Maykl Makmahn - ABŞ müşahidə missiyasının üzvü: Azərbaycanda

seçkilər ədalətli, azad və şəffaf, eləcə də beynəlxalq

standartlara uyğun keçirilmişdir

Azərbaycanda keçirilən prezident seçkilərini izləmək üçün Amerikanın müxtəlif ştatlarından Bakıya 47 müşahidəçi gəlmişdir. Onlar 24 qrupda paytaxt Bakıda və ətraf bölgələrdə 250-dən çox məntəqədə səsvermənin gedişini izləmişlər.

Müstəqil Mətbuat Mərkəzindən AzərTAc-a bildirmişlər ki, bu məlumatı ABŞ-dan gəlmiş seçkiləri müşahidə missiyasının üzvü, keçmiş konqresmen Maykl Makmahn oktyabrın 9-da seçkilərin nəticələri ilə bağlı keçirdikləri mətbuat konfransında söyləmişdir.

O demişdir ki, ABŞ-dan gəlmiş müşahidəçilər qrupuna sabiq konqresmenlərlə yanaşı, tanınmış siyasətçilər, siyasi şərhçilər, jurnalistlər daxildirlər. Müşahidə missiyasının üzvləri səsvermə zamanı qanun pozuntusu aşkar etməyiblər. M.Makmahn demişdir: "Seçkilərin təşkili və səsvermə ilə bağlı siyasi partiyaların nümayəndələrinin, prezidentliyə namizədlərin təmsilçiləri, müşahidəçilərlə söhbətlər aparmışıq. Onlar da seçkilərin gedişindən razılıqlarını bildirmişlər. Müşahidə zamanı biz seçicilərin səsvermə zamanı şəxsiyyətini təsdiq edən sənədi təqdim edərək bülleten götürməsinin, barmaqların xüsusi mürəkkəblə rənglənməsinin, eləcə də seçici fəallığının şahidi olduq. Ona görə də deyə bilərik ki, seçkilər ədalətli, azad və şəffaf, eləcə də beynəlxalq standartlara uyğun keçirilmişdir".

Maykl Makmahn ABŞ müşahidə missiyasına göstərdikləri qonaqpərvərliyə görə Azərbaycan xalqına minnətdarlıq etmişdir.

Azərbaycan.-2013.- 10 oktyabr.- S.4.