İstanbulda «Marmaray» layihəsinin açılış mərasimi olmuşdur

Azərbaycan nümayəndə heyəti mərasimdə iştirak etmişdir

İstanbuldakı Üsküdar meydanında Türkiyə Prezidenti Abdullah Gül, Baş nazir Rəcəb Tayyib Ərdoğan, Yaponiyanın Baş naziri Şinzo Abe, Somali Prezidenti Həsən Şeyx Mahmud və dünyanın bir çox ölkəsindən gəlmiş nümayəndə heyətlərinin iştirakı ilə Mərmərə dənizinin 1400 metr dərinliyindən 13.6 kilometr uzunluğunda çəkilmiş "Marmaray" dəmir yolu layihəsinin açılış mərasimi olmuşdur.

Azərbaycan Respublikasının nəqliyyat naziri Ziya Məmmədovun rəhbərlik etdiyi nümayəndə heyəti mərasimdə iştirak etmişdir.

Prezident Abdullah Gül və Baş nazir Rəcəb Tayyib Ərdoğan mərasimdə çıxış etmişlər. Bildirilmişdir ki, dənizaltı bu xətt tunel vasitəsilə Avropa və Asiya qitələrini bir-birinə bağlayaraq, saatda 75 min, gündəlik isə 1 milyona yaxın sərnişin daşınmasına imkan verir. Hələ 150 il əvvəl Osmanlı sultanı Əbdülhəmidin arzusu olan bu dənizaltı dəmir yolu xəttinin tikintisi o zamanın texnikasının yetərsiz olduğu səbəbindən həyata keçməmişdi. Atatürkün qurduğu cümhuriyyətin 90-cı ildönümündə bu əfsanə həqiqətə çevrildi.

Açılış mərasimində iştirak edən Türkiyə Dövlət Dəmir Yolu İdarəsinin baş direktoru Süleyman Karaman AzərTAc-a bildirmişdir ki, "müasir İpək yolu" kimi qiymətləndirilən və Londonla Pekini birləşdirəcək nəhəng kommunikasiya xəttinin iki mühüm vəsiləsi var: bunlardan biri "Marmaray", digəri isə tikintisi uğurla davam edən Bakı-Tbilisi-Qars layihələridir. Nazir demişdir ki, Qars vilayətində logistik mərkəzin yaradılması üçün 330 hektar torpaq sahəsi ayrılmışdır. Burada ildə 35 milyon ton yük işlənilməsi üçün nəhəng kompleks yaradılıb.

Açılış mərasimində çıxışlardan sonra Diyanət İşləri başkanı Məhmət Görməz dualar oxudu. Dövlət və hökumət başçıları rəmzi açılışı bildirən lenti kəsdilər və qatarla "Marmaray" tunelində səyahət etdilər.

Oqtay BAYRAMOV,

AzərTAc-ın xüsusi müxbiri

İstanbul

Azərbaycan.-2013.- 30 oktyabr.- S.4.