MDB Parlament Assambleyasının müşahidə qrupunun üzvləri Samuxda olmuşlar

MDB Parlament Assambleyasının (MDB PA) müşahidə qrupunun üzvləri sentyabrın 3-də Samux rayonunda olmuşlar. AzərTAc xəbər verir ki, rayon icra hakimiyyətində Azərbaycan Respublikasının Prezidenti seçkilərinin uzunmüddətli monitorinqini həyata keçirən MDB PA-nın ekspert qrupunun üzvləri ilə keçirilmiş görüşdə seçkilərə hazırlıqla bağlı mövcud vəziyyət müzakirə edilmişdir.

Qonaqlara rayon haqqında geniş məlumat verilmiş və sentyabrın 9-da keçiriləcək prezident seçkiləri ilə bağlı görülən işlər diqqətə çatdırılmışdır.

Sonra müşahidə missiyasının üzvləri rayonda fəaliyyət göstərən 102 saylı Samux seçki dairəsinin dairə seçki komissiyasında görülən işlərlə tanış olmuşlar.

Seçkilərin yüksək səviyyədə, aşkarlıq və demokratiya şəraitində keçməsi üçün hazırlıq işlərinin vəziyyəti ilə əlaqədar dairə seçki komissiyasının sədri Bayram Qasımovun məlumatını dinləyən müşahidəçilər müxtəlif suallarla müraciətlər etmişlər. Seçki dairəsinin otaqlarını gəzən müşahidəçilər hazırlığın səviyyəsindən razı qaldıqlarını bildirmişlər.

Seçki dairəsinin Samux şəhərində yerləşən 1, 2 və 3 saylı, eləcə də rayonun Qarayeri qəsəbəsində yeni istifadəyə verilmiş 6 saylı seçki məntəqələrində olan qonaqlar məntəqə seçki komissiyasının üzvləri ilə söhbətlər etmiş, seçkilərin Azərbaycan Respublikası Seçki Məcəlləsinin tələblərinə uyğun aparılması üçün görülən işləri nəzərdən keçirmişlər.

Azərbaycan Respublikasının Prezidenti seçkilərinin uzunmüddətli monitorinqini həyata keçirən MDB Parlament Assambleyasının ekspert qrupunun üzvləri qərb bölgəsində seçkilərə hazırlıqlarla bağlı müşahidələrini başa çatdırmışlar.

Azərbaycan. - 2013.- 4 sentyabr.- S. 6.