Son 10 ildə gənclər siyasəti üçün dövlət büdcəsindən ayrılan vəsait 100 dəfə artıb

Dünən gənclər və idman naziri Azad Rəhimov 2013-cü ilin son 8 ayında nazirliyin fəaliyyətinə həsr olunmuş mətbuat konfransı keçirib. Nazir ölkəmizdə gənclərə və idmana göstərilən dövlət qayğısından danışaraq, onların bu sahədə qazandığı nailiyyətləri yüksək qiymətləndirdi. Qeyd etdi ki, gənclər aparıcı qüvvədir və onlara sağlam, fəal həyat mövqeyi aşılanması, geniş fəaliyyət şəraiti yaradılması Prezident İlham Əliyevin daim diqqət mərkəzindədir. Hər cür imtiyazlara malik olan Azərbaycan gənclərinin istər işlə təminatında, istər xarici ölkələrdə təhsil almalarında, istərsə də onların istirahətlərinin təşkilində böyük proqramların reallaşdırılması istiqamətində yeni layihələrin həyata keçirilməsi üçün ardıcıl tədbirlər görülür.

Azad Rəhimovun sözlərinə görə, gənclər siyasəti ilə bağlı cari ilin ötən dövründə bütövlükdə 90-dan artıq tədbir həyata keçirilib. 200-dən artıq azərbaycanlı gənc xaricdə keçirilən tədbirlərdə iştirak edib. Ötən müddət ərzində müxtəlif bölgələrdə 19 Gənclər Evi açılıb. Son 10 ildə dövlət gənclər siyasəti üçün dövlət büdcəsindən ayrılan vəsait 100 dəfə artaraq 2012-ci ildə 25 milyon manat təşkil edib.

Gənclərin ictimai fəallığının artmasının qeyri-hökumət təşkilatlarının sayının dinamikasında göründüyünü deyən A.Rəhimov belə təşkilatların sayının 10 il ərzində təxminən 5 dəfə artaraq 51-dən 250-yə çatdığını bildirdi: "Gənclərin təşəbbüslərini və ictimai fəallığını stimullaşdırmaq, yeni menecerlər formalaşdırmaq məqsədilə onların dəstəklənmiş layihələrinin sayı 2006-cı illə müqayisədə 25 dəfə, layihələrə ayrılmış maliyyə vəsaitləri isə 38 dəfəyədək artıb. Təhsil alan gənclərə sosial dəstəyin artırılması məqsədilə 197 min tələbəyə 30 ölkədə 80 min obyektdən imtiyazlı istifadə etmək hüququ verən vahid tələbə kartının pulsuz paylanmasına başlanılıb".

Gənclərin beynəlxalq əməkdaşlığı əhəmiyyətli dərəcədə genişlənib, ikitərəfli və çoxtərəfli əlaqələrin olduğu dövlətlərin sayı 63-dək artıb. Hər il ölkəyə müxtəlif tədbirlərlə bağlı gələn və xarici ölkələrə göndərilən gənclərin sayı da artmaqdadır. Hazırda orta hesabla il ərzində mübadilədə 2 minədək gənc iştirak edir ki, bu da 2003-cü illə müqayisədə 20 dəfə çoxdur.

600 min gənc ilk dəfə seçkidə iştirak edəcək

"Azərbaycan gəncliyi 2011-2015-ci illərdə" Dövlət Proqramının icrası ilə əlaqədar gənclər təşkilatlarının layihələrinin qismən maliyyələşdirilməsi ilə bağlı elan edilən müsabiqələr barədə məlumat verən Azad Rəhimov bildirdi ki, 2013-cü ildə gənclər sektorunda olan 71 QHT-yə 1 milyon 500 min manat məbləğində qrant ayrılıb. Cari ilin 27-30 mart tarixlərində "Azərbaycan 2020: gənclərin baxışı" mövzusunda İtaliya Respublikasında Xarici Ölkələrdə Təhsil Alan və Məzun Olmuş Azərbaycanlı Gənclərin Roma Forumu keçirilib. Forumda 500-ə yaxın tələbə və məzun, İtaliyanın və Azərbaycanın dövlət orqanlarının və gənclər təşkilatlarının nümayəndələri iştirak ediblər.

Gənclər arasında Azərbaycan xalqının ümummilli lideri Heydər Əliyevin 90 illik yubileyinə həsr olunmuş "Heydər Əliyev mənim üçün kimdir?" mövzusunda esse yazı müsabiqəsi keçirilib. "Mən Azərbaycan haqqında nə bilirəm?" mövzusunda keçirilmiş esse yazı müsabiqəsinin Almaniya, Litva, Xorvatiya, Mərakeş, Misir, ABŞ, Braziliya, Cənubi Afrika Respublikasından olan qaliblərin Azərbaycana səfərləri təşkil edilib.

İyunun 13-16-da isə Bakı şəhərində Azərbaycan xalqının ümummilli lideri Heydər Əliyevin 90 illik yubileyinə həsr olunmuş "Gənc liderlərin formalaşmasında şəxsiyyətlərin rolu" mövzusunda Beynəlxalq Gənclər Forumunun keçirildiyini vurğulayan Azad Rəhimov qeyd etdi ki, forumda 28 ölkədən 44 ekspert və gənclər təşkilatlarının nümayəndələri, Azərbaycandan isə gənclər təşkilatının 200 təmsilçisi iştirak edib.

Nazir, həmçinin gənclərin seçkilərdə iştirakının vacibliyini də vurğuladı: "Bu il 600 min gənc ilk dəfə seçkidə iştirak edəcək. Əsas məqsədimiz odur ki, bu sahədə gəncləri maarifləndirək və onları məntəqələrə cəlb edək. Bunun üçün regionlarda iş aparılır, videoçarxlar hazırlanır".

Medalların sayında yeni rekordun astanasındayıq

İdman sahəsində əldə olunan nailiyyətlərdən danışan nazir bildirdi ki, ötən 8 ay ərzində Azərbaycan milli komandalarının hər biri 52 təlim-məşq toplanışında iştirak ediblər. Ölkəmizdə 125 respublikadaxili və 20 beynəlxalq turnir keçirilib. 158 beynəlxalq yarışda yığmalarımız iştirak edibdir: "Ən böyük uğurumuz Rusiyanın Kazan şəhərində keçirilmiş XXVII Ümumdünya Universiadasında əldə olunub. Orada 4 qızıl, 5 gümüş, 7 bürünc olmaqla 16 medal qazanılıb. Ölkəmiz dünyada 15-ci yeri tutaraq tarixi uğura imza atıb. Hollandiyanın Utrext şəhərində keçirilmiş Gənclərin Olimpiya Festivalında isə idmançılarımız 2 qızıl, 1 bürünc medala sahib olublar. Qarşıda isə idmançılarımızı İndoneziyanın paytaxtı Cakartada keçiriləcək III İslam Oyunları gözləyir. Sentyabrın 22-dən oktyabrın 2-dək keçiriləcək yarışa Azərbaycan 130 nəfərlik nümayəndə heyəti ilə yollanacaq".

Cari ilin 8 ayı ərzində idmançılarımızın beynəlxalq yarışlarda 70 qızıl, 86 gümüş, 96 bürünc medal əldə etdiyini vurğulayan nazir ilin sonunadək medalların sayının 700-dən çox olacağına və yeni rekord əldə ediləcəyinə inandığını qeyd etdi.

A.Rəhimov 2015-ci il I Avropa Oyunları və 2017-ci il İslam Həmrəyliyi Oyunlarından başqa Bakıda keçiriləcək bir sıra nüfuzlu yarışlara da hazırlıq işlərinin getdiyini bildirdi. O, şahmat üzrə 2015-ci ildə Dünya Kuboku, 2016-cı ildə Olimpiada, gələn il isə Dünya İdman Jurnalistləri Konqresinin də paytaxtımızda keçiriləcəyini dedi.

Ölkəmizdə bu il Qobustan, Şirvan, Xaçmaz, Qax və Saatlıda tikilib istifadəyə verilən Olimpiya idman kompleksləri barədə məlumat verən nazir bu ay Göygöldə də yeni kompleksin açılacağını bildirdi: "Ağcabədi və Abşeron rayonlarında komplekslərin tikintisi davam etdirilir. Eyni zamanda, Olimpiya Hərəkatı və İdman Muzeyinin tikintisi üçün torpaq sahəsi ayrılıb və ilkin layihələşdirmə işləri həyata keçirilir".

"Azərbaycan" qəzetinin əməkdaşının "Olimpiya idman komplekslərinin açılışlarından bir müddət keçdikdən sonra fəaliyyətlərində hər hansı bir problem olubmu" sualına nazir Azad Rəhimov cavab verərək bildirdi ki, Azərbaycanda həmin qurğularda cari təmir aparılıb: "Biz kompleksləri büdcədən əlavə vəsait götürmədən öz daxili imkanlarımız hesabına təmir etdirdik. Belə problemlər bütün dünyada olur. Çalışırıq ki, olmasın. Amma kompleksləri 40-dan artıq tikinti təşkilatı tikir. Birində təcrübə, digərində məsuliyyət daha çox olur. Kompleksdən istifadə edə bilmədiyimizi demək olmaz".

Elçin CƏFƏROV

Azərbaycan. - 2013.- 4 sentyabr.- S. 4.