Bakıda gənc rus dili müəllimlərinin, aspirantların və rusist tələbələrin «MDB-də inteqrasiya proseslərinin inkişafının əsası olan rus dilinə dəstək» mövzusunda regional forumu başa çatmışdır

Bakıda gənc rus dili müəllimlərinin, aspirantların və rusist tələbələrin "MDB-də inteqrasiya proseslərinin inkişafının əsası olan rus dilinə dəstək" mövzusunda regional forumu başa çatmışdır.

Xatırladaq ki, forum Müstəqil Dövlətlər Birliyinin, Xarici Ölkələrdə Yaşayan Həmvətənlərin İşləri və Beynəlxalq Humanitar Əməkdaşlıq üzrə Federal Agentlik (Rossotrudniçestvo) və L.N.Tolstoy adına Tula Dövlət Pedaqoji Universiteti (TDPU) tərəfindən "Rus dili (2011-2015-ci illər)" məqsədli Federal proqramı çərçivəsində keçirilmişdir.

Oktyabrın 4-də TDPU-nun mütəxəssisləri Rusiya İnformasiya və Mədəniyyət Mərkəzində gənc yerli rusist müəllimlər və orta məktəblərin rus dili və ədəbiyyatı müəllimləri üçün ustad dərslərin, metodiki seminarların, açıq dərslərin və viktorinaların keçirilməsini başa çatdırmışlar.

RİMM-in mətbuat xidmətindən bildirmişlər ki, yeni tanışlıqlar, yeni adlar və yeni ideyalar müəllimlər və dinləyicilər üçün əhəmiyyətli və faydalı olmuşdur. Rusiya müəllimləri görüşü yekunlaşdıraraq son tövsiyə və məsləhətlərini vermişlər. Azərbaycan və Gürcüstandan olan həmkarları isə yekun materialların qısa müddətdə onlara göndərilməsini xahiş etmişlər, çünki həmin materiallar ali və orta məktəblərdə məşğələlərin hazırlanması və aparılması üçün son dərəcə əhəmiyyətlidir.

Gənc rus dili müəllimlərinin, aspirantların və rusist tələbələrin "MDB-də inteqrasiya proseslərinin inkişafının əsası olan rus dilinə dəstək" mövzusunda regional forumunun bütün iştirakçıları müvafiq sertifikatlar almışlar.

Forum günlərində Bakıda "Mir" telekanalının çəkiliş qrupu işləmişdir. Forum iştirakçıları iki filmin birdən - rusiyalı həmvətənlərin həyatı və MDB ölkələrində rus dilinin əhəmiyyəti barədə filmlərin qəhrəmanları olmuşlar.

Həmin filmlər 2013-cü ilin sonunadək televiziya ilə nümayiş etdiriləcəkdir.

AzərTAc

Azərbaycan.-2013.- 5 oktyabr.- S.9.