Kişineuda MDB üzvü olan ölkələrin Dövlət İnformasiya

Agentliklərinin Rəhbərləri Şurasının XVII iclası olmuşdur

AzərTAc-ın baş direktoru Aslan Aslanov "MDB-nin

yubiley gümüş medalı"na layiq görülmüşdür

Oktyabrın 4-də Moldovanın paytaxtı Kişineuda MDB üzvü olan ölkələrin Dövlət İnformasiya Agentliklərinin Rəhbərləri Şurasının (MDB İnformşura) XVII iclası olmuşdur.

İclasda Moldova, Azərbaycan, Rusiya, Qazaxıstan, Belarus, Tacikistan, Qırğızıstan, Ukrayna və Ermənistanın informasiya agentliklərinin, MDB İcraiyyə Komitəsinin rəhbərləri və nümayəndələri iştirak etmişlər. Tədbirdə AzərTAc-ı Rus dilində informasiya baş redaksiyasının baş redaktoru Tamilla Nuriyeva təmsil edir.

AzərTAc xəbər verir ki, İTAR-TASS agentliyinin baş direktorunun birinci müavini Mixail Qusmanın sədrlik etdiyi iclasın gündəliyinə 2014-cü ildə informasiya sahəsində əməkdaşlıq məsələləri, MDB Milli İnformaisya Agentlikləri Assosiasiyası (ANİA) çərçivəsində müştərək layihələr, 2013-cü ildə Belarus Respublikasının ANİA-da sədrliyinin kütləvi informasiya vasitələrində işıqlandırılması və başqa məsələlər daxil idi.

Moldpress agentliyinin baş direktoru Vladimir Dariye bu agentliyin fəaliyyəti haqqında məruzə ilə çıxış etmişdir.

İclasın gündəliyinə, həmçinin Böyük Vətən müharibəsində Qələbənin 70 illiyi bayramına hazırlıq, "Birliyin əlamətdar və tarixi hadisələri" elektron təqviminin yaradılması, müştərək yaradıcılıq müsabiqələrinin keçirilməsi, agentliklərin qarşılıqlı fəaliyyəti prosesində müasir informasiya-kommunikasiya texnologiyalarından istifadə, habelə şuranın növbəti iclasının vaxtı və keçiriləcəyi yer haqqında məsələlər də daxil idi.

MDB İcraiyyə Komitəsinin İnformasiya-Təhlil Departamentinin direktoru Aleksandr Zavarzin AzərTAc-ın baş direktoru Aslan Aslanovun və "Qazaxıstan İnformasiya Agentliyi" Milli şirkətinin - KAZİNFORM-un prezidenti Dauren Diyarovun MDB iştirakçısı olan dövlətlərin inteqrasiyasının inkişafına verdikləri töhfəyə görə "MDB-nin yubiley gümüş medalı"na layiq görüldüyünü elan etmişdir.

Elə həmin gün MDB İnformasiya Şurasının iclasının iştirakçılarının Moldovanın Baş naziri Yuri Lyanke və Moldova Dövlət Universitetinin jurnalistika fakültəsinin tələbələri ilə görüşü olmuşdur.

Azərbaycan.-2013.- 5 oktyabr.- S.8.