Prezident İlham Əliyev Niderlandın Azərbaycandakı səfirinin etimadnaməsini qəbul etmişdir

Azərbaycan Respublikasının Prezidenti İlham Əliyev sentyabrın 3-də Niderland Krallığının ölkəmizdəki səfiri Robert Jan Qabrielsenin etimadnaməsini qəbul etmişdir.

Səfir Robert Jan Qabrielsen fəxri qarovul dəstəsinin qarşısından keçdi.

Diplomat etimadnaməsini Prezident İlham Əliyevə təqdim etdi.

Sonra Azərbaycan Prezidenti İlham Əliyev səfirlə söhbət etdi.

Robert Jan Qabrielsen paytaxtımızda gedən sürətli inkişaf proseslərinin onda dərin təəssürat yaratdığını dedi. O, Niderland Kralı əlahəzrət Villem-Aleksandrın Azərbaycan xalqına ən xoş arzularını çatdırdı.

Görüşdə Azərbaycan ilə Niderland Krallığı arasında ikitərəfli münasibətlərin inkişafı üçün yaxşı potensialın mövcud olduğu vurğulandı, əlaqələrimizin müxtəlif sahələrdə inkişaf etdirilməsində qarşılıqlı layihələrin önəmi qeyd edildi.

Azərbaycan-Avropa İttifaqı əməkdaşlığının daha da genişləndirilməsi ilə bağlı məsələlər ətrafında fikir mübadiləsinin aparıldığı görüşdə ikitərəfli münasibətlərimizin bundan sonra da möhkəmləndiriləcəyinə əminlik ifadə olundu.

AzərTAc

Azərbaycan. - 2013.- 4 sentyabr.- S. 2.