Romada Azərbaycana həsr edilmiş təqdimat mərasimi olmuşdur

Oktyabrın 25-də Romada yerləşən İtaliya Silahlı Qüvvələrinin Ali Müdafiə Araşdırmaları Mərkəzində Azərbaycana həsr olunmuş təqdimat keçirilmişdir.

AzərTAc xəbər verir ki, tədbirdə mərkəzin rəhbər heyəti və yüksək rütbəli zabitlər iştirak etmişlər.

Tədbirdə çıxış edən Azərbaycanın İtaliyadakı səfiri Vaqif Sadıqov ölkəmizin tarixi, xarici siyasətinin əsas istiqamətləri, ölkələrimiz arasındakı münasibətlər barədə ətraflı məlumat vermişdir. Azərbaycanda baş verən siyasi və iqtisadi proseslərdən danışan səfir bu sahədə əldə olunan uğurlardan da söz açmışdır.

Ermənistan-Azərbaycan, Dağlıq Qarabağ münaqişəsinə toxunan səfir qeyd etmişdir ki, 20 ildən artıqdır ki, ermənilər tərəfindən ölkəmizə qarşı etnik təmizləmə siyasəti həyata keçirilir. Ermənistan silahlı qüvvələrinin ölkəmizə hərbi təcavüzü nəticəsində Azərbaycan torpaqlarının 20 faizi - Dağlıq Qarabağ və ona bitişik yeddi rayonun ərazisi işğal olunmuş, bir milyondan artıq soydaşımız qaçqın və məcburi köçkün vəziyyətinə düşmüşdür.

Vaqif Sadıqov işğal edilmiş Azərbaycan torpaqlarından erməni silahlı qüvvələrinin qeyd-şərtsiz çıxarılması barədə BMT Təhlükəsizlik Şurasının dörd məlum qətnaməsi barədə də məlumat vermişdir. Bildirmişdir ki, Ermənistan uzun illərdir həyata keçirdiyi işğalçılıq siyasətinə son qoymasa, Azərbaycan Ordusu torpaqlarımızın azad olunması istiqamətində üzərinə düşən öhdəliyi yerinə yetirmək məcburiyyətində qalacaqdır.

Tədbirdə təqdimatla çıxış edən ölkəmizin İtaliyadakı hərbi attaşesi, polkovnik Ənvər İbrahimov Azərbaycan Silahlı Qüvvələrinin yaranma tarixi, müstəqillik dövründə hərbi sahədə əldə olunan uğurlardan danışmışdır. Diqqətə çatdırmışdır ki, Azərbaycan hərbçiləri NATO-nun həyata keçirdiyi sülhməramlı əməliyyatlarda fəal iştirak edirlər.

Ənvər İbrahimov həmçinin tədbir iştirakçılarına Azərbaycan və İtaliya arasında hərbi əməkdaşlığın hazırkı vəziyyəti və bu sahədə görüləcək işlər barədə də məlumat vermişdir.

Sonda tədbir iştirakçılarını maraqlandıran suallar cavablandırılmışdır.

Maqsud DADAŞOV,

AzərTAc-ın xüsusi müxbiri

Roma

Azərbaycan.-2013.- 26 oktyabr.- S. 4.