İlham Əliyevin qələbəsi halal qələbədir

Azərbaycanda prezident seçkiləri başa çatdı. Demokratik, ədalətli və tam şəffaf formada baş tutan seçkilərdə xalqımız uğurlu gələcəyə, yüksəlişə, inkişafa dəstək olaraq cənab İlham Əliyevi yenidən Azərbaycan Prezidenti seçdi. Prezidentliyə namizədliyini irəli sürmüş şəxslərin əksəriyyəti İlham Əliyevi qələbə münasibətilə təbrik etmiş, ona fəaliyyətində uğurlar arzılamışlar.

Onlardan biri də Milli Məclisin deputatı Zahid Orucdur. Prezidentliyə keçmiş namizəd Prezident İlham Əliyevi təbrik etməklə barabər, ölkədə keçirilən seçkinin gedişatı, seçicilərin aktivliyi və tam demokratik şəkildə baş tutan seçkilərlə bağlı fikirlərini bizimlə bölüşdü.

Öncə prezident seçkilərinin nəticələrinə toxunan Zahid Oruc qeyd etdi ki, seçkilərin nəticəsini hüquqiləşdirən, bütün siyasi mübarizələrə son qoyan Azərbaycan xalqı oldu. Bunu təsdiq edənlər isə obyektivliyə söykənənlər idi. Digər mövqe tutanları isə aşkar şəkildə bu millətin üzərində istədikləri planlarını, məkrli niyyətlərini həyata keçirmək istəyən qüvvələr adlandırmaq olar. Bu qüvvələr müxtəlif yollarla Azərbaycanı təzyiq altında saxlamaq, gözdən salmaq istəyində idilər. Ancaq xalq buna imkan vermədi. Eyni zamanda seçkiləri müşahidə edən yüzlərlə beynəlxalq müşahidəçinin verdiyi rəy, "exit-poll"arın nəticələri onların planlarını alt-üst etdi.

Z.Orucun sözlərinə görə, antiazərbaycançı şəbəkənin son ümid yeri isə dağıdıcı müxalifət tərəfindən prezidentliyə namizədliyi irəli sürülmüş Cəmil Həsənli idi: "Cəmil Həsənlinin namizədliyini verənlər və ona xaricdən dəstək olanların özləri də yaxşı bilirlər ki, bu şəxs nə liderdir, nə komanda qurmaq qabiliyyətinə malikdir, nə də sabit mövqeyə sahib bir adamdır. Son 13 ildə onun tərcümeyi-halına baxan hər kəs bilir ki, siyasi cəhətdən sürüşkən, saxtakar və riyakar bir adamdır. Əgər həqiqətən Cəmil Həsənli ləyaqət simvoludursa, Prezidentin parlament xətti ilə ona verdiyi mənzildən imtina etsin. Yaxud da parlamentdə bütün mandatları saxta sayırsa, öz mandatını da ora aid edərək 2200 manat pensiyadan daşınsın. Amma görünür ki, o nə Nelson Mandela, nə də Mahatma Qandidir. Bunu Cəmil Həsənlini aqressiv müxalifətin "seçki qurbanı" seçən İsa Qəmbər və Əli Kərimli də yaxşı bilir".

Z.Orucun fikrincə, Cəmil Həsənli üzərində hakimiyyət əleyhinə bir cəbhə təşkil edənlərə də bu şəxsin böyük siyasi mübarizələrə hazır olmadığı çox yaxşı bəlli idi. Bu, seçkilərdə də sübut olundu. Seçki günü axşam saatlarında Müsavat Partiyasının qarşısına toplaşan 40 nəfərlik kiçik toplum məğlubiyyəti əvvəlcədən dəqiqləşdirən şəxslər idi. Onlar sadəcə təsəlli üçün bir araya gəlmişdilər. Əslində isə dağıdıcı müxalifət seçkini çoxdan uduzmuşdu. Seçkiyə qədər göstərilən şoular isə hansısa maraqlar xatirinə həyata keçirilirdi.

Zahid Oruc bildirdi ki, seçkidən sonra destruktiv müxalifətin keçirdiyi mitinqə toplaşanlar Cəmil Həsənlini önə verib öz kreslolarını sığortalayan müxalifət "liderləri"nə etiraz edənlər idi. Bunu onlarn "məğlubiyyət mitinqi" də adlandırmaq olar.

Prezidentliyə keçmiş namizədin fikrincə, Prezident İlham Əliyevin seçkilərdə yüksək səs qazanması o deməkdir ki, dövlət başçısı böyük xalq kütləsinə söykənərək islahatlarını daha da uğurla davam etdirmək qüdrətindədir: "...Əmin olun ki, bir neçə ay keçdikdən sonra seçkilərlə bağlı Azərbaycana təzyiq göstərmək istəyən və onun nəticələrinə kölgə salmağa çalışan dairələrin əsl niyyətləri üzə çıxacaq. Barışmaz müxalifətin dəyişməz liderləri ölkəmizin uğurlarını, islahatlar proqramının yekunlarını təkzib edir, amma əvəzində heç nə təklif etmirlər. Onların heç bir idarəçilik təcrübəsi və potensialı, elektoral dəstəyi olmadığı halda yalnız hakimiyyət istəyirlər. Axı qeyri-real, absurd vədlər verən namizədə hansı seçici səs verər? İlham Əliyevin qələbəsi halal qələbədir".

Qeyd edək ki, prezidentliyə namizədlərdən ilk olaraq Zahid Oruc Prezident İlham Əliyevə təbrik məktubu ünvanlamışdı. Məktubda deyilirdi: "Böyük səs çoxluğu ilə yenidən Prezident seçilməyiniz münasibətilə Sizi ürəkdən təbrik edir, dövlətimizin dinamik inkişafı və xalqımızın rifahının günü-gündən yüksəldilməsi istiqamətindəki fəaliyyətinizdə böyük uğurlar arzulayıram. 9 oktyabrda parlaq qələbə çalmağınız bir daha sübut etdi ki, xalqımız ümummilli lider Heydər Əliyevin müəyyənləşdirdiyi möhtəşəm milli inkişaf yolunun davam etdirilməsini yekdilliklə alqışlayır və bunu vətənimiz Azərbaycanın hərtərəfli tərəqqisinin yeganə uğurlu yolu hesab edir".

Məktubda vurğulanır ki, uzaqgörən xalqımız bu seçkilərdə siyasi iradəsi ilə həm də ölkəmizin bir daha heç vaxt ötən əsrin 90-cı illərinə qayıtmayacağını bəyan etdi. Cəmiyyət üzvlərinin böyük əksəriyyəti tərəfindən qəbul olunmayan, çağırışları və fəaliyyətləri ilə ölkədə qarşıdurma yaratmağa cəhd edən, xarici qüvvələrin maraqlarına uyğun olaraq dezinformasiya yaymaqla siyasi xal qazanmaq istəyən qüvvələrlə xalqımızın istək və maraqları arasında heç bir əlaqə yoxdur.

Rəşad BAXŞƏLİYEV,

Azərbaycan.-2013.- 20 oktyabr.- S.8.