Şahbuz rayonunun Kükü kəndi müasir

yaşayış məntəqəsinə çevrilmişdir

Məlumdur ki, düşünülmüş sosial siyasəti güclü iqtisadi islahatları reallaşdırmaqla həyata keçirmək mümkündür. Regionların sosial-iqtisadi inkişafı Dövlət Proqramının uğurlu icrası nəticəsində Naxçıvan Muxtar Respublikasının Şahbuz rayonunda da yeni infrastruktur sahələri yaradılmış, yaşayış məntəqələri müasirləşmiş və insanların sosial rifahı yüksəlmişdir. Rayonun kəndlərinin müasirliyə, yeniliyə qovuşması ölkəmizdə iqtisadi gücün real təzahürüdür. Dağlar qoynunda yerləşən Kükü kəndi də indi təkcə rəngarəng təbiəti, zəngin turizm potensialı ilə deyil, həm də həyata keçirilən genişmiqyaslı quruculuq işləri ilə diqqət çəkir.

Naxçıvan Muxtar Respublikası Ali Məclisinin mətbuat xidmətindən AzərTAc-a bildirmişlər ki, oktyabrın 12-də Şahbuz rayonunun Kükü kəndində yeni sosial obyektlər istifadəyə verilmişdir.

Ayrınc-Qızıl Qışlaq-Kükü

avtomobil yolu yenidən qurulmuşdur

Muxtar respublikada yol-nəqliyyat infrastrukturunun müasirləşdirilməsi istiqamətində görülən işlər kənd yaşayış məntəqələrini də əhatə etmişdir. Bu gün respublika əhəmiyyətli yollarla bərabər, rayon və kənddaxili yollar da müasir səviyyədə inşa edilir. Bu il Naxçıvan-Batabat magistralı - Ayrınc-Qızıl Qışlaq-Kükü avtomobil yolunda da yenidənqurma işləri aparılmışdır.

Oktyabrın 12-də avtomobil yolunun açılışı olmuşdur.

Naxçıvan Muxtar Respublikası Ali Məclisinin Sədri Vasif Talıbov açılış mərasimində iştirak etmişdir.

Kənd sakini Ramiz Cəlilov muxtar respublikada aparılan quruculuq işlərinin Şahbuz rayonunun kəndlərini də əhatə etdiyini bildirmişdir. Qeyd olunmuşdur ki, yaşayış məntəqələrinin müasir görkəm alması, insanların rahatlığının təmin olunması ölkəmizdə davam etdirilən Heydər Əliyev siyasi xəttinin nəticəsidir. Bu inkişafı hər bir sakin şəxsi həyatında, yaşadığı kənddə, şəhərdə müşahidə edir. Kükü kəndinin avtomobil yolunun yenidən qurulması isə bu istiqamətdə görülən işlərin daha bir nümunəsidir.

Ali Məclisin Sədri sərhəd və dağ kəndi olan Küküdə yeni yolun istifadəyə verilməsi münasibətilə sakinləri təbrik edərək demişdir: "Yol mədəniyyət, rahatlıq və abadlıq deməkdir. Bu gün Kükü kəndində müasir və rahat yol istifadəyə verilir. Kənd yolunun yenidən qurulması Azərbaycan Respublikası Prezidentinin Sərəncamı ilə təsdiq olunan regionların sosial-iqtisadi inkişafı Dövlət Proqramı çərçivəsində həyata keçirilmişdir. 16 kilometr uzunluğundakı avtomobil yolu 4 minə yaxın əhalinin rahatlığını təmin edəcək, gediş-gəliş xeyli yaxşılaşacaqdır".

Ali Məclisin Sədri yolun inşasında əməyi olanlara təşəkkürünü bildirmiş, rəmzi açılışı bildirən lenti kəsmişdir.

Məlumat verilmişdir ki, kənd yolu əsaslı şəkildə yenidən qurulmuş, yol yatağı genişləndirilmiş, yeni asfalt örtük salınmışdır. Tikinti işləri aparılarkən mühəndis-texniki tələblərə tam əməl edilmiş, 30 selötürücü, 97 suötürücü və 9 körpü tikilmişdir.

Yolboyu yol-hərəkət nişanları quraşdırılmış, kəndlərdə piyadaların təhlükəsiz hərəkəti üçün səkilər salınmışdır. Yaşayış məntəqəsində iqtisadiyyatın inkişafı baxımından da müstəsna əhəmiyyəti olan yolun yenidən qurulması əlverişli iqlim şəraitinə, təbii bitki örtüyünə və təmiz havaya malik olan Kükü kəndinin turizm imkanlarını xeyli artıracaqdır.

Kükü kənd tam orta məktəbi müasir

binada fəaliyyət göstərəcəkdir

Muxtar respublikada təhsil infrastrukturunun müasirləşdirilməsi diqqət mərkəzində saxlanılır, ən ucqar yaşayış məntəqələrində belə yeni məktəb binaları tikilərək istifadəyə verilir.

Oktyabrın 12-də Kükü kənd tam orta məktəbinin yeni binası açılmışdır.

Naxçıvan Muxtar Respublikası Ali Məclisinin Sədri Vasif Talıbov açılış mərasimində iştirak etmişdir.

Tədbirdə çıxış edən Şahbuz Rayon İcra Hakimiyyətinin başçısı Nürəddin Quliyev bildirmişdir ki, bu günlərdə rayonumuzda bayram ovqatı yaşanır. Xalqımız qələbəsini bayram edir. Rayon sakinləri də sabitliyin, tərəqqinin və müstəqilliyin təminatçısı olan möhtərəm Prezidentimiz İlham Əliyevə səs verməklə Heydər Əliyev siyasi kursuna sadiq olduqlarını bir daha nümayiş etdirdilər. Bu gün ucqar dağ kəndində yaradılan bu möhtəşəmlik məhz ulu öndərin quruculuq xəttinin uğurla davam etdirilməsinin bəhrəsidir. "Heydər Əliyev ili" olan 2013-cü ildə rayonun 7 yaşayış məntəqəsində quruculuq işləri aparılır. Bu işlər sayəsində Kükü kəndində fəaliyyət göstərən müəssisə və təşkilatlar üçün də müasir iş şəraiti yaradılmışdır. Nürəddin Quliyev göstərilən dövlət qayğısının müqabilində bundan sonra daha səylə çalışacaqlarını bildirmiş, rayon sakinləri adından minnətdarlıq etmişdir.

Naxçıvan Muxtar Respublikası Ali Məclisinin Sədri Vasif Talıbov Kükü kənd tam orta məktəbinin binasının istifadəyə verilməsi münasibətilə kollektivi təbrik edərək demişdir: "Bu gün ölkəmizdə ümummilli liderimizin siyasi xəttinin uğurla davam etdirilməsi bütün sahələrin inkişafına səbəb olmuşdur. Həyata keçirilən tədbirlər, qəbul olunan dövlət proqramları və onların uğurlu icrası təhsilin inkişafına da şərait yaratmışdır. Hələ ötən əsrin 70-ci illərindən ölkəmizdə təhsilin inkişafını diqqət mərkəzində saxlayan, bu sahəni himayə edən ümummilli liderimiz Heydər Əliyev deyirdi: "Cəmiyyətin gələcək tərəqqisi təhsilin vəziyyətindən asılı olacaqdır".

Ali Məclisin Sədri demişdir: "Bu gün ölkəmizdə təhsilin inkişafı istiqamətində ardıcıl tədbirlər görülür, təhsil ocaqları müasir tələblər səviyyəsində yenidən qurulur. Şəhər və rayon mərkəzləri ilə yanaşı, ən ucqar kəndlərdə də məktəblərin təminatı, təhsil işçiləri qarşısında eyni tələblər qoyulur".

Ali Məclisin Sədri demişdir ki, muxtar respublikamızın ucqar dağ kəndi olan Küküdə müasir məktəb binasının istifadəyə verilməsi ölkəmizdə təhsilin inkişafı sahəsində görülən işlərin bariz nümunəsidir. Məktəbdə elektron lövhəli siniflər, kompyuter otağı, müasir kitabxana, yeni tədris avadanlıqları, şagirdlərin fiziki inkişafı üçün idman zalı vardır. Qeyd olunmuşdur ki, təhsil ocağının nailiyyətləri qənaətləndiricidir. Ötən tədris ilində məzunlardan 11-i ali məktəbə, biri orta ixtisas məktəbinə, biri isə Heydər Əliyev adına Hərbi Liseyə qəbul olmuşdur. Ali məktəblərə qəbul olunan məzunlardan 3-ü 500-700 arasında bal toplayaraq yüksək nəticə göstərmişdir. Bu, məktəb kollektivinin əməyinin, tədrisin düzgün qurulmasının nəticəsidir. Pedaqoji kollektivin əməyi də dövlətimiz tərəfindən layiqincə qiymətləndirilmiş, bir nəfər Naxçıvan Muxtar Respublikasının "Əməkdar müəllimi", bir nəfər isə 2012/2013-cü tədris ilində "İlin ən yaxşı müəllimi" adına layiq görülmüşdür.

Qazanılan uğurlara görə kollektivə təşəkkür edən Ali Məclisin Sədri demişdir: "Hər bir təhsil ocağının qarşısında duran ən mühüm vəzifə vətənpərvər və bilikli gənclər hazırlamaqdır. Gənclərin gələcəkdə ölkəmizin idarə olunmasında, dövlətçiliyimizin, müstəqilliyimizin qorunmasında yaxından iştirakı təmin olunmalıdır. Kükü kənd tam orta məktəbinin kollektivi öz işini bu istiqamətdə qurmalı, bilikli və vətənpərvər gənclər yetişdirməlidir".

Ali Məclisin Sədri bu vəzifələrin yerinə yetirilməsi üçün dövlətimiz tərəfindən lazımi şərait yaradıldığını bildirmiş, kollektivə tədrisdə uğurlar arzulamışdır.

Sonra Ali Məclisin Sədri Şahbuz rayonunun ümumtəhsil məktəblərində əla qiymətlərlə oxuyan şagirdlərdən bir qrupuna kompyuter dəsti hədiyyə etmiş, təhsildə qazandıqları nailiyyətlərə görə onları təbrik etmişdir.

Rəmzi açılışı bildirən lent kəsildikdən sonra məktəb binasına baxış olmuşdur.

Məlumat verilmişdir ki, 198 şagird yerlik məktəb binası 2 mərtəbəlidir. Məktəbdə 3-ü elektron lövhəli olmaqla 11 sinif otağı, kimya-biologiya və fizika laboratoriyaları, hərbi kabinet, kompyuter və müəllimlər otaqları, kitabxana, bufet və idman zalı vardır.

Məktəbin kitabxana fondunda 2 min 969 latın qrafikalı dərslik və 1865 bədii ədəbiyyat olmaqla, 4 min 834 kitab vardır. Pedaqoji kollektiv şagirdlərin kitabxanaya cəlbini diqqət mərkəzində saxlayır, hər ay kitabxana günləri keçirilir. Kitabxanada mütaliə saatları da yaradılmışdır.

Ali Məclisin Sədri birinci sinifdə təhsil alan şagirdlərin dərs prosesi ilə maraqlanmışdır. Bildirilmişdir ki, bu il Kükü kənd tam orta məktəbinə 13 şagird qəbul olunmuşdur. Yeni tədris metodlarının tətbiqi keçilən dərslərin daha ətraflı və asan mənimsənilməsinə, şagirdlərin məntiqi təfəkkürünün gücləndirilməsinə imkan verir.

Kompyuter otağında 19 kompyuter quraşdırılmış və internetə qoşulmuşdur. Həmçinin məktəbdə elektron lövhəli siniflər yaradılmışdır. Bu da şagirdlərin informasiya texnologiyalarının imkanlarından və elektron dərsliklərdən istifadəsinə imkan verir.

Hərbi kabinetdə ilkin hərbi hazırlıq fənninin tədrisi üçün lazımi şərait vardır. Kabinetdə sıra, mühəndis, hərbi topoqrafiya və atəş hazırlığını əks etdirən stendlər asılmışdır.

Kimya-biologiya və fizika laboratoriyalarına baxış zamanı qeyd olunmuşdur ki, məktəbdə dəqiq elmlərin tədrisinə xüsusi diqqət yetirilir, bu fənlər üzrə müəllimlər təkmilləşdirmə kurslarına göndərilir.

Məktəbin müəllimləri ilə görüşən Ali Məclisin Sədri demişdir ki, elm, təhsil cəmiyyətin inkişafında başlıca şərtdir. Ona görə də ölkəmizdə bu sahəyə xüsusi diqqət yetirilir, ən ucqar dağ kəndlərində belə müasir məktəb binaları tikilir. Bu da təhsilin keyfiyyətinin və qazanılan uğurların artmasına səbəb olmuşdur. Kükü kənd tam orta məktəbi də uğurlu nailiyyətlər qazanmışdır. Kollektiv bundan sonra da təhsil uğurlarının artırılması istiqamətində səylə çalışmalıdır.

Müəllimlər təhsilin inkişafına göstərilən qayğıya və yaradılan şəraitə görə minnətdarlıqlarını bildirmişlər.

Məktəb binasının həyətində də abadlıq işləri aparılmış, yaşıllıq və meyvə bağı salınmışdır.

Müasir iş şəraiti dövlət qurumlarının

fəaliyyətini gücləndirəcəkdir

Bu il Kükü kəndində aparılan geniş quruculuq tədbirləri çərçivəsində yeni kənd mərkəzi də tikilmişdir.

Oktyabrın 12-də Kükü Kənd Mərkəzinin açılışı olmuşdur.

Naxçıvan Muxtar Respublikası Ali Məclisinin Sədri Vasif Talıbov açılış mərasimində iştirak etmişdir.

Kükü kənd inzibati ərazi dairəsi üzrə nümayəndə Ağababa Babayev çıxış edərək demişdir ki, muxtar respublikada aparılan quruculuq işlərindən ucqar dağ kəndi olan Küküyə də pay düşmüşdür. İnsanların rahatlığının təmin olunması istiqamətində həyata keçirilən tədbirlərin nəticəsidir ki, kənd sakinləri elektrik enerjisindən, təbii qazdan, rabitə əlaqəsindən fasiləsiz istifadə edir. Əhalinin əksər hissəsi kənd təsərrüfatı məhsullarının istehsalı ilə məşğuldur. Bu il kənd sakinlərinə 18 min manat kredit verilmişdir. Bütün bunlar fərdi təsərrüfatların genişlənməsinə, bol məhsul istehsalına və sakinlərin rifah halının yaxşılaşmasına səbəb olmuşdur.

Ali Məclisin Sədri Kükü kəndində kompleks abadlıq-quruculuq işlərinin aparıldığını bildirərək demişdir: "Bu gün Kükü kəndində idarəetmə strukturları üçün yeni kənd mərkəzi, təhsilin səviyyəsini yüksəltmək üçün məktəb binası, insanların sağlamlığının qorunmasına xidmət edən həkim ambulatoriyası, sakinlərin gündəlik tələbatını ödəyən xidmət mərkəzi və müasir yol istifadəyə verilir. Həyata keçirilən bu tədbirlər ölkəmizdə bir kəndin timsalında görülən işlərdir. Ölkəmizin bütün yaşayış məntəqələrində bu cür tədbirlər həyata keçirilir, yeni sosial obyektlər, inzibati binalar istifadəyə verilir, insanların rahat yaşayışı təmin olunur".

Qeyd olunmuşdur ki, Kükü kəndində də əhalinin yaşayış səviyyəsinin yüksəldilməsinə hərtərəfli qayğı göstərilir. Kənddə heyvandarlığın, arıçılığın, maldarlığın və digər sahələrin inkişafı üçün güzəştli şərtlərlə kreditlər verilir, fərdi təsərrüfatlar genişləndirilir. Kənd telefonlaşdırılmış, elektrik enerjisinin və təbii qazın fasiləsiz verilişi təmin olunmuşdur. Eyni zamanda, kənd sakinlərindən 551-i dövlətdən əməkhaqqı, müavinət və təqaüd formasında vəsait alır. Həyata keçirilən bu tədbirlər kənd sakinlərinin məşğulluğunun təmin olunmasına, onların daha sıx məskunlaşmasına səbəb olmuşdur.

Ali Məclisin Sədri demişdir: "Ölkəmizdə yaşayış məntəqələrinin inkişafı, yaradılan yeni infrastruktur sahələri, istifadəyə verilən müasir sosial obyektlər dövlət-xalq birliyinin nəticəsidir. Bu birlik oktyabrın 9-da - ölkəmizdə keçirilən ən mühüm siyasi tədbirlərdən biri olan prezident seçkilərində bir daha özünü göstərdi. Demokratik şəkildə keçirilən seçkilərdə xalqımız ölkəmizi inkişaf və tərəqqiyə qovuşduran siyasi xəttə səs verdi".

Ali Məclisin Sədri seçkilərdə fəallıq göstərən, iştirak edən muxtar respublika sakinlərinə təşəkkürünü bildirmiş, bir daha kənd sakinlərini təbrik etmiş, onlara firavan həyat arzulamışdır.

Rəmzi açılışı bildirən lent kəsildikdən sonra binaya baxış olmuşdur.

Məlumat verilmişdir ki, binada rabitə evi, polis sahə və baytarlıq məntəqələri, kitabxana, Yeni Azərbaycan Partiyası ərazi ilk təşkilatı, inzibati ərazi dairəsi üzrə nümayəndəlik, bələdiyyə, arxiv, mədəniyyət evi və 68 yerlik zal vardır.

Kənd kitabxanasında 5 min 629 kitab vardır. Onlardan 1390-ı latın, 4 min 239-u isə kiril əlifbası ilə çap olunmuş ədəbiyyatlardır.

Baytarlıq məntəqəsində lazımi şərait yaradılmış, dərman vasitələri və soyuducu qoyulmuşdur. Bildirilmişdir ki, Kükü kəndinin fərdi təsərrüfatlarında 1620 baş iribuynuzlu, 7 min 750 baş xırdabuynuzlu, 1520 arı ailəsi və 6 min 76 baş quş saxlanılır. Həkim baytarlar mütəmadi olaraq heyvanlar arasında müayinələr aparır, yoluxucu xəstəliklərə qarşı profilaktiki tədbirlər görülür.

Rabitə evində quraşdırılan 384 nömrəlik ATS kənddə 221 abonentə xidmət göstərəcəkdir. Burada poçt məntəqəsi də yaradılmış, gündəlik mətbuatın, eləcə də danışıq və internet kartlarının satışı təşkil olunmuşdur.

Binanın ikinci mərtəbəsində inzibati ərazi dairəsi üzrə nümayəndəlik və Yeni Azərbaycan Partiyası ərazi ilk təşkilatı üçün də iş otaqları ayrılmışdır. Yeni Azərbaycan Partiyası Kükü kənd ərazi ilk təşkilatının 137 üzvü vardır. Onlardan 38-i gənclər, 45-i isə qadınlardır.

Kənd mərkəzini istiliklə təmin etmək üçün fərdi qazanxana quraşdırılmışdır. Binanın həyətində abadlıq işləri aparılmış, ağac və gül kolları əkilmişdir.

Kükü kənd həkim ambulatoriyasının

yeni binası istifadəyə verilmişdir

Oktyabrın 12-də Kükü kənd həkim ambulatoriyasının yeni binasının da açılışı olmuşdur.

Həkim Tamleyxa Cəbiyev bildirmişdir ki, son illər muxtar respublikamızda aparılan quruculuq tədbirləri səhiyyə obyektlərini də əhatə etmişdir. Şəhər, rayon, qəsəbə və kəndlərdə müasir xəstəxana binaları, həkim ambulatoriyaları tikilərək sakinlərin istifadəsinə verilir. Ucqar dağ kəndi olan Küküdə yeni həkim ambulatoriyasının istifadəyə verilməsi də əhaliyə göstərilən tibbi xidmətin səviyyəsini xeyli yüksəldəcəkdir.

Naxçıvan Muxtar Respublikası Ali Məclisin Sədri Vasif Talıbov çıxış edərək demişdir: "Dövlətimizin ən qiymətli sərvəti onun insanlardır. Bu gün Azərbaycanda həyata keçirilən sosial siyasətin əsasını insanların sağlamlığının qorunması, onların lazımi tibbi xidmətlə təmin olunması təşkil edir. Ölkəmizin şəhərlərində, rayon və kəndlərində müasir səhiyyə ocaqları tikilərək istifadəyə verilir. Həyata keçirilən tədbirlər muxtar respublikanın ucqar dağ kəndlərini də əhatə etmiş, səhiyyə işinin yüksək səviyyədə təşkili üçün yeni həkim ambulatoriyaları, feldşer-mama məntəqələri tikilərək istifadəyə verilmişdir. Kükü kəndində həkim ambulatoriyasının istifadəyə verilməsi də bu istiqamətdə görülən işlərin davamıdır. Həkim ambulatoriyası əhali sayı nəzərə alınaraq lazımi ştatlarla təmin edilmiş, tibb ocağında müasir səhiyyə avadanlıqları quraşdırılmışdır".

Ali Məclisin Sədri demişdir: "Ambulatoriyaların qarşısında duran əsas vəzifələr əhali arasında səhiyyə maarifi işinin aparılması, gigiyena qaydalarının izah olunması, hamilə qadınlara patronaj xidmətinin göstərilməsi və uşaqlar arasında peyvənd işinin təşkilindən ibarətdir. Kükü kənd həkim ambulatoriyasında da bu vəzifələrin yerinə yetirilməsi üçün lazımi şərait yaradılmışdır. Ambulatoriya kənddə yaşayan 2 minə yaxın sakinin sağlamlığının keşiyində duracaqdır. Ona görə də kollektiv üzərinə düşən vəzifəni layiqincə yerinə yetirmək üçün bilik və bacarıqlarını artırmalı, rayon mərkəzi xəstəxanası ambulatoriya ilə əlaqəli işləməli, tibb işçilərinin peşə hazırlığı kurslarında iştirakı təmin olunmalıdır".

Ali Məclisin Sədri yaradılan şəraitdən düzgün istifadə olunacağına əminliyini bildirmiş, kollektivə işlərində uğurlar arzulamış, rəmzi açılışı bildirən lenti kəsmişdir.

Məlumat verilmişdir ki, binada tibbi xidmətin yüksək səviyyədə təşkili üçün hər cür şərait yaradılmışdır. Ambulatoriya 2 mərtəbədən, 11 otaqdan ibarətdir. Burada stomatoloji kabinet, palata, doğuş, peyvənd, aptek, həkim, mama və manipulyasiya otaqları vardır. Hazırda səhiyyə ocağında 11 tibb işçisi çalışır.

Həkim ambulatoriyasının həyətində də abadlıq işləri aparılmışdır.

Küküdə yeni xidmət

mərkəzi fəaliyyətə başlamışdır

Oktyabrın 12-də Kükü kəndində xidmət mərkəzinin açılışı olmuşdur.

Naxçıvan Muxtar Respublikası Ali Məclisinin Sədri Vasif Talıbov rəmzi açılışı bildirən lenti kəsmişdir.

Məlumat verilmişdir ki, Kükü kənd xidmət mərkəzində kişi bərbərxanası, qadın gözəllik salonu, ət satışı yeri, ərzaq və təsərrüfat malları olmaqla, 2 mağaza fəaliyyət göstərir. Xidmət mərkəzinin istifadəyə verilməsi ilə 5 nəfər işlə təmin olunmuşdur. Mərkəzin həyətində abadlıq işləri aparılmış, yaşıllıqlar salınmışdır.

Mərkəzlə tanışlıqdan sonra kənd sakinləri ilə görüşən Ali Məclisin Sədri demişdir ki, Kükü kəndində yeni sosial obyektlərin istifadəyə verilməsi Azərbaycan dövlətinin inkişaf modelini özündə əks etdirir. Bu inkişaf və tərəqqi isə ümummilli lider Heydər Əliyevin siyasi xəttinin bəhrəsidir. Sakinlər yaradılanlardan səmərəli istifadə etməli, ölkəmizin inkişaf və tərəqqisinə öz töhfələrini verməlidirlər.

Kənd ziyalısı Yunis Quliyev sakinlərin xoş arzularını Ali Məclisin Sədrinə çatdıraraq demişdir ki, yenilik, müasirlik həm də rahat yaşayış, firavan həyat deməkdir. Bu gün Kükü kəndində buna nail olunmuş, sakinlərin rifah halının yüksəldilməsi istiqamətdə ardıcıl tədbirlər görülmüşdür. Bunlar ölkəmizdə ulu öndər Heydər Əliyevin siyasi kursunun uğurla davam etdirilməsinin nəticəsi, dövlətin kənd yaşayış məntəqələrinin yeniləşməsinə göstərdiyi qayğının, insanların rahatlığı istiqamətində həyata keçirdiyi ardıcıl tədbirlərin davamıdır.

Azərbaycan.- 2013.- 13 oktyabr.- S.6.