Natali QULE: «9 oktyabr seçkilərinin yüksək

səviyyədə keçirilməsi üçün geniş hazırlıq görülmüşdür»

"Mən Azərbaycan ilə 10 ildir ki, tanışam. Hər gəlişimdə inkişafın yeni mərhələsinin şahidi oluram. Bu, məni sevindirir. Çünki bu inkişaf seçki sisteminin təkmilləşdirilməsində özünü göstərir".

Müstəqil Mətbuat Mərkəzindən AzərTAc-a bildirmişlər ki, bu sözləri jurnalistlərə Fransa Senatının üzvü, Senatın müşahidə missiyasının rəhbəri Natali Qule söyləmişdir.

Natali Qule demişdir: "Biz oktyabrın 9-da keçiriləcək prezident seçkilərinə hazırlığın vəziyyətini öyrənmək və səsverməni izləmək üçün Azərbaycana gəlmişik. Artıq iki gündür ki, Bakıdayıq. Seçkilərə hazırlığın vəziyyəti ilə maraqlanmışıq və missiyanın ilkin təəssüratları müsbətdir. Mərkəzi Seçki Komissiyası seçkilərin yüksək səviyyədə təşkili üçün hər işi görmüşdür. Bəzi insanlar və beynəlxalq təşkilatlar hər şeyi gözləri ilə görmədən, dərindən öyrənmədən fikir söyləyirlər. Hesab edirəm ki, bu, düzgün deyildir. Biz bölgələrə də gedəcəyik və səsvermənin gedişini yerlərdə izləyəcəyik".

Fransa Senatının müşahidə missiyasının digər üzvü Mairde de Qerdon demişdir: "Azərbaycanda seçkilərə hazırlıqla bağlı fikirlərimiz müsbətdir. İnanırıq ki, oktyabrın 9-da - səsvermə günündə ən yaxşı beynəlxalq təcrübənin şahidi olacağıq".

Azərbaycan.-2013.- 9 oktyabr.- S. 5.