«Səs ver» kampaniyası uğurla davam edir

MSK-nın və "İrəli" İctimai Birliyinin birgə layihəsi artıq əməli nəticələrini verir

Ölkəmizdə keçiriləcək prezident seçkilərinə cəmi 6 gün qalır. Seçkilərin demokratik, ədalətli və tam şəffaf baş tutması, namizədlərin bərabər şəkildə təbliğat-təşviqat kampaniyası aparması üçün bütün şərait yaradılıb. İndiyədək Mərkəzi Seçki Komissiyasına dairə və məntəqə seçki komissiyaları ilə bağlı şikayət daxil olmayıb.

Bütün bunlarla bərabər həm Mərkəzi Seçki Komissiyası, həm də qeyri-hökumət təşkilatları, ictimai birliklər vətəndaşların seçkilərdə fəal iştirak etməsi üçün bir çox tədbirlər həyata keçirirlər. Xüsusi ilə də seçkilərdə gənclərin aktivlik nümayiş etdirməsi üçün layihələr hazırlanıb. Seçki hüququ olan gənclərin prezident seçkilərində fəal iştirakı üçün ilk dəfə olaraq həyata keçirilən "Səs ver" kampaniyası bütün Azərbaycanı əhatə etdi. Bir ay müddətində gəncləri müxtəlif yollarla seçkiyə səsləyən və bu gün də səsləməkdə olan kampaniya "İrəli" İctimai Birliyinin təşəbbüsü ilə reallaşır. Mərkəzi Seçki Komissiyasının dəstək verdiyi bu kampaniya seçki gününə qədər davam edəcək. Bütün bu məsələlər, gələcək planlar barədə məlumat almaq üçün layihəni həyata keçirən "İrəli" İctimai Birliyinin sədri Rauf Mərdiyevlə söhbətləşdik.

Öncə onu qeyd edək ki, 2008-ci ildən neft kapitalının insan kapitalına çevrilməsi istiqamətində bir çox uzunmüddətli layihələr həyata keçirən İctimai Birlik gənclərə xüsusi önəm verir. Bu səbəbdən "İrəli" İctimai Birliyi insan kapitalının inkişafına yönəlmiş fəaliyyəti gənc peşakarlarla birgə həyata keçirir. "İrəli"də fərdi və kollektiv üzvlük sistemi mövcuddur. Hazırda 36 000 nəfərdən artıq gəncin və 12 təşkilatın üzvü olduğu "İrəli"nin 2008-ci ildən bu günə qədər həyata keçirdiyi 300-dən artıq layihənin əhatə dairəsinə 180 000 nəfərdən çox insan daxil olub. Bu gün "İrəli"nin fəaliyyəti Azərbaycanın bütün rayon və şəhərlərini əhatə edir və dünyanın 30-a yaxın ölkəsində əməkdaşlıq etdiyi təşkilatlar mövcuddur. Rauf Mərdiyev deyir ki, rəhbəri olduğu birlik hər zaman gənclər üçün maraqlı olan mövzularla bağlı layihələr həyata keçirir. "İrəli"nin fəaliyyəti daim artan templə inkişaf edir. Hər il həyata keçirdiyi layihələrin, üzvlərin sayı artmaqdadır. Onun fikrincə, "İrəli" Azərbaycan gəncliyinin həm özü, həm vətən, həm də digər gənclər üçün faydalı olacaq işləri həyata keçirdiyi bir platformadı.

Rauf Mərdiyev deyir ki, ölkədə həyata keçirilən bütün ictimai-siyasi proseslərdə gəncləri fəal olmağa çağıran "İrəli" 2013-cü ilin oktyabrın 9-da Azərbaycanda keçiriləcək prezident seçkilərində də öz missiyasını davam etdirmək qərarına gəlib. İctimai Birlikdə aparılan müzakirələrdən sonra qərara alınıb ki, gənclərin seçkilərdə fəal iştirakı, onların maarifləndirilməsi istiqamətində bütün Azərbaycanı əhatə edəcək böyük kampaniya həyata keçirilsin: "Biz prezident seçkilərinin statistikasını apardıq və gördük ki, təxminən 5 milyon nəfərə yaxın seçici səsvermədə iştirak edəcək və onların 2 milyon nəfəri, yəni 40 faizi gənclərdir. Gənclər arasında təxminən 500 min nəfəri ilk dəfə prezident seçkilərində səs verəcək ki, bu da ümumi seçicilərin 10 faizini təşkil edir. Oktyabrın 9-da isə 150 gənc seçicinin 18 yaşı tamam olacaq. Ona görə də qərara gəldik ki, bu gənclərin səsvermədə fəal iştirakına kömək məqsədi ilə kampaniya fəaliyyətə başlasın. Kampaniyanın adı isə "Səs ver" adlandı. Biz bu təşəbbüslə Mərkəzi Seçki Komissiyasına müraciət etdik və dəstək aldıq".

Rauf Mərdiyev bildirdi ki, Azərbaycanda ilk olaraq həyata keçirilən "Səs ver" kampaniyasının məqsədi qarşıdan gələn seçkilərdə səsvermə hüququndan birinci dəfə istifadə edəcək gənclərin maarifləndirilməsi, onların seçkilərdə fəal iştiraka həvəsləndirilməsi, gənclər arasında fəal vətəndaşlığın təbliği, bütün ölkə üzrə ilk dəfə səs verəcək gənclərin şəbəkəsinin yaradılmasını təmin etməkdir. Azərbaycanın ictimai-siyasi həyatında fəal mövqeyə yüksəlmiş "İrəli" İctimai Birliyinin həyata keçirdiyi bu möhtəşəm layihənin internet saytı (www.sesver.az) da fəaliyyət göstərir. Kampaniya çərçivəsində gənclərin seçkidə fəal iştirakını təmin etmək üçün keçiriləcək silsilə təlimlərin təşkilatçılığını reallaşdıracaq heyət hazırlanıb. Seçki mütəxəssisləri tərəfindən hazırlanan 20 nəfərlik qrup təlimlərə başlayıblar. Kampaniya çərçivəsində gənclərin yürüşləri təşkil olunub və müxtəlif "flashmob"lar, seçkilərdə səs verəcək şəxsləri maarifləndirmək üçün məlumat kitabçaları hazırlanıb. Məlumat kitabçalarında seçkilər haqqında ümumi məlumat, Azərbaycan Respublikasında prezident seçkiləri, seçicinin hüquq və öhdəlikləri, eyni zamanda ilk dəfə səs verən gənclər üçün təlimatlar yer alıb. Hər bir gəncin oxuyub anlayacağı formada hazırlanan kitabçada seçki prosesi ilə bağlı bütün məlumatlar var. Eyni zamanda gənclərin seçkilərlə bağlı maarifləndirilməsi məqsədilə təlimat vərəqələri hazırlanıb. Vərəqələrdə seçkilər və seçki prosesi barədə faydalı məlumatlar əks olunub. Bu məlumatlandırıcı vasitələr sosial şəbəkələrdə də yayılıb.

Rauf Mərdiyevin sözlərinə görə, sentyabrın 18-də "Səs ver" kampaniyasının könüllüləri Bakı şəhərinin mərkəzində aksiya keçiriblər. Aksiyada gəncləri seçkilərdə fəal iştiraka səsləyən broşurlar paylanıb. 30 nəfər "Səs ver" könüllüsünün qoşulduğu aksiya bir saat davam edib. Sentyabrın 19-da isə Dənizkənarı Milli Parkda veloyürüş təşkil ediblər. Gənclər tərəfindən təşkil edilmiş yürüş şəhər sakinlərinin böyük marağına səbəb olub. Yürüş zamanı könüllülər tərəfindən gəncləri seçkilərdə fəal iştiraka səsləyən broşurlar paylanıb.

Kampaniya çərçivəsində bir neçə rayonda təlim keçirilib və seçki gününə qədər bu təlimlər davam edəcək. İlk təlim 27 sentyabr 2013-cü il tarixində İsmayıllı rayonunda 100 gəncin iştirakı ilə, 28 sentyabrda isə Qobustanda 200 gəncin iştirakı ilə baş tutub. Təlimlər müddətində "Səs ver" kampaniyasının təlimçiləri tərəfindən gənclərə seçki, seçki hüququ, seçki prosesi barədə ətraflı məlumat verilib, məlumatlandırıcı kitablar paylanılıb. Xüsusilə ilk dəfə səs verəcək gənclər səsvermə proseduru barədə ətraflı məlumatlandırılıblar.

Digər bir təlim isə 30 sentyabr 2013-cü il tarixində Azərbaycan Əmək və Sosial Münasibətlər Akademiyasında 300 gəncin iştirakı ilə baş tutub. 1 oktyabr tarixində isə Bakı Dövlət Universitetində 100 nəfərə yaxın tələbənin iştirakı ilə növbəti təlim keçirilib. Dünən isə təlimçilər Biləsuvar rayonunda gənclərin maarifləndirilməsi istiqamətində təlimlər həyata keçiriblər. Bu təlimdə 300-dən artıq gənc iştirak edib. Səsvermə gününə qədər davam edəcək təlimlər digər universitetlərdə və rayonlarda da həyata keçiriləcək.

Onu da əlavə edək ki, kampaniyanın himni də yazılıb. Gəncləri seçkilərdə fəal olmağa səsləyən "Səs ver" himni "soft rock" janrındadır. Himnə klip də çəkilib.

Rauf Mərdiyev kampaniya çərçivəsində yaradılan internet saytı barədə də məlumat verdi. Saytda seçkilər, prosedur qaydası, səsvermə ilə bağlı təlimatlar, xəbərlər, adının seçici siyahısında olub-olmadığını dəqiqləşdirmə və digər faydalı məlumatlar yer alıb. Həmçinin saytda namizədlər, mövcud qanunvericiliklə bağlı məlumat və seçki ilə əlaqədar sorğular da yer alıb. Tanınmış şəxslərin gənclərə müraciəti və digər maraqlı məlumatlar sayta daxil olanlarda xoş təəssürat yaradır. Kampaniyanın rəhbəri deyir ki, 1 ay müddətində görülən işlər gənclər arasında böyük dəstək qazanıb: "Apardığımız araşdırmalara görə, gənclər bu kampaniyada aktiv iştirak edirlər. Saytımıza daxil olanların statistikasını da apardıqda bəlli olur ki, hər gün mindən artıq gənc kampaniya ilə maraqlanır. Azərbaycanda ilk dəfə olaraq seçki ilə bağlı yaradılmış bu kampaniya gənclərin maarifləndirilməsi istiqamətində vacib işlər həyata keçirdi. Mərkəzi Seçki Komissiyasının dəstəyi ilə həyata keçirdiyimiz bu layihəni uğurlu layihə hesab etmək olar".

Sonda qeyd edək ki, bu layihə Azərbaycanda bir çox yeniliklərə imza atıb. İlk dəfə gənclərin seçkilərdə fəal iştirak etməsinin, gənclərin seçki proseduru ilə bağlı maarifləndirilməsinin məhz gənclər tərəfindən həyata keçirilməsi, kampaniyanın ideya müəllifliyi və onu həyata keçirənlərin yalnız gənclərdən ibarət olması, istənilən gəncin başa düşə biləcəyi formada hazırlanmış təlimat kitabçaları və kampaniyanın "soft rock" janrında himninin hazırlanması "İrəli" İctimai Biliyinin Azərbaycanda növbəti "ilklərə" imza atdığını bir daha sübuta yetirir.

Rəşad BAXŞƏLİYEV,

Azərbaycan.-2013.- 3 oktyabr.- S. 5.