Biz həmişə Sizinləyik!

Allahsız yerdə otur, ağsaqqallsız yerdə oturma, - deyib babalarımız. Bu xalq həmişə öz ağsaqqallarını eşidib, onların məsləhətlərinə qulaq asıb. Bir işə başlayanda həmişə ağsaqqal xeyir-duası alıblar. Builki prezident seçkilərində də ilk xeyir-duanı məhz ağsaqqallar verdi və 2013-cü ilin fevral ayında Ağsaqqallar Şurasının qurultayında ulu öndər Heydər Əliyevin siyasi kursunu ləyaqətlə davam etdirən İlham Əliyevin yenidən prezidentliyə namizədliyini irəli sürdülər.

Artıq 9 oktyabr prezident seçkiləri arxada qalıb. Azərbaycan xalqının bütün dəyərli insanları kimi, Yardımlı ağsaqqalları, müharibə və əmək veteranları da cənab İlham Əliyevə səs verdilər. İndi hamı bu möhtəşəm qələbəni qeyd edir. Xalqımızın istəyi ilə cənab İlham Əliyev növbəti 5 ildə Azərbaycan Respublikasının Prezidenti seçildi.

Cənab İlham Əliyev yeganə dövlət başçısıdır ki, hakimiyyətdə olduğu müddətdə 3 dəfə Yardımlıda olub. Azərbaycan öz müstəqilliyini qazanandan sonra ilk dövrdə respublikada baş verən hadisələr fonunda ucqar dağ rayonu olan Yardımlı, demək olar ki, yaddan çıxmışdı. Lakin İlham Əliyevin hakimiyyəti dövründə hər birində bir tarix gizlənən dağların da üzərinə günəş doğdu. Yolları və məktəbləri acınacaqlı vəziyyətdə olan, qışda qazsızlıqdan donan, yayda susuzluqdan bağ-bağatları yanan yardımlılıların xoş gələcəyə inamları artdı.

Yardımlılıların ürəyində bu inamı İlham Əliyev rayona hər gəlişində bir daha sübut etdi. Yardımlıya hər gəlişində bu rayon üçün mühüm əhəmiyyət kəsb edən məsələlər öz həllini tapır.

Bəşəriyyətin yaşaması üçün lazım olan dörd ünsürdən birini - havanı bizlərə Tanrı bəxş edib. Qalan üçünü isə - yolu, qazı və suyu yardımlılılar üçün Prezident bəxş edib.

On il əvvəl Yardımlıda olan insan indi bu rayona gəlsə, onu tanımaz. Burada genişləndirilmiş küçələr, yeni tikilmiş sosial obyektlər, insanların daha yaxşı istirahət etməsi üçün göz oxşayan parklar, bu gün Avropa standartlarına cavab verən rayon mərkəzi xəstəxanası sözün əsl mənasında Yardımlını tanınmaz edib. Gələcəyimiz olan uşaqların yaxşı təhsil alması üçün son on ildə rayonda 60-a yaxın müasir tipli məktəb tikilib istifadəyə verilmişdir ki, bu da paytaxtdakı ən yaxşı orta məktəblərdən geri qalmır. Bu gün rayonumuz böyük bir tikinti meydanını xatırladır. Gənc nəslin sağlam böyüməsi üçün Olimpiya İdman Kompleksində sürətli iş gedir, şəhərin su-kanalizasiya sistemi yenidən qurulur, kənd yolları asfaltlaşdırılır, körpülər salınır. İlham Əliyevin Yardımlıya sonuncu səfəri zamanı açılışını etdiyi Yardımlı-Deman-Arvana yolunun 20 kilometrlik hissəsinin çəkilişi davam edir. 23 yaşayış məntəqəsini əhatə edən bu yolun tikintisi rayon mərkəzinin kəndlərlə nəqliyyat əlaqəsinin yaxşılaşdırılması, həmçinin iqtisadiyyatın və turizmin inkişafı baxımından mühüm əhəmiyyət kəsb edir.

Mənim yaşım 90-ı haqlayıb. 70 il müəllim işləmişəm, gənc nəslin təlim-tərbiyəsi ilə məşğul olmuşam. Hazırda Yardımlı Rayon Müharibə, Əmək və Silahlı Qüvvələr Veteranları Şurasının sədriyəm. Azərbaycan xalqının ümummilli lideri Heydər Əliyev veteranlara, xüsusilə də Böyük Vətən müharibəsi veteranlarına həmişə qayğı ilə yanaşmışdır. Müstəqilliyimizin ilk illərində bəzi üzdəniraqlar 9 may Qələbə bayramını ləğv etmək istəyirdilər ki, biz sovetlər uğrunda vuruşmuşuq. Ancaq xalqımızın ümummilli lideri 1993-cü ildə Azərbaycanda hakimiyyətə qayıdandan sonra vəziyyət tamamilə dəyişdi və veteranlara layiq olduqları münasibət göstərilməyə başlandı. Ədalət yenidən bərpa olundu və 9 may alman faşizmi üzərində Qələbə Günü hər il ölkəmizdə təntənəli surətdə qeyd edilir. Ulu öndər veteranlarla görüşlərin birində demişdir: "Azərbaycanın bütün ictimaiyyəti, bütün Azərbaycan xalqı bilməlidir ki, İkinci Dünya müharibəsinin, Böyük Vətən müharibəsinin veteranları bizim ən əziz, ən mötəbər insanlarımızdır. Onlara qayğı göstərmək, hörmət etmək bizim dövlətin və hər bir dövlət orqanının, hər bir namuslu Azərbaycan vətəndaşının borcudur".

Biz sevinirik ki, Heydər Əliyev tərəfindən qoyulan ənənələr bu gün də Prezident İlham Əliyev tərəfindən çox ləyaqətlə davam etdirilir. 2005-ci ilin may ayında Böyük Vətən müharibəsində Qələbənin 60 illik yubileyinə həsr olunmuş mərasimdə Prezidentin söylədiyi fikirlər biz veteranların ürəyindən oldu: "İstəyirəm biləsiniz ki, mən veteranlara bundan sonra da böyük qayğı ilə yanaşacağam. Sizin böyük xidmətləriniz olubdur, böyük yol keçmisiniz. Azərbaycanımız üçün, dövlətimizin inkişafı üçün böyük töhfələr vermisiniz. Hər bir vətəndaş, hər bir insan, xüsusilə vəzifəli şəxs sizə böyük diqqət və qayğı göstərməlidir. Mən tabeliyimdə olan bütün məmurlara da tapşırmışam ki, sizin problemlərinizlə məşğul olsunlar, lazımi işlər görsünlər ki, siz rahat yaşayasınız. Sizin buna haqqınız çatır. Siz Azərbaycan xalqının rifahı naminə fədakarcasına çalışmısınız".

Bu gün Yardımlıda veteranlara xüsusi diqqət və qayğı ilə yanaşılır. Rayonda keçirilən elə bir tədbir yoxdur ki, orada veteranlar iştirak etməsin. Rayonda veteranların istirahətinin və asudə vaxtının səmərəli keçirilməsi üçün rayon mərkəzində ikimərtəbəli Veteran evi tikilib, onların bütün problemləri rayon rəhbərliyi tərəfindən həll edilir. Veteranlarımıza göstərilən bu diqqət və qayğıya görə biz dövlət başçısına minnətdarıq.

İnanırıq ki, bu gün Azərbaycanımızın ən ağır və taleyüklü məsələsi olan Dağlıq Qarabağ problemini də Ali Baş Komandanın qurduğu qüdrətli, modern və Qafqazda ən güclü olan ordu ilə azad edəcəyik. Biz veteranlar da həmişə Prezidentin yanındayıq.

İnsan gərək görülən işə düzgün qiymət versin. Atalar məsəli var: qatığa qara deməklə qatıq qara olmaz. Bu gün bütün xalqımız ölkəmizdə gedən sosial-iqtisadi inkişafı görür və buna görə də öz taleyini növbəti 5 ildə də cənab İlham Əliyevə etibar edib. 9 oktyabrda Yardımlı rayon veteranları da bir nəfər kimi cənab İlham Əliyevə səs verdilər. Biz Azərbaycanın gələcəyinə səs vermişik. Azərbaycanın gələcəyi isə cənab İlham Əliyevlə bağlıdır. Yardımlı rayon müharibə, əmək və Silahlı Qüvvələr veteranları adından, bütün Yardımlı ağsaqqalları adından cənab İlham Əliyevi növbəti 5 ildə Azərbaycan Respublikasının Prezidenti seçilməsi münasibətilə təbrik edir, ona uzun ömür, cansağlığı, Azərbaycanımızın çiçəklənməsi və daha da qüdrətlənməsi yolunda müvəffəqiyyətlər arzulayıram.

Şahbaz HÜSEYNOV,

Yardımlı Rayon Müharibə, Əmək və Silahlı Qüvvələr Veteranları Şurasının sədri

Azərbaycan.-2013.- 23 oktyabr.- S.6.