Azərbaycanın xarici işlər naziri BMT Təhlükəsizlik Şurasında atıcı və yüngül silahların tətbiqi və yayılması məsələlərinə dair bəyanat vermişdir

Nyu-Yorkda BMT Baş Məclisinin 68-ci sessiyasında iştirak edən Azərbaycan Respublikasının xarici işlər naziri Elmar Məmmədyarov atıcı və yüngül silahların istifadəsi məsələlərinə dair bəyanatla çıxış etmişdir.

BMT Təhlükəsizlik Şurasında Avstraliyanın sədrliyi dövründə atıcı və yüngül silahların istifadəsi məsələlərinə dair görülmüş işləri dəstəkləyən, sessiyada problemə dair məlumat verilməsinə görə BMT-nin baş katibinə və Beynəlxalq Qızıl Xaç Komitəsinin vitse-prezidentinə minnətdarlığını bildirən E.Məmmədyarov bu məsələnin müzakirə olunmasının əhəmiyyətini vurğulamışdır. Bildirmişdir ki, çünki bu, Təhlükəsizlik Şurasının münaqişə və postmünaqişə vəziyyətlərində atıcı və yüngül silahlardan istifadə olunması məsələlərinə dair qərarlarının səmərəliliyini qiymətləndirməyə, möhkəmləndirmə və reaksiyavermə metodlarını nəzərdən keçirməyə imkan verir. Bu da öz növbəsində müvafiq beynəlxalq öhdəliklərin yerinə yetirilməsinə təkan verəcəkdir. Diplomat vurğulamışdır ki, atıcı və yüngül silahların qanunsuz yerdəyişməsi, pozucu akkumulyasiyası, düzgün tətbiq edilməməsi böyük problemlər, o cümlədən münaqişə və zorakılıq üçün şərait yaradır. Azərbaycan atıcı və yüngül silahların qanunsuz istehsalının, yerdəyişməsinin, dövr etməsinin, lazımsız akkumulyasiyasının və nəzarətsiz proliferasiyasının qarşısının alınmasına, aradan qaldırılmasına dair beynəlxalq təşəbbüs və metodları tam dəstəkləyir.

Bəyanatda deyilir ki, Azərbaycan yuxarıda deyilən məsələlər üzrə bütün öhdəlikləri yerinə yetirmək və məqsədə çatmaq üçün dövlət, regional və qlobal səviyyələrdə müvafiq tədbirlər görməyə davam edir.

Sonra E.Məmmədyarov Azərbaycan ərazilərinin Ermənistan tərəfindən davamlı işğalının yaratdığı ciddi maneələrdən söz açmışdır. Beynəlxalq hüquq normalarını və üzvü olduğu təşkilatların müvafiq regional sənədlərinin bəndlərini pozan Ermənistan Azərbaycanın işğal edilmiş ərazilərində hərbi potensialını artırmaqda davam edir. Atıcı, yüngül və adi silahlar beynəlxalq birliyin nəzarətində olmayan işğal edilmiş ərazilərə külli miqdarda daxil olmaqdadır.

Nazir sonda bildirmişdir ki, Azərbaycan Ermənistan tərəfindən işğal edilmiş ərazilərində bu dövlət tərəfindən atıcı və yüngül silahların, habelə digər adi silahların qanunsuz şəkildə yerdəyişməsi barədə beynəlxalq birliyi dəfələrlə məlumatlandırmışdır. Biz bütün dövlətlərə müraciət edərək onları Azərbaycanın suverenliyini və ərazi bütövlüyünü pozan, regionumuzda sülhün və tərəqqinin bərqərar olunmasına əngəl törədən belə qanunsuz hərəkətlərə yol verməməyə, onları pisləməyə və qarşısını almağa çağırırıq.

Yusif BABANLI,

AzərTAc-ın xüsusi müxbiri

Vaşinqton

Azərbaycan.-2013.- 1 oktyabr.- S.5.