Azərbaycan və İsveç arasındakı əlaqələrin inkişafı məmnunluq doğurur

Sentyabrın 3-də İsveçin Kralı əlahəzrət XVI Karl Qustav Azərbaycanın bu ölkədəki səfiri Rafael İbrahimovu diplomatik fəaliyyətinin başa çatması ilə əlaqədar qəbul etmişdir.

Azərbaycanın İsveçdəki səfirliyindən AzərTAc-a bildirmişlər ki, R.İbrahimov Prezident İlham Əliyevin salamlarını İsveç Kralına çatdırmışdır. Əlahəzrət XVI Karl Qustav da öz növbəsində salamlarının və ən xoş arzularının Prezident İlham Əliyevə çatdırılmasını xahiş etmişdir.

Görüşdə Azərbaycan və İsveç arasında münasibətlərin inkişaf perspektivləri ilə bağlı fikir mübadiləsi aparılmışdır.

Həmin gün Rafael İbrahimov İsveçin dövlət katibi Qunnar Oom ilə görüşmüşdür.

Söhbət zamanı ölkələrimiz arasında dostluq və əməkdaşlıq əlaqələrinin inkişafından məmnunluq bildirilmişdir. İsveçin Bakıda səfirliyinin açılması ikitərəfli münasibətlərin inkişafına böyük töhfə kimi qiymətləndirilmişdir.

Azərbaycan. - 2013.- 4 sentyabr.- S. 6.