Azərbaycan - tolerant və demokratik müsəlman ölkəsi

Oktyabrın 15-də ABŞ-ın nüfuzlu, Vaşinqtonun siyasi dairələrində populyar olan "The Hill" qəzeti "Caspian Group Holdings" şirkətinin prezidenti, politoloq Rob Sobhaninin "Azərbaycan - tolerant və demokratik müsəlman ölkəsi" sərlövhəli məqaləsini dərc etmişdir.

Müəllif yazır ki, oktyabrın 9-da Azərbaycanda keçirilmiş prezident seçkiləri "Qərb müşahidəçilərinin tanış tənqidinə" tuş gəlmişdir, lakin eyni zamanda, ABŞ-ın siyasi tədqiqatçısı Artur Finkelstaynın səs verdikdən sonra məntəqələri tərk edən seçicilər arasında apardığı sorğuya əsasən, Prezident İlham Əliyev səslərin 82,7 faizini qazanmışdır. Prezident İlham Əliyevin rəhbərliyi zamanı Azərbaycanın qazandığı uğurları təhlil edən R.Sobhani bildirir ki, ümumi daxili məhsulun artımı ildə orta hesabla 10 faiz təşkil etmişdir ki, bu da sabit iqtisadi artım və iş yerlərinin yaradılması üçün stimul olmuşdur.

Məqalədə vurğulanır ki, Prezident İlham Əliyevin rəhbərliyi dövründə Azərbaycanın əldə etdiyi uğurlar arasında dini tolerantlıq ənənələrinin qorunub saxlanması xüsusi yer tutmuşdur. Hökumət Bakıda iri sinaqoqların tikintisi üçün resurslar ayırmışdır. Müəllifin fikrincə, Azərbaycan xalqı İlham Əliyevə həm də ona görə səs vermişdir ki, o, Vaşinqton ilə və beynəlxalq arenadakı digər iri siyasi oyunçularla yaxşı əlaqələr saxlayır. Bakı və Vaşinqton üçün nailiyyətlərdən və məqsədlərdən biri Xəzər dənizindən enerji resurslarının Avropa bazarlarına və daha uzağa fasiləsiz ötürülməsidir.

Prezident İlham Əliyev və birinci xanım Mehriban Əliyeva iri beynəlxalq tədbirlərin keçirilməsi ilə Azərbaycanın mədəniyyətini, musiqisini, tarixini və irsini uğurla təbliğ edirlər. R.Sobhani yazır ki, Prezident İlham Əliyev növbəti rəhbərliyi müddətində həlli vacib olan iki əsas vəzifə müəyyənləşdirmişdir: korrupsiya ilə mübarizə və Dağlıq Qarabağ münaqişəsinin nizamlanması.

Sonda R.Sobhani Prezident Barak Obamanı Dağlıq Qarabağ münaqişəsinin nizamlanması prosesinin təməlinin qoyulması üçün Prezident İlham Əliyevi Vaşinqtona dəvət etməyə çağırmışdır. Müəllif onu da qeyd etmişdir ki, Prezident İlham Əliyevin yenidən dövlət başçısı seçilməsi Xəzər dənizindən neft və qazın Qərb bazarlarına ixracında Azərbaycanın etibarlı tərəfdaş kimi uzunmüddətli rolunu təmin edir, eləcə də müsəlman dünyası üçün dövlətin yüksək səviyyədə idarə olunmasının nümunəsidir.

Azərbaycan.-2013.- 18 oktyabr.- S.13.