Prezidentin səsləndirdiyi fikirlər Azərbaycan

jurnalistikasının inkişafına öz töhfəsini verəcək

Noyabrın 24-də Azərbaycanın ictimai-siyasi həyatında çox mühüm hadisə baş verdi. Prezident İlham Əliyev ölkədə fəaliyyət göstərən kütləvi informasiya vasitələrinin rəhbərləri ilə görüşdü. Görüşdə "Jurnalistlərin dostu" mükafatı dövlət başçısına təqdim olundu. Ölkə rəhbəri ilə jurnalistlər arasında media müstəvisində səmimi bir dialoq yarandı. Prezident jurnalistlərə önəmli mesajlar verdi.

Dövlət başçısı ilə media nümayəndələri arasındakı səmimi dialoq bu gün də müzakirə mövzusudur. Görüşlə bağlı təəssüratlarını bölüşənlər də hesab edirlər ki, Prezidentin səsləndirdiyi fikirlər, tövsiyələr Azərbaycan jurnalistikasının inkişafına öz töhfəsini verəcək.

Bakı Dövlət Universitetinin jurnalistika fakültəsinin dekanı, əməkdar jurnalist, professor Şamil Vəliyev qəzetimizə açıqlamasında bildirdi ki, Azərbaycan Prezidenti ilə keçirilən görüş və onun "Jurnalistlərin dostu" elan olunması bu günlərin ən aktual məsələsi kimi qiymətləndirilir. Çünki bu, sadəcə bir peşə sahəsinin insanları ilə keçirilən görüş deyil, həm də bu sahəyə aid elmi axtarışların strategiyasını müəyyənləşdirən görüş idi: "Prezidentin proqram xarakterli çıxışı bizim üçün yaxın illərin fəaliyyət proqramı da hesab oluna bilər və bu çıxış bizi işimizdə daha məsuliyyətli, daha diqqətli olmağa səfərbər edəcək".

Əməkdar jurnalist vurğuladı ki, görüşdə çox maraqlı tezislər də səsləndirilib. Eyni zamanda jurnalistika fakültəsinin uzun illərdən bəri arzuladığı yaradıcılıq müsabiqəsi ilə bağlı məsələ görüş zamanı müzakirə mövzusu olub. Onun sözlərinə görə, dövlət başçısı bu məsələnin rəsmiləşməsi ilə bağlı tapşırıqlar verib: "Bu məsələ fakültənin problemi kimi qalırdı. Ancaq dövlət başçısı bununla bağlı müsbət fikrini söylədi və inanırıq ki, yaradıcılıq müsabiqəsinin tətbiqindən sonra biz jurnalistika fakültəsində müəyyən uğurlarımız barədə fəxrlə danışa biləcəyik".

Şamil Vəliyev qeyd etdi ki, Prezident İlham Əliyev ölkədə söz və mətbuat azadlığından danışaraq mətbuata bu sahədə heç bir maneçilik yarıdılmadığını söyləyib. Dövlət başçısı birmənalı şəkildə bildirib ki, söz, fikir azadlığı qorunmalıdır. Çünki bu azadlığın qorunması cəmiyyətdaxili dialoqun qurulması ilə inkişaf dinamikasını müəyyənləşdirir. Dövlət başçısının tövsiyələri də maraqlı olub: "Görüşdə çox səmimi söhbət oldu və bu səmimiyyət bütövlükdə jurnalistikada doğru danışmaq, həqiqəti söyləmək, problemləri haqlı təhlil etmək və düzgün nəticə çıxarmaq baxımından müsbət qiymətləndirilir. Prezidentin özünün bu məsələyə xüsusi fikir verməsi və "mən dostluqda sadiqəm" deməsi jurnalistlər tərəfindən də böyük rəğbətlə qarşılandı. Çünki biz, Prezidentin təkcə tövsiyələrinə əməl etmirik, həm də ona güvənirik. Biz bilirik ki, istər praktik jurnalistikanın, istərsə də elmi nəzəri axtarışların bu yöndə yol göstəricisi dövlət başçısının özüdür. Bütün bunlara ona görə inanıram ki, bu dostluq əbədi olacaq"

Mətbuat Şurasının İdarə Heyətinin üzvü, Jurnalistlərin Həmkarlar İttifaqının (JHİ) sədri Müşfiq Ələsgərli isə bildirdi ki, görüşün formatı Prezidentə təqdim edilən mükafatla bağlı olsa da, ölkə başçısı vaxt ayırıb jurnalistlər və media rəhbərləri ilə geniş, səmərəli müzakirə keçirdi. Bu, Prezidentin geniş jurnalist auditoriyası ilə son üç il ərzində təşkil olunan təqribən dördüncü görüşü idi. 2010-cu ildə Mətbuat Şurasında, sonra Gülüstan sarayında geniş toplantı oldu. Daha sonra iyul ayında jurnalistlər üçün tikilən binadakı mənzillərin təqdim olunması mərasimi və nəhayət, 24 noyabr görüşü keçirildi.

Müşfiq Ələsgərli hesab edir ki, bu görüş Prezidentin mediaya olan böyük diqqət və qayğısının göstəricisidir: "Görüş zamanı media işçiləri problemləri ilə bağlı Prezidentə informasiya verdilər. Biz Prezidentin bu məsələlərdən xəbərdar olduğunun şahidinə çevrildik. Dövlət başçısının qaldırılan məsələlərə verdiyi reaksiya onu deməyə əsas verir ki, medianın problemləri ilə intensiv maraqlanır və onların aradan qaldırılması üçün səy göstərir. Prezident bu məsələlərin jurnalistlərin dilindən səslənməsinə üstünlük verdi və problemlərin sadalanması ilə yanaşı, həm də mövcud durumun daha da normallaşdırılması yönündə təklifləri eşitdi. Jurnalistlərə zəruri hesab etdikləri problem barədə ətraflı danışmaq və fikir mübadiləsi aparmaq üçün şərait yaradılması çox yaxşı haldır. Ondan da yaxşı hal Prezidentin reaksiyasının çox gecikməməsidir". Onun fikrincə, adətən belə görüşlərdə problemlər dinlənilir, bir müddət sonra isə müsbət və ya mənfi olmasından asılı olmayaraq həmin məsələyə münasibət bildirilir. Amma burada qaldırılan problemlərə Prezident dərhal reaksiya verdi. Bu, çox xoş haldır.

M.Ələsgərlinin sözlərinə görə, Azərbaycanda medianın inkişafı üçün çox böyük addımlar atılır, mühüm işlər görülür. Daxil olduğumuz region dövlətləri və tarixən münasibətdə olduğumuz ölkələrlə müqayisə aparsaq Azərbaycanda medianın inkişafı üçün bir çox gərəkli layihələrin həyata keçirildiyinin şahidi olarıq. Ölkəmizdə bu inkişafa dialoq vasitəsilə nail olunub. Ölkə rəhbərliyi ilə jurnalistlərin, media rəhbərlərinin bu cür səmimi diskussiyaları dəfələrlə keçirilib. Nəticə də göz qabağındadır. Nailiyyətlərin hər birinin səbəbi ölkə başçısının apardığı sağlam dialoqun üzərində qurulub: "Ona görə də bu cür müzakirələrin, diskussiyaların davamlı olmasını arzu edirəm. Hesab edirəm ki, belə olan halda Azərbaycan mediası daha da irəli gedib ən böyük nailiyyətləri qazana bilər".

Mətbuat Şurasının İdarə Heyətinin üzvü, "Paralel" qəzetinin baş redaktoru Tapdıq Abbas isə Prezident İlham Əliyevlə ölkənin aparıcı media kapitanlarının görüşünün kütləvi informasiya vasitələrində geniş müzakirə mövzusuna çevrildiyini bildirdi. Görüşdə iştirak edən hər kəs bu hadisəyə böyük önəm verir, onun ölkə mediasının inkişafına, azad sözün və mətbuatın daha da güclənməsinə səbəb olacağından söz açır. Onun sözlərinə görə, əgər ölkə Prezidenti mətbuata qayğını diqqətdən kənarda saxlasaydı, çox güman ki, hazırkı isti münasibətlərin yaranması mümkün olmazdı: "Ölkədə mətbuatın inkişafına son illər göstərilən dövlət qayğısının təşkilatçısı, memarı və müəllifi təbii ki, Prezident İlham Əliyevdir. Prezidentin mətbuata bunca yüksək diqqət yetirməsi hər şeydən öncə ölkə başçısının dövlətin uğurla idarə olunmasında mətbuatın roluna yüksək qiymət verməsi ilə bağlıdır. Hazırda postsənaye cəmiyyətindən sürətli informasiya cəmiyyətinə keçid həyatımıza daxil olan bir sıra hadisələrə yeni baxış formalaşdırmaqdadır, xüsusən, internet medianın bütün digər medianı üstələməsi, informasiyanın əldə edilməsi, emal olunması və ötürülməsinin tam yeni forma və məzmun kəsb etdiyindən xəbər verir. Təsadüfi deyil ki, ölkə başçısı jurnalistlərlə görüşdə Azərbaycanda azad medianın nümünəsi kimi internet medianın sürətlə inkişaf etdirilməsində dövlətin rolunu xüsusi vurğuladı. Eyni zamanda ölkə əhalisinin 70 faizinin internetdən istifadə etdiyini qeyd etdi".

T.Abbas hesab edir ki, jurnalistlərlə Prezidentin görüşündə uduzan tərəf olmadı. Bu görüşdən həm ölkə jurnalistikası, həm də Azərbaycan dövləti uğur qazandı. Dövlət başçısının çıxışında aydın hiss olunan səmimiyyət hər bir iştirakçı üçün böyük enerji mənbəyi rolunu oynadı. Azərbaycan Prezidentinin fəaliyyətinin nəticələri, onun mətbuata münasibəti və qayğısı hər kəsin gözünün önündədir. Bunları danmaq və üzərinə ləkə salmaq üçün dəridən-qabıqdan çıxanların mənəvi korluğu hər kəs tərəfindən aydın müşahidə olunmaqdadır.

"Editor.az" İnformasiya Portalının baş redaktoru Fərid Şahbazlı isə hesab edir ki, Prezident İlham Əliyevlə media nümayəndələri arasında baş tutan görüş ölkə başçısının jurnalistlərə olan yüksək diqqət və ehtiramının ifadəsi idi. Bu görüş Azərbaycan mediasının gələcək inkişaf perspektivləri və mövcud çətinliklərinin aradan qaldırılması baxımından olduqca faydalı hadisədir: "Prezident görüşdə Azərbaycan mətbuatının dünəni, bugünü və gələcəyini təsvir edən olduqca məzmunlu çıxış etdi. İlham Əliyev öz çıxışında mətbuatımızın hazırkı durumu və gələcəyi ilə bağlı əhəmiyyətli mesajlar verdi. Düşünürəm ki, Prezidentin çıxışında əksini tapan məqamlar, mediaya münasibətini əks etdirən fikirlər Azərbaycanda müstəqil mətbuatın inkişaf prosesini daha da sürətləndirəcək".

F.Şahbazlının fikrincə, Prezident İlham Əliyevə təqdim edilən "Jurnalistlərin dostu" mükafatı Azərbaycan jurnalistlərinin mütləq əksəriyyətinin mövqeyini ifadə edir. Prezident İlham Əliyev hakimiyyətə gəldiyi ilk gündən ulu öndər Heydər Əliyevin əsasını qoyduğu mətbuata dəstək siyasətini bu gün uğurla davam etdirir. KİVDF-nin yaradılması, Mətbuat Şurasına yeni və modern inzibati binanın ayrılması, jurnalistlərin mənzillərlə təmin edilməsi, mətbu orqanlara birdəfəlik yardımların olunması, müxtəlif şəxsi problemləri olan jurnalistlərə fərdi qaydada diqqətin göstərilməsi dediklərimizin təsdiqi rolunda çıxış edir: "Bu danılmaz gerçəklikdir ki, KİVDF xətti ilə ayrılan yardımlar, verilən mənzillər heç bir fərq qoyulmadan hətta ən aqressiv müxalifət mətbuatına belə şamil edilir. Bütün bunlar isə Azərbaycan iqtidarının ölkədə azad və müstəqil mətbuatın inkişafında maraqlı olduğunun göstərcisidir. Bu mənada hesab edirəm ki, Prezidentin ikinci dəfə "Jurnalistlərin dostu" mükafatı ilə təltif olunması dövlət başçısının mətbuata dəstək siyasətininin məntiqi yekunudur".

Rəşad BAXŞƏLİYEV,

Azərbaycan.-2013.- 30 noyabr.- S.8.