Tələbə Qəbulu üzrə Dövlət Komissiyasının sədri Şirvan şəhərində vətəndaşları qəbul etmişdir

Prezident İlham Əliyevin mərkəzi icra hakimiyyəti orqanları rəhbərlərinin bölgələrdə vətəndaşların qəbulu ilə əlaqədar verdiyi tapşırıqlara müvafiq olaraq Tələbə Qəbulu üzrə Dövlət Komissiyasının (TQDK) sədri Məleykə Abbaszadə sentyabrın 2-də Şirvan şəhərində vətəndaşları qəbul etmişdir.

AzərTAc xəbər verir ki, qəbuldan əvvəl Məleykə Abbaszadə TQDK-nın Şirvan regional bölməsinin açılış mərasimində iştirak etmiş, şəhərin pedaqoji kollektivi ilə görüşmüş, onlarla təhsil, dərsliklərin hazırlanması, ali və orta ixtisas məktəblərinə qəbul prosesi mövzularında fikir mübadiləsi aparmışdır. Sonra TQDK-nın sədri Şirvan şəhərinin, Saatlı, Sabirabad, Hacıqabul, Salyan və Neftçala rayonlarından olan vətəndaşları qəbul etmişdir.

Qəbulda qaldırılan məsələlərin bir qismi yerindəcə həll olunmuşdur. TQDK-nın sədri bəzi vətəndaşların müraciətlərinə isə qanunvericilik çərçivəsində apelyasiya komissiyasında baxılacağına söz vermişdir.

Vətəndaşlar qəbula və habelə sərbəst fikir mübadiləsi üçün yaradılan şəraitə görə minnətdarlıqlarını bildirmişlər.

Azərbaycan. - 2013.- 3 sentyabr.- S. 4.