Avropa Parlamenti müşahidə missiyasının üzvləri Milli Məclisdə olmuşlar

Azərbaycanda prezident seçkiləri üzrə müşahidə missiyasının rəhbəri Pino Arlaçinin başçılıq etdiyi Avropa Parlamentinin nümayəndə heyəti oktyabrın 7-də Milli Məclisin Sədri Oqtay Əsədov ilə görüşmüşdür.

Azərbaycanda artıq yeddinci dəfə prezident seçkilərinin keçirildiyini qeyd edən Milli Məclisin Sədri hər seçkidən sonra ölkəmizin təcrübəsinin daha da artdığını vurğulamışdır. Oktyabrın 9-da ölkəmizdə keçiriləcək prezident seçkilərini 40 minə yaxın müşahidəçinin izləyəcəyini deyən Oqtay Əsədov onlardan 1300 nəfərinin beynəlxalq müşahidəçi olduğunu diqqətə çatdırmışdır.

Avropa Parlamentinin deputatları Azərbaycanın Avropa İttifaqı və Avropa Parlamenti ilə səmərəli əməkdaşlığından razılıqlarını ifadə edərək bu seçki prosesini yaxından izləyəcəklərini söyləmişlər.

Görüşdə Ermənistan-Azərbaycan, Dağlıq Qarabağ münaqişəsinin nizamlanması məsələsindən də danışan deputatlar bu problemin son vaxtlar təşkilatın toplantılarında mütəmadi qaldırıldığını bildirmişlər.

Qeyd olunmuşdur ki, Ermənistan silahlı qüvvələrinin işğal altında saxladığı Azərbaycan ərazilərindən çıxarılması məsələsi qurumun qəbul etdiyi bütün sənədlərdə əksini tapır.

AzərTAc,

Azərbaycan.-2013.- 8 oktyabr.- S.4.