Forum iştirakçıları Qəbələdə oldular

Xaricdə Təhsil Alan və Məzun Olmuş Gənclərin Beynəlxalq Forumunun (ASAİF) XI Yay Bakı Forumunun iştirakçıları sentyabrın 1-də Azərbaycanın gözəl guşələrindən biri olan Qəbələ rayonuna səfər ediblər. 400-dən çox gəncin iştirak etdiyi bu səfər "Bizim forum, bizim seçim, bizim Azərbaycan" devizi altında keçirilən 3 günlük Bakı forumunun sonuncu gününə təsadüf etdi.

Səfər çərçivəsində forum iştirakçıları Qəbələ rayon Mədəniyyət Mərkəzində oldular. Burada ASAİF-çilərlə Azərbaycan Ağsaqqallar Şurasının sədri, Milli Məclisin deputatı Fəttah Heydərov və rayon rəhbərliyinin nümayəndələri arasında görüş keçirildi. Öncə gənclərə Qəbələ rayonunun coğrafi mövqeyi, infrastrukturu, əhalinin məşğulluğu və inşa olunan yeni müəssisə, fabrik, zavodlar barədə geniş məlumat verildi. Qeyd edildi ki, 98 min əhalisi olan bu rayonda son 10 ildə görülən uğurlu işlər nəticəsində əhalinin yaşayış səviyyəsi yüksəlib. Rayonda çoxsaylı sosial obyektlər açılıb. Turizm üçün ən əlverişli rayon olan Qəbələdə dünyanın ən məşhur hotelləri sırasına daxil olan hotellər, istirahət mərkəzləri açılıb. Respublikada turizm sektorunun inkişafı üçün ixtisaslı kadrlar hazırlayan müəssisələrdən biri də Qəbələdə yerləşən Qəbələ Şəhər Turizm və Hotelçilik üzrə Peşə Tədris Mərkəzidir.

Milli Məclisin deputatı Fəttah Heydərov bildirdi ki, Qəbələ artıq Azərbaycanın mədəniyyət mərkəzinə çevrilməkdədir. Rayonda 2009-cu ildən başlayaraq hər il yay aylarında beynəlxalq müsiqi festivalı keçirilir. Qəbələdə bir çox ölkələrdə mövcud olmayan pianino zavodu da var.

Gəncləri maraqlandıran sualları cavablandıran Ağsaqqallar Şurasının sədri ümummilli lider Heydər Əliyevlə bağlı maraqlı xatirələrini də bölüşdü. Onun sözlərinə görə, dahi lider Qəbələyə səfər edərkən rayonun təbiəti onu çox məmnun edib. Buranın gözəllikləri ilə bağlı dahi şəxsiyyət deyib: "Qəbələ Azərbaycanın İsveçrəsidir". Bu fikirlərdən sonra rayonun sosial-iqtisadi inkişafı daha da sürətləndirilib və Qəbələdə onlarla müəssisə, zavod inşa olunub. Təbiətin qoynunda insanların asudə vaxtlarının daha gözəl keçirməsi üçün istirahət mərkəzləri salınıb.

Sonra Fəttah Heydərov diqqətə çatdırıb ki, inkişaf etməkdə olan müasir Azərbaycanın gələcəyi bugünkü gənclərin əlindədir. Dahi lider Heydər Əliyevin yaratdığı müasir Azərbaycanı bu gün dünyaya tanıdan, müstəqil siyasət aparan Prezident İlham Əliyev Azərbaycan gəncliyinə arxalanır. Bu işdə ən ağır yük xaricdə təhsil alan tələbələrimizin çiyinlərinə düşür. Çünki onlar təhsil almaqla bərabər, Azərbaycan həqiqətlərinin, tarixinin, mədəniyyətinin və adət-ənənəsinin yüksək səviyyədə təbliğatını aparmalıdırlar. Bu baxımdan ASAİF-in üzərinə götürdüyü missiya hər bir azərbaycanlını sevindirir. Adı çəkilən təşkilat xaricdə təhsil alan gənclərin şəbəkələşməsini təşkil etməklə, onların birliyini qurmaqla Azərbaycan dövlətinə, dövlətçiliyinə öz töhfəsini verir.

Çıxışının sonunda bu işdə əməyi olan bütün ASAİF-çilərə təşəkkürünü bildirən Milli Məclisin deputatı gəncləri daha möhkəm bağlarla bir-birinə dəstək olmağa, azərbaycançılıq ideyasını dünyada dayanmadan təbliğ etməyə səslədi.

Görüşdən sonra forum iştirakçıları Qəbələ rayonu ilə yaxından tanış oldular və tədbir "Qafqaz Riverside" hotelində maraqlı istirahət, musiqili proqramlarla davam etdirildi. Bununla da, ASAİF-in 3 günlük XI Yay Bakı Forumu başa çatdı.

Rəşad BAXŞƏLİYEV

Azərbaycan. - 2013.- 3 sentyabr.- S. 5.