Azərbaycanın dəyişməz seçimi: HEYDƏR ƏLİYEV

siyasi kursu - İLHAM ƏLİYEV missiyası

"İlkin nəticələrə görə seçicilərin 3 milyon 126 min 113 nəfərinin səsini almaqla, yəni 84,54 faizlə İlham Heydər oğlu Əliyev seçki birincisidir" - 2013-cü ilin 9 oktyabr gecəsinin həyəcanına sevinc qatan bu rəsmi məlumatla Azərbaycan xalqı öz Prezidentinə növbəti etimadını bildirdiE

"Mənə böyük etimad göstərmiş, yenidən prezident vəzifəsinə seçmiş doğma xalqıma minnətdaram. Azərbaycan xalqını əmin etmək istəyirəm ki, bundan sonra da doğma xalqıma ləyaqətlə xidmət edəcəyəm, daim Azərbaycanın dövlət maraqlarını müdafiə edəcəyəm... Var gücümlə doğma xalqımızın rifahı, dövlətimizin möhkəmləndirilməsi üçün çalışacağam. Biz birlikdə hələ böyük qələbələrə imza atacağıq" - 2013-cü ilin 9 oktyabr gecəsi cənab İlham Əliyev yeni seçilmiş Prezident kimi xalqına ilk müraciətini etdiE

9 oktyabr - ümumxalq referendumu

Bu qələbə gözlənilən idi. Onu uzun müddət idi ki, heç kəs inkar etmirdi - nə məmləkətdə, nə ölkə xaricində.

Siyasi təhlilçilər artıq neçə ay idi yalnız bir məqamı qızğın müzakirə mövzusuna çevirmişdilər: ilkin rəy sorğularında etimad göstəricisi 80 faizdən artıq olan İlham Əliyevin seçki qələbəsini təmin edəcək rəqəm də buna uyğun olacaqmı?

Siyasi qeybətçilər və avantüristlər xeyli vaxt idi ancaq bir məqsəd uğrunda çarpışırdılar: necə edək ki, seçicilər məntəqələrə gəlməsinlər, nə hiylə qarışdıraq ki, "stəkanda fırtına yaratmağa" bəhanə tapaq, kimin ətəyindən yapışaq ki, bu seçkilərdən sonra bizi siyasi arxivin zibilqabından siyasi masa üzərinə çıxartsın?

Sadə xalqsa bütün bu mürəkkəb siyasi təbəddülatlardan kənarda, sadə məntiqi ilə sadə seçimini edirdi, Xeyirlə Şər arasında fərqi araşdırırdı. Özünə yüksək maaşla yeni iş yeri tapan, ailəsini istəydiyi kimi dolandıran, təsərrüfatını becərmək üçün dövlətdən yardım alan, məhsulunu satmaq üçünsə yaxşı bazar qazanan, təqaüdü yüksələn, dövlətdən sosial yardım və mənzil alan, çadır şəhərciyindən müasir evlərə köçən, kəndində, şəhərində yeni xəstəxanası, məktəbi, yolları tikilən milyonlarla insan - fəhlələr, kəndlilər, alimlər, məcburi köçkünlər, müəllimlər, həkimlər, təqaüdçülər, veteranlar, sahibkarlar... İlham Əliyevin şəxsində uğurlu gələcəyi, artan rifahı, qüdrətli dövləti, güclü xalqı seçirdilər!

Əslində, Azərbaycan vətəndaşı 9 oktyabr seçkisinə Prezident seçkisi kimi yanaşmırdı!

Bu, bir növ, yenidən keçirilən ümumxalq referendumu idi!

Bu, Heydər Əliyev siyasi kursuna, İlham Əliyev missiyasına xalqın növbəti etimad səsverməsi idi!

Bu, Heydər Əliyevin qurduğu müstəqil Azərbaycanda İlham Əliyevin fəaliyyəti sayəsində normal yaşayış, güzəran quran, daha xoş sabahına əmin olan, özünə və dövlətinə güvənən milyonların öz xilaskarlarına minnətdarlıq, inam aksiyası idi!

Bu, özünü siyasi səhnədə hərdən biruzə verən xaos, böhran kabusuna və onun daşıyıcılarına xalqın sonuncu qətiyyətli "yox"u, etirazı idi!

9 oktyabr Azərbaycanın ən məsuliyyətli seçim anı, xalqın isə müdriklik sınağı idi! Azərbaycan bu seçimdən də, bu sınaqdan da məsuliyyətlə, müdrikliklə, şərəflə çıxdı və dünyanı öz nailiyyətləri ilə heyran qoyan bir məmləkətin bəşəriyyəti öz bacarığı, qabiliyyəti ilə həmişə heyrətləndirəcək bir milləti olduğunu nümayiş etdirdi.

On ilin bir əsrlik nailiyyət yükü

Seçimin ilkin qalibi Prezident İlham Əliyev, bütövlükdə qalibi isə Azərbaycan dövləti və xalqıdır!

Qələbənin mahiyyətinin, qalibiyyətin məğzinin nə olduğu barədə uzun şərhlərə, rəqəmlərin müqayisəsinə, riyazi təhlillərə bəlkə də ehtiyac yoxdur. Etiraf edək ki, sadə camaatın ümumi daxili məhsulun artım tempinin neçə faiz olması, makroiqtisadi göstəricilərin nə qədər yüksəlməsi kimi faktlara o qədər də marağı yoxdur! Əsas sözdə deyilənlər deyil, əməldə görünənlərdir! Əslində, bu mülahizə İlham Əliyevin 10 il öncə elan etdiyi seçki proqramının prioriteti - "Əsl siyasət real iş və konkret fəaliyyətdən ibarətdir" tezisi ilə öz təsdiqini tapır.

Əvvəla ondan başlayaq ki, 2003-cü ilin prezident seçkilərinə İlham Əliyev məhz Azərbaycanı xaosdan tərəqqiyə aparan siyasi kursun təmsilçisi kimi qatılırdı. 9 il müddətində xarici siyasət, iqtisadiyyat, neft sektoru, qanunvericilik fəaliyyəti, siyasət sferalarında özünü bacarıqlı məmur, qabiliyyətli təşkilatçı, xarizmatik lider kimi təsdiqləyən İlham Əliyevin seçki qələbəsinin əsas təminatçısı isə ulu öndər Heydər Əliyevin "Mən ona özüm qədər inanıram" - yüksək dəyərini verməsi olmuşdu. Ümummilli liderin bu qənaəti xalqın 10 il öncə dəqiq etimad ünvanı seçməsində səfərbəredici şərt idi və Azərbaycan vətəndaşları da həmişə ona düzgün, müdrik yol göstərən Heydər Əliyevin bu məsləhətini müzakirə etmədən belə konkret seçim qərarı kimi müəyyənləşdirdilər. Və yanılmadılar!

10 il əsrin onda biridir. 10 il müddətində dağıdıcılıq kontekstində hər şeyə nail olmaq olar (məsələn, 21 il öncə cəmi bir il kifayət idi ki, qosqocaman Azərbaycanı rəzil, bərbad, məğlub günə qoysunlar). Quruculuq, inkişaf baxımından isə 10 ilin rəmzi timsalı orta təhsil almaq üçün tələb olunan müddətin cəmi bir semestrinə bərabərdir.

Ötən on il ərzində Azərbaycan bu zaman kəsiyinin 10 misli qədərində - bir əsrlik tərəqqi, yüksəliş yolu keçdi!

Hər günümüz dünənimizdən, hər ayımız ötən zamandan daha uğurlu, əlamətdar oldu. Paytaxtla ən ucqar əyalət mərkəzlərinin arasında fərq belə qalmadı. İki ay öncə olduğun rayonu, kəndi növbəti dəfə tanımadın, yeni infrastruktur obyektləri, yollar, körpülər ənənəvi rayon-əyalət təəssüratını büsbütün yox etdi.

Kəndli torpağına qayıtdı, pərən-pərən düşmüş ailəsini başına yığdı, dövlətdən aldığı əvəzsiz maliyyə yardımı ilə təsərrüfatını yenidən qurdu, dirçəltdi, müasir texnikanı yenə də dövlətin yardımı ilə əldə etdi. Bazar tapmaq üçün əvvəlki dövrlərdəki kimi əldən-dildən düşmədi, rayondakı emal müəssisələri indi onun qapısında bir-birləri ilə qiymət yarışına çıxdılar. Artıq kəndindəki evini üçmərtəbəli imarətə çevirdi, rayon mərkəzində boy-boya düzülən göydələnlərdən isə ev aldı. Evindən işıq, qaz, təsərrüfatından su əskik olmadı. Övladları yeni, müasir məktəbdə təhsil aldı, dərsliyi də yenə dövlət verdi. Daha xəstələnəndə müalicə, müayinə üçün Bakıya qaçmadı. Elə kəndində tikilən xəstəxanada müalicəsini aldı, rayon mərkəzində yeni istifadəyə verilən diaqnostika mərkəzində ən müasir avadanlıqlarla müayinədən keçdi. Bu arada kəndlərdə işi düz getməyən yalnız əvvəllər həmişə işsizlərin yığışdığı kənd çayxanaları oldu. Ancaq onlar da dünənki işsizlərin - bugünkü fermerlərin uzunmüddətli nisyələrini qapatmasından, ümumiyyətlə nisyə kitabının bir qırağa atılmasından çox razı qaldılar.

Kəndli heç fərqində də deyildi ki, bütün bunlar regionların sosial-iqtisadi inkişafı Dövlət Proqramı adlı sənədin gerçəyə çevrilən planlarıdır. O, yalnız bir şeyi bilirdi: onun əlini çörəyə çatdıran, təknəsinə ruzi gətirən sevimli Prezidentidir! Bütün ailəsinin rəhmət duaları Heydər Əliyevə, alqışları isə

İlham Əliyevə oldu.

Prezident İlham Əliyevin fəaliyyətində xüsusi prioritet təşkil edən bölgələrin sosial-iqtisadi inkişafı strategiyası ötən əsrin 70-ci illərində Heydər Əliyevin Azərbaycan kəndinin misilsiz inkişafına yol açan siyasətinin müasir, modern yanaşma ilə davamı idi.

Ümidlərin seçimindən inamın seçiminədək

İlham Əliyevin əyalətlərdəki hər evdə yandırdığı inam, güvən işığı bütün Azərbaycanı şölələndirdi. Hər bir fərdin - fəhlənin, kəndlinin, alimin, daha neçə-neçə peşə mənsubunun ölkə Prezidenti sayəsində öz sahəsində qazandığı nailiyyətlər cəmləşərək bütünlüklə Azərbaycanın uğur göstəricilərinə çevrildi.

Hər kəs xeyrini gördüyü dövlətə fərdi xeyrini verməyə çalışdı. İlham Əliyevin insanlara aşıladığı yüksək vətəndaşlıq hissləri və vətəndaşın dövləti qarşısında daşıdığı öhdəliyi aydın dərk etməsi məsuliyyəti nəticə etibarilə xalqın öz əlinin zəhmətinə üstünlük verməsinə gətirib çıxartdı. İnsanlar işləməyə alışdılar, yeni ictimai-iqtisadi formasiyada çörəyi qazanmağın yollarını öyrəndilər. Beləliklə də hər vətəndaşın fərdi uğuru Azərbaycanın nailiyyətlərində ümumiləşdi.

Yüksəliş göstəricilərinin 10 il ərzindəki faktları bitib-tükənmir. Artım tempinə nəzər salaq:

- ölkə iqtisadiyyatı 3,4 dəfə artıb, 150 milyard dollar investisiya qoyulub, xarici borc ÜDM-in cəmi 7 faizini təşkil edir;

- dövlət büdcəsinin həcmi 20 dəfəyədək artıb, gələn ilin əsas maliyyə sənədi isə artıq 20 milyard manatlıq həddi də keçəcək;

- strateji valyuta ehtiyatlarının həcmi 30 dəfə artaraq 50 milyard dollara çatıb;

- Cənubi Qafqazda iqtisadiyyatın 80 faizi, strateji valyuta ehtiyatlarının isə 91 faizi respublikamızın payına düşür;

- Azərbaycan MDB məkanında iqtisadiyyatda keçid dövrünü başa vuran ilk dövlət oldu;

- milli iqtisadiyyatın rəqabət qabiliyyəti göstəricilərinə görə ölkəmiz 144 dövlət sırasında 39-cu yerdədir;

- sahibkarlıq subyektlərinin sayı 2,9 dəfə çoxalıb, 3592 istehsal və xidmət müəssisəsi yaradılıb;

- 1 milyon 200 mindən artıq iş yeri açılıb, işsizlik 4,8 faizə düşüb;

- əhalinin sosial müdafiəsinə və təminatına yönəldilən dövlət vəsaitinin həcmi 9 dəfə, pensiyalar 10 dəfə, maaşlar isə 6 dəfə artıb, yoxsulluq 10 dəfə azalaraq 6 faizdən də aşağı enib, adambaşına düşən ÜDM-in həcmi 8000 dollara yaxınlaşır;

- məcburi köçkünlər üçün 166 min nəfərin məskunlaşması və normal yaşayışı üçün 61 müasir qəsəbə və məhəllə (bütövlükdə isə 82 qəsəbə) salınıb;

- müdafiə xərcləri 20 dəfə yüksəlib və Azərbaycanda indi 750 adda hərbi təyinatlı məhsul istehsal olunur, sonuncu xarici dövlət əsgərləri ölkədən çıxarıldı;

- 2708 məktəb, 500-ə yaxın tibb ocağı tikilib və əsaslı təmir olunub;

- 35 olimpiya idman kompleksi istifadəyə verilib, idman qurğularının sayı 10 minə çatdırılıb, idmançılarımız beynəlxalq yarışlardan 735 medalla qayıdıblar;

- 5 beynəlxalq hava limanı, 4 avtovağzal kompleksi, 4 metropoliten stansiyası tikilib, 10 min km-ə yaxın avtomobil yolu və 207 yeni körpü istifadəyə verilib və s.

Bunlar çoxsaylı statistik göstəricilərin cüzi hissəsidir. Fəqət onları sadalamağa nə hacət?! Elə iqtisadi inkişaf dinamikasına və islahatların tempinə görə dünyada lider dövlətlərdən olmağımızı da rəqəmlər timsalında təsdiqləməyə ehtiyac görmürük. Bunlar xalqın həyatında real təsbit olunan rifahın, güzəranın ümumiləşdirilmiş, elmiləşdirilmiş ifadə təzahürləridir.

Fəqət son dövrlərdə elə xüsusi qürurverici məqamlar var ki, bunlar uzun onilliklər boyu ən möhtəşəm nailiyyətlər sırasında xatırlanacaq:

- Azərbaycan artıq kosmik ölkələr sırasına qoşularaq ilk telekommunikasiya peykini Yer orbitinə çıxarıb və növbətisinin də hazırlıqlarını yaxın müddətdə yekunlaşdıracaq;

- Azərbaycanın BMT-nin Təhlükəsizlik Şurasına üzv seçilməsi və iki müddətə quruma sədrlik etməsi ölkəmizin dünyada artan nüfuzunun, regional gücdən beynəlxalq aktora çevrilməsinin real göstəricisidir;

- Azərbaycan sammitlər məkanına çevrildi, "Eurovizion" tarixinin ən möhtəşəm müsabiqəsinə Bakı ev sahibliyi etdi, ilk Avropa Olimpiya Oyunlarının da məhz paytaxtımızda keçirilməsinə qərar verildi...

Bu kontekstdə 2003-cü ilin prezident seçkiləri ilə 2008-ci və 2013-cü illərin seçkilərinin əsas fərqini də aydınlaşdırmış olduq:

2003-cü ilin seçkilərinə İlham Əliyev xilaskar missiyanın və alternativsiz siyasi kursun təmsilçisi, böyük ümidlər bəslənən namizəd kimi gedirdi.

2008-ci ilin seçkilərinə İlham Əliyev verdiyi vədləri artıqlaması ilə gerçəkləşdirən, ona bəslənən ümidləri tam doğruldan, xalqın böyük inamını qazanan, beynəlxalq imici möhkəmlənən, Azərbaycanı bölgədə söz sahibinə çevirən Prezident kimi qatılırdı.

2013-cü ilin seçkilərində isə İlham Əliyev tarixin ən güclü, ən möhtəşəm, ən inkişaf edən Azərbaycanının şəriksiz lideri, xalqının öz taleyini onilliklər boyu etibar etməyə hazır olduğu rəhbər kimi iştirak edirdi!

2003-cü ilin seçkiləri ümidlərin seçimi idi!

2008-ci ilin seçkiləri doğrulan ümidlərin, daha xoşbəxt gələcəyə əminliyin seçimi idi!

2013-cü ilin seçkiləri Azərbaycanın artıq heç vaxt öz yolundan - müstəqillik xəttindən və Heydər Əliyev kursundan geri dönməyəcəyinə inamın seçimi idi!

Bölgənin demokratik liderinə qarşı birləşən şəbəkə

Prezident seçkilərinin gedişi, prosesin bütün təzahürləri və nəticələri bir faktı da beynəlxalq rəydə təkzibedilməz arqumentə çevirdi: bölgənin sosial-iqtisadi sahələrdə və geosiyasi məsələlərdə yeganə gücü olan Azərbaycan artıq Cənubi Qafqazın demokratikləşmə və vətəndaş cəmiyyəti quruculuğu prosesində də alternativsiz lideridir. Bu gün regionda Azərbaycandan demokratik ölkə, qanunun və hüququn aliliyini tanıyan digər dövlət yoxdur! Azərbaycanın demokratikləşmə modeli MDB və Şərqi Avropa məkanı üçün də təkmil modeldir!

Bu, uğurdur! Dostları sevindirən, düşmənləri və rəqibləri antiazərbaycançı fəaliyyətə sövq edən uğur! Sevinən dostların xoş münasibəti sözdədir, nailiyyətləri səmimiyyətlə bəyənirlər, təqdir edirlər. Fəqət düşmənlər və rəqiblər sözdə böhtan yağdırmaqla kifayətlənmirlər, onların əsas fəaliyyəti bəd əməllərində, rəzil planlarındadır.

Prezident İlham Əliyev sonuncuları çox doğru olaraq bir ad altında ümumiləşdirir: dünya erməniliyi! Liderimizin bu yanaşmasını inkişaf etdirsək, daha iki qrupu da Azərbaycana düşmən və rəqib olanların cərgəsinə aid etmək olar: dünya erməniliyinin beynəlxalq məkandakı müttəfiqləri və dünya erməniliyinin, həmçinin onların müttəfiqlərinin ölkəmizdəki buyruq qulları!

Birincilər də, ikincilər də hücumdadırlar - şərlə, böhtanla, iftira ilə! Onlardan ruhlanan sonuncular da, Prezidentin təbirincə desək, beşinci dəstə (tarixdə beşinci kalon kimi əks olunub) də müxtəlif vasitələrlə destruktiv fəaliyyətini davam etdirir, dünya erməniliyinin Azərbaycana qənim kəsilmiş dəyirmanına su tökür.

Qafqazın güc və nüfuz rəmzinə çevrilən dövlətimizin nailiyyətlərinin ilk və yeganə şərtinin uğurlu siyasət - İlham Əliyev faktoru olduğunu bilən dünya etrməniliyi və onun ətrafı da öz şər təbliğatında əsas ağırlığı Azərbaycanın liderinə qarşı yönəldib. Əslində, təəccüblənməyə lüzum da yoxdur. Erməni lobbisinin maliyyələşdirdiyi qəzetdə çap edilən səfsəfədə, yaxud da "yan" imzalı qərəz yığnağında Azərbaycan və onun lideri təqdir olunmayacaqdı ki!.. Ancaq bu küfrlər radikalların tribunası olan qəzetlərdə işıq üzü görəndə adam təəccüblənməyə bilmir. Prezidentə, onun siyasətinə qarşı bir ölkə miqyasında tənqid elementi tapa bilməyənlər xaricdən gələn böhtanı tirajlamaqla yalnız "tənqid norması"nı ödəmirlər, həm də maliyyə asılılıqlarında olduqları şəbəkənin tapşırıqlarını yerinə yetirirlər. Bəyəm siyasi mübarizə belə olur?

Onlar ermənidirlər, düşməndirlər və belə də yazmalıdırlar. Ancaq onların xislətini daşımaq, yaymaq, yazmaq və özünü Azərbaycan vətəndaşı hesab etmək, hələ dövlət büdcəsindən bu şərəfsiz fəaliyyət üçün maliyyə vəsaiti istəmək və almaq - bax bunlar siyasi əxlaqsızlıq, rəzalətdir!

Və çox vaxt da Prezidentin səbrinə, təmkininə heyran qalmaya bilmirsən. Xalqa təmənnasız xidmətinin, layiqli fəaliyyətinin bir ovuc avantüristin bədxah təftişinə məruz qalmasına soyuqqanlıqla yanaşır, bu qərəzli fəaliyyətə qarşı çıxan, hüququn tələblərindən istifadə etmək istəyən tərəfdarlarına birmənalı etirazını bildirir. Öz səviyyəsini qorumaqla bərabər LİDER həm də demokratikləşmənin çətin və məşəqqətli yolunun ağırlıqlarını öz şəxsində yaşayır.

O, Heydər Əliyevin hər mənada davamçısıdır, elə bu məsələyə münasibətdə göstərdiyi təmkinlə də. Prezident İlham Əliyev Azərbaycanı xoşbəxt gələcəyə aparan müqəddəs missiyanın - karvanın yenilməz sarvanıdır, buna görə də el misalında deyildiyi kimi, qıraqdan gələn hay-küyə, ulartıya əsla fikir vermir...

Azərbaycanın demokratiya modeli "jandarma demokratiyası"na qarşı

Beynəlxalq təşkilatlarda, xarici QHT-lərdə bu gün antiazərbaycançı şəbəkənin təmsilçiləri bəsdi deyənəcəndir. Onların qərəzliliyi, bədnam tərəfkeşliyi hər addımda özünü biruzə verir. Məsələn, Azərbaycanda "demokratiya" axtaranlar elə bizim sərhəd qonşularımızda seçkilərin antidemokratikliyinə etiraz edən dinc sakinlərin qanları ilə doldurulan "demokratiya" hovuzlarında çimirlər və bu qan qoxusunu "azadlıq rayihəsi" sayırlar. Yaxud, məmləkətimizdə özünü siyasətdən tam təcrid edən radikal avantüristləri zorla ölkəmizin siyasi məkanına dırmaşdırmaq istəyən (və uğursuzluğa düçar olan) məlum dairələr Bakıdan tam 500 km kənarda seçkilər ərəfəsində və sonra yüz minlərlə insanı etiraz mitinqlərinə çıxaran, əlində saxtakarlıqla, qanunsuzluqla bağlı konkret sənədləri olan müxalifəti "bir ovuc qruplaşma" hesab edirlər. Bu, əslində heç ikili standart da deyil, sadəcə "jandarma demokratiyası"nın bölgəmizdəki təzahürləridir.

Bu məkr və intriqa kampaniyasının önündə isə bütün dünyada əsl demokratik təsisatlara və insan haqlarına qənim kəsilən qurum - ATƏT-in Demokratik Təsisatlar və İnsan Haqları Bürosu dayanır. Necə olur 9 milyonluq Azərbaycanda mitinqinə heç iki min nəfəri də yığa bilməyən radikalları "sivil müxalifət, xalqın fikrini ifadə edən partiyalar" sayıb, onların himayədarına çevrilirsən, ancaq 3 milyonluq Ermənistanda az qala 1 milyon etirazçını meydanlara daşıyan müxalifətin darmadağın edilməsini alqışlayırsan, prezidentliyə namizədin güllələnməsini normal hal sayırsan?! Azərbaycanda xalqın inamı, etimadı ilə hakimiyyətə gələn iqtidarın seçki uğurunu şübhə altına alırsan, ancaq işğalçı ölkədə qan üstündə hakimiyyətə gəlib, minlərlə insanı həbsxanaya atan və güllə sədaları altında and içən bir marionet hakimiyyəti "demokratiya yolunda inamla addımlaması münasibətilə" təbrik edirsən?! Unutmayın, bu təəssübkeşliyinizin məğzinin yaradıcısı olan İsa peyğəmbər də, heç əllərdə dəstavuz edilən "demokratiya" təliminin ataları - yunan-Roma mütəfəkkirləri də bu ədalətsizliyi, ləyaqətsizliyi sizlərə bağışlamaz!

Nə yaxşı ki, bu skeptik nihilistlərin sayı azalıb. İndi onların sayı iki əlin barmaqları qədərdir. Elə son proseslərdə də bütün beynəlxalq təşkilatlar, fövqəldövlətlər, xarici QHT-lər birmənalı olaraq 9 oktyabr seçkisini ədalətli, şəffaf və demokratik saydılar. Lakin düşmən - antiazərbaycançı şəbəkə marığa yatıb, hücuma keçmək üçün vaxt və şərait gözləyir, elə onların ölkəmizdəki əlaltıları da.

Əslində, sonuncular öz siyasi missiyalarını hələ 20 il öncə bitiriblər. Bu reallığı dərk edib, siyasətdən çəkilmək niyyətində olmayanlara xalq da bütün seçkilərdə öz etirazçı münasibətini ifadə edib. Hər ötən seçki radikal düşərgəyə əvvəlkindən daha artıq zərbə ilə müşayiət olunub. Radikal düşərgədə birləşən 30-dan artıq "dərnəyin" vahid namizədinin aldığı səs isə cəmi 5 faiz oldu. Elə son seçkilərdən üç gün öncə və üç gün sonra radikalların 10-15 partiyası birlikdə paytaxtın mərkəzində etiraz mitinqinə cəmi 1500 nəfəri toplaya bilmişdi.

Bu dəfə seçkilərdə konstruktiv müxalifət təmsil olunurdu. Onların birlikdə topladıqları səs 10 faizi belə ötmədi. Prezident dəfələrlə vurğulayıb ki, Azərbaycanın siyasi diskussiya aparmağı bacaran güclü müxalifətə ehtiyacı var. Dövlət başçısı hər zaman bildirir ki, müxalifətin güclü olması bir iqtidar olaraq onlarda narahatlıq yaratmır, əksinə, Prezident İlham Əliyevin qurucusu olduğu vətəndaş cəmiyyətində, hüquqi dövlətdə olan yeganə çatışmazlıq məhz güclü müxalifətin olmamasıdır.

Siyasi inhisarçılıq bu iqtidarın mahiyyətinə, demokratik fəlsəfəsinə, fəaliyyət prinsiplərinə yaddır. Ancaq son seçkilər göstərdi ki, artıq proses başlayıb - yeni nəsil müxalifətin formalaşmasına start verilib. Bu müxalifət inkarçılıqdan, avantürizmdən, xarici asılılıqdan uzaq olmalı, ideya fərqliliyini, fikir müxtəlifliyini əks etdirməli, cəmiyyətdə, iqtidarın fəaliyyətində olan nöqsanları diskussiyalarla, konstruktivliklə ictimaiyyətin gündəminə çıxarmalıdır. Ən əsası, cəmiyyətdə müxalifətə etimad yaratmalıdır.

Seçkilərə qatılan namizədlərin ilkin nəticələr elan olunandan dərhal sonra İlham Əliyevi qələbəsi münasibətilə təbrik etmələri ölkəmizdə siyasi münasibətlərin axarına bir mülayimlik gətirdi. Bu, həm də iqtidar-müxalifət əməkdaşlığına sonuncular tərəfindən hər zaman ənənəvi olan maneənin aradan qalxmasına inam yaratdı. Prezidentliyə namizədlərin radikal müxalifətçiliyin dövlətimiz üçün zərərini etiraf etmələri, ölkədə yeni, konstruktiv müxalifətin formalaşmasına çalışacaqlarını, siyasi əməkdaşlığa cəhd edəcəklərini bildirmələri qarşı tərəfin - iqtidarın razılığı ilə qarşılandı. Göründüyü kimi, artıq Azərbaycanda siyasi qüvvələr arasında münasibətlər yeni, beynəlxalq standartlara cavab verən mərhələyə qədəm qoyur.

Bəli, prezident seçkilərinin əlamətdar məqamlarından biri də məhz köhnə təfəkkürlü müxalifətin yenilikçi müxalifətlə əvəzlənməsi prosesinə xalqın dəstək göstərməsi idi.

Prezidentlikdən üstün missiya

9 oktyabrda cənab İlham Əliyev demokratik cəmiyyətə, hüquqi dövlətə malik olan Azərbaycanda seçicilərin maksimum etimadını qazandı. Unutmamalıyıq ki, məmləkətimizdə müxtəlif siyasi dünyagörüşə malik insanlar, fərqli ideologiyalara inanan vətəndaşlar, siyasi macəraçılar, ictimai proseslərə tam laqeyd adamlar, cəmiyyətdə öz yerini tapa bilməyənlər və digər zümrələrin təmsilçiləri yaşayır. Bu müxtəlifliklər Azərbaycan demokratiyasının zənginliyidir, Azərbaycan plüralizminin bünövrəsidir. Bu insanların arasında vətəndaş sülhünü təmin etmək, ictimai-siyasi fərqliliyi radikal müstəvidən konstruktiv məcraya yönəltmək məhz Prezident İlham Əliyevin fədakar fəaliyyətinin nəticəsidir.

Prezident İlham Əliyev xalqa enməklə ucalmağı bacaran Liderdir!

Ötən 10 il ərzində bu həqiqətin danılmazlığı hər an özünü biruzə verdi. Onu da etiraf edək ki, İlham Əliyevin hər bir azərbaycanlının Prezidenti olmasını təmin edən amillərdən biri də onun xeyirxahlıq, himayədarlıq siyasətində əsas yardımçısı olan Mehriban xanım Əliyevanın genişmiqyaslı fəaliyyətidir. BİRİNCİ ŞƏXS-BİRİNCİ XANIM tandemi Azərbaycanda mərhəmətin və xeyirxahlığın ən ali səviyyəsini, xalqın inam və etimad ünvanını təşkil edir.

Hər bir azərbaycanlının Prezidenti həm də hər bir azərbaycanlının dostu, cəfakeşi, güvənci, qürur mənbəyidir!

Prezident İlham Əliyev yalnız 9 milyon vətəndaşının deyil, ümumiyyətlə 60 milyonluq xalqının hər bir üzvünün rəhbəri, lideridir. O, bunu tək şərəfli status kimi qəbul etmir, bu, rəhbərimiz üçün həm də xüsusi məsuliyyətdir. 60 milyon insanın müqəddəratına cavabdeh olmaq, onların hansı dövlətdə yaşamasından asılı olmayaraq hər birinin taleyilə maraqlanmaq, qayğısına qalmaq, yaşamına yardım göstərmək cənab İlham Əliyevin əsl missiyasının prezidentlikdən də üstün olmasına dəlalət edir.

İlham Əliyev tarix yaradan liderdir! Onun yaratdığı tarix möhtəşəm olduğu qədər də bu gün tam mahiyyəti ilə açılması mümkün olmayan uğurlu proseslərin salnaməsidir. Buna zaman lazımdır! Vaxt ötdükcə 2003-2013-cü illəri tariximizin intibah dövrü kimi daha dəqiq, obyektiv, müfəssəl öyrənəcək, dəyərləndirəcəyik!

İlham Əliyev milliliyi və bəşəriliyi təcəssüm etdirən missiyanı yürüdür. Onun missiyası həm də Dədə Qorquddan başlanan şanlı irsimizi, Babəkin azadlıq məramını, Şah İsmayıl Xətainin dövlət quruculuğu fəaliyyətini, Xalq Cümhuriyyətinin yaradıcılarının müstəqillik fəlsəfəsini, ən nəhayət, dünyanın ən böyük azərbaycanlısı olan Heydər Əliyevin xilaskarlıq, qurtuluş kursunu əks etdirir.

lham Əliyev müasirliyin, modern təfəkkürün, sivil düşüncənin, demokratik tərzin, xarizmanın rəmzidir! Azərbaycan da öz rəhbərinin xarakterini mənimsəyən, dünya birliyinin azad, modern, sivil üzvü kimi özünü təsdiqləyən ölkədir.

Prezident İlham Əliyevin qazandığı qələbə əslində hər birimizin qələbəsidir! Bu zəfər bizim qarşıdakı nailiyyətlərimizin müjdəçisi, daha xoşbəxt gələcəyin, güclü və qüdrətli Azərbaycanın rəhnidir!

Prezident İlham Əliyev on il ərzində Azərbaycana halallıqla xidmət etdi və qarşıdakı beş ildə ölkəyə rəhbərlik etmək haqqını da halallıqla qazandı!

Demək, bu missiyaya, bu siyasətə, bu kursa zaval yoxdur!..

Seçimin mübarək, Azərbaycan!..

İxtiyar HÜSEYNLİ,

Azərbaycan.-2013.- 20 oktyabr.- S.7.