Vüqar Rəhimzadə "Əkinçi" qəzetinin o dövrdə fəaliyyətə başlamasını, eləcə də iki il müddətində ömür sürməsini Həsən bəy Zərdabi şəxsiyyətinin böyük hünəri adlandırmışdır. Qeyd etmişdir ki, Həsən bəy Zərdabinin həyat yoluna nəzər salarkən onun xalqı maarifləndirməyin ən müxtəlif yollarını nəzərdən keçirdiyi və nəhayət, bu məsələdə qəzet çapı üzərində dayandığı aydın görünür. Dahi mütəfəkkirin seçimini səciyyələndirən cəhətlər müəyyən çalarlarla bugünümüz üçün də aktualdır.

Azərbaycanlıların və Digər Türkdilli Xalqların Əməkdaşlıq Mərkəzinin rəhbəri İlham İsmayıl Həsən bəy Zərdabini təkcə ölkəmizin deyil, bütövlükdə türk dünyasının görkəmli ictimai xadimi, ziyalısı kimi xarakterizə etmişdir. Diqqətə çatdırmışdır ki, onun 1875-ci ildə "Əkinçi" qəzeti ilə əsasını qoyduğu mətbuatımız qısa zamanda xalqın özünüdərk prosesində misilsiz rol oynamışdır. Nəşrin səhifələrində məişət müstəvisində qaldırılan məsələlər zaman keçdikcə digər mətbuat orqanları tərəfindən milli məfkurə davası ilə bağlı müstəsna tezislərə çevrilmişdir. Nəticə etibarilə bu, dövlət müstəqilliyimizin qazanılmasına gətirib çıxarmışdır.

Bakı Dövlət Universitetinin jurnalistika fakültəsinin professoru Nəsir Əhmədli Həsən bəy Zərdabi irsinin araşdırılması sahəsində görülən işlərdən söz açmışdır. Görkəmli alimin "Heç olmaz ki, doğru söz yerdə qalsın" fikrinə müraciət edən N.Əhmədli bildirmişdir ki, Həsən bəy şəxsiyyətinin doğru bildiklərini anlatma tərzi, fəaliyyətindəki ayrı-ayrı məqamlar bu günün jurnalistləri üçün son dərəcə vacib məktəb rolunu oynamaqdadır.

"Bakı xəbər" qəzetinin baş redaktoru Aydın Quliyev bildirmişdir ki, Həsən bəy Zərdabinin Azərbaycan xalqı qarşısındakı xidmətləri təkcə "Əkinçi" qəzeti ilə məhdudlaşmır. Bu mənada dahi mütəfəkkirin ötən əsrin əvvəllərində işıq üzü görmüş "Kaspi" qəzetindəki fəaliyyətindən söz açan baş redaktor 1907-ci il noyabrın 28 tarixini xatırlatmışdır. Qeyd etmişdir ki, Həsən bəyin dəfni böyük izdihamla yadda qalmışdı. Bu, xalqın öz ziyalısına, fikir adamına dəyəri baxımından böyük, eyni zamanda, fəxarət duyulası hadisə idi. Hesab edirəm ki, noyabrın 28-nin məhz bu aspektinin də qabardılmasına ehtiyac vardır.

Azərbaycan.-2013.- 29 noyabr.- S.7.