Dövlətin qayğısı hər kəsə çatır

Qazanılan nəticələr isə fərqlidir

Xalqımızın ümummilli lideri Heyder Əliyev "Təhsil millətin gələcəyidir" müdrik deyimi ilə əslində bu sahədə dövlət siyasətinin gələcək dövr üçün aydın istiqamətlərini müəyyənləşdirmişdir. Prezident İlham Əliyev ötən 10 il ərzində milli təhsilimizin inkişafı, Avropaya inteqrasiyası, sahənin maddi-texniki bazasının möhkəmləndirilməsi naminə dövlət əhəmiyyətli, taleyüklü direktiv qərarlara imza atmış, qarşıya qoyulan şərəfli məqsədin reallaşdırılması, milli təhsilimizin inkişafı üçün xalqın bütün təbəqələri tərəfindən razılıqla qarşılanan zəruri tədbirlər görmüşdür. Təhsilin maddi-texniki bazasının möhkəmləndirilməsi istiqamətində Heydər Əliyev Fondunun prezidenti, Milli Məclisin deputatı Mehriban xanım Əliyevanın təşəbbüsləri, həyata keçirdiyi genişmiqyaslı layihələr hər kəsdə məmnunluq doğurur. Təhsil Nazirliyində son dövrlərdə baş verən yeniləşmə, bunun nəticəsi olaraq təhsil prosesinin təkmilləşməsi yönümündə islahatların başlanması da ictimaiyyətdə birmənalı razılıq yaradıb.

Qarşıdan yeni dərs ili gəlir. Təbii ki, yeni dərs ili özü ilə yeni qayğılar, yeni vəzifələr də gətirir. Başa vurulan dərs ilinin nəticələrini araşdırmaq, qazanılan uğurları təqdir etmək, yol verilmiş nöqsanları aşkar edib aradan qaldırmaq nailiyyətləri daha da möhkəmləndirmək yolunda, heç şübhəsiz, etibarlı zəmin olar.

Mingəçevirin təhsil göstəricisi: 700 ballıq iki nəticə, 18 qızıl medal

Dövlət paytaxt Bakı ilə yanaşı, bütün bölgələrdə təhsilin inkişafı üçün zəruri qayğı və diqqətini əsirgəmir. Ancaq ayrı-ayrı şəhər və rayonların təhsilin inkişafı istiqamətində qazandığı nəticələr kifayət qədər fərqlidir. Energetiklər şəhəri olan Mingəçevirdə təhsilin inkişafına böyük önəm verilir. Şəhər rəhbərliyi gənc nəslin sağlam ruhda böyüməsi, yüksək intellektual səviyyəyə malik olması, vətənini, xalqını, dövlətini sonsuz məhəbbətlə sevən kamil insanlar kimi formalaşması üçün müasir dövrün tələblərinə uyğun tədbirlər görür, təhsil müəssisələrinin qayğılarını daim diqqət mərkəzində saxlayır. Mingəçevir Şəhər Təhsil Şöbəsinin müdiri Sahib Məmmədov söhbət zamanı dedi:

- Dövlətimizin davamlı və yetərli qayğısı müqabilində zəif işləməyə haqqımız yoxdur. Şəhərdə 22 orta təhsil müəssisəsi fəaliyyət göstərir. Uzun illərdən bəri şəhərin bütün məktəblərində məlum hadisələrlə bağlı çox sayda qaçqın və məcburi köçkün ailəsi məskunlaşmışdı. Belə vəziyyət isə təlimin və tədrisin gedişinə öz mənfi təsirini göstərirdi. Bu ilin aprel ayında məktəblərdə məskunlaşan bütün ailələr dövlət başçısının təşəbbüsü ilə yeni inşa edilmiş qəsəbəyə köçürüldülər. Köçürülən ailələrin sayı 400-dən çox idi. İndi bizi yeni dərs ilinə hazırlıq qayğıları düşündürür. Şəhər 3 saylı orta məktəbin əsaslı təmiri müvəffəqiyyətlə başa çatdırılmışdır. Şəhər 4 və 10 saylı məktəblərin əsaslı təmiri isə davam etdirilir.

Mingəçevir Şəhər Təhsil Şöbəsinin müdiri Sahib Məmmədov söhbət zamanı ötən dərs ilinin uğurlu yekunlarından və qazanılan nailiyyətlərdə dövlət qayğısının müstəsna rolundan ətraflı söz açdı. Məlum olur ki, 2013-cü ildə 9-cu sinfi bitirən 1.072 nəfər şagirddən 9 nəfəri fərqlənmə şəhadətnaməsi almış, 11-ci sinfi bitirən 829 nəfər şagirddən isə 18 nəfəri qızıl medala layiq görülmüşdür. Bütövlükdə orta məktəblərin buraxılış imtahanlarında qazanılan nəticə respublika üzrə ən yüksək göstəricilərdən sayılır. Bu il ali məktəblərə qəbul olunmaq üçün sənəd verən 667 nəfərin 384-ü tələbə adını qazanmışdır. Çox fərəhlidir ki, Mingəçevir məzunlarının 2 nəfəri 700 bal, 29 nəfəri 600-700 arası, 53 nəfəri isə 500-600 arası bal toplayaraq bütün şəhər sakinləri üçün qürurverici uğura imza atmışlar. Mingəçevir Şəhər İcra Hakimiyyətinin başçısı Niyazi Bayramov yüksək balla ali məktəblərə qəbul olunan məzunların böyük bir qrupunu bu günlərdə qəbul etmiş, onlara təhsil uğurlarını bundan sonra da davam etdirməyi arzulamış, təhsil zərbəçilərinə qiymətli hədiyyələr təqdim etmişdir.

Yaxşı şagird yaxşı müəllimin yetirməsidir

Mingəçevirdə şərəfli müəllim peşəsinə bütün varlığı ilə bağlanan, elm çırağının gerçək pərvanələrinə çevrilən müəllimlər kifayət qədər çoxdur. Sıradan bir fakt dediyimiz fikrin təsdiqi olar. Mingəçevir texniki-humanitar liseyin müəllimləri Sevda İsmayılova və Arzu Hüseynovanın keçən il hazırladıqları "Riyaziyyat-5" dərsliyi Təhsil Nazirliyi tərəfindən alternativ dərslik kimi təsdiq edilmişdi. Bu qabaqcıl müəllimlərin 2013-cü ildə hazırladıqları "Riyaziyyat-6" dərsliyi isə artıq bu ildən 6-cı siniflər üçün əsas dərslik kimi təsdiq edilmişdir.

Peşəkar müəllimlərin ümidverən yetirmələri olan mingəçevirli şagirdlər təhsildə olduğu kimi, ictimai işlərdə də çox fəaldırlar. Ulu öndər Heydər Əliyevin 90 illik yubileyinə həsr olunmuş bütün müsabiqələrdə qaliblər sırasında yer alan nur şəhərinin yeniyetmələri idman üzrə məktəblilərin il boyu spartakiadasında respublika yarışının yekununa görə ikinci yer, "Ana dilimizi sevək, sevdirək" respublika inşa müsabiqəsində birinci yer, "Fövqəladə hallar uşaqların gözü ilə" müsabiqəsində bütün nominasiyalar üzrə 10 nəfər şagirdlə qaliblər sırasında olmaq və yuxarıda xoş duyğularla söhbət açdığımız nailiyyətlər ondan xəbər verir ki, Mingəçevir təhsili bu gün doğru yoldadır və təlim-tərbiyə sahəsində daha böyük uğurlar qazanmağa qadirdir.

Təəssüf ki, Mingəçevir təhsilinin ünvanına deyilən xoş sözləri bir çox digər rayonlara aid etmək mümkün deyildir. İşini müasir tələblər səviyyəsində qura bilməyən, mütərəqqi təlim-tədris metodlarını yaradıcılıqla tətbiq etməyi bacarmayan rayon təhsil şöbələri nəticə etibarilə qarşıya qoyulan vəzifələri reallaşdırmaqda çətinliklərlə üzləşirlər. Respublika üzrə orta məktəblərin buraxılış imkanları maksimum 50 bal həddində müəyyən edilmişdir. Ötən tədris ilinin yekunlarına görə, Saatlı rayonunda bu göstərici yarıbayarı aşağı olmaqla 25,8 faiz təşkil etmişdir. Sözügedən göstərici Yevlax rayonunda 27,17 faiz, Tərtər rayonunda 27,45 faiz, Beyləqan rayonunda 28,91 faiz olmuşdur. Təəssüf ki, fərəh doğurmayan bu siyahını ayrı-ayrı rayonların hesabına uzatmaq da olar. Real mənzərə onsuz da hər kəsə aydındır. Şagird 10 il yayın istisində, qışın soyuğunda məktəbə gedib-gəlir, sonda isə müvafiq qiymət ala bilmir. Kimdir günahkar? Şagirdmi, valideynmi, yoxsa məktəbmi? Bu suala konkret cavab vermək, əlbəttə, çətindir. Gerçək olan odur ki, yüksək son nəticə bu üç tərəfin bir məqsəd uğrunda birliyi şəraitində qazanılır. Hansı rayonda ki təhsil şöbəsinin rəhbərliyi haqqında danışılan tərəflərin səylərini bir məcraya yönəldə bilir, orada uğur qazanılır. Yuxarıda adlarını çəkdiyimiz rayonlarda isə məktəb-valideyn əlaqələri formal xarakter daşıyır desək, səhv etmərik. Bu rayonların təhsil sistemində valideyn komitələrinin fəaliyyəti yox dərəcəsində, sadəcə kağız üzərindədir.

Təhsil Nazirliyinin məqsədyönlü islahatları nöqsanların aradan qalxacağına əminlik yaradır

Az sayda orta təhsil müəssisələri istisna olmaqla, əksər məktəblərin, rayon təhsil şöbələrinin ali məktəblərə qəbulun yüksək nəticələri ilə öyünməyə qətiyyən haqqı yoxdur. Gəlin etiraf edək ki, bu sahədəki uğurlar əsasən repetitor müəllimlərin adına yazılmalıdır. Xatırlatmaq istədiyimiz bir mənzərə hamıya yaxşı tanışdır. Məktəb vaxtı, dərs saatı olsa da, küçələrdə dəstə-dəstə şagirdlərin harayasa tələsdiyini çox görmüşük. Məktəbə getməyən bu uşaqlar heç bir rəsmi statusu olmayan hazırlıq kurslarına gedirlər. Niyə? Məgər məktəbdə dərs keçən yoxdur? Əlbəttə var, amma... Bu ammaların açması isə hər kəsə, o cümlədən övladının sabahını düşünən, onun xoşbəxt gələcəyi üçün hər şeyini qurban verməyə hazır olan valideynlərə də yaxşı məlumdur. Bu, reallıqdır ki, əksər məktəblərdə öz ixtisasını yaxşı bilən müəllimlər çox azdır. Təhsil Nazirliyi tərəfindən vaxtaşırı keçirilən attestasiyalar da bu prosesə təsir edə bilmir.

Sevindirici haldır ki, yeni təhsil naziri Mikayıl Cabbarov da bu nöqsanları aradan qaldırmaq üçün məqsədyönlü fəaliyyətə başlayıb və bu prosesin həyata keçməsi üçün ictimai nəzarətin vacibliyini vurğulayır. Şübhəsiz, qısa müddətdə böyük dönüşə nail olmaq çətindir. Amma Təhsil Nazirliyinin artıq həyata keçirməyə başladığı islahatların ümumilikdə milli təhsilimizin keyfiyyətcə yaxşılaşacağına ictimai inam var. Unutmayaq ki, dövlətin səxavətlə ayırdığı vəsait hesabına tikilən müasir tipli, bütün zəruri təhsil avadanlıqları ilə təchiz edilən məktəblərin yuxarı siniflərində dərsə davamiyyət bərbad vəziyyətdədir. Çünki az-çox imkanı olan valideynlər məktəb rəhbərliyi ilə razılaşır (buna sövdələşir də demək olar), uşağını məktəbdən ayırıb hazırlıq kurslarına göndərirlər. Qəribə də olsa, nəticə hər kəs üçün sərfəlidir. Hazırlığa gedən şagirdlərin əksəriyyəti ali məktəblərə daxil olur. Məktəb rəhbərləri bu uğuru öz adına çıxıb öyünürlər. Şagirdin çəkdiyi zəhmət, itirdiyi günlər hədər getmir. Valideyn, öz növbəsində, həqiqətən rahatlığa qovuşur. Cəmiyyətdə isə məktəbin nüfuzuna kölgə düşür. Əgər bu problemləri Təhsil Nazirliyi artıq gizlətmir və onları aradan qaldırmaq üçün səylə çalışırsa, demək, nikbinliyə əsas var.

Maddi imkanı zəif olan valideynlər uşaqlarını hazırlıq kurslarına göndərə bilmirlər. Məlum səbəbdən davamiyyətin zəif olduğu yuxarı siniflərdə dərslər ya heç keçilmir, ya da tamamilə formal xarakter daşıyır. Hazırlıq kurslarına gedə bilməyən şagirdlər məktəbdə də normal təhsil ala bilmirlər. Bu, özünü sonda, buraxılış imtahanlarında göstərir.

Sonda ulu öndər Heydər Əliyevin "Təhsil millətin gələcəyidir" kəlamını bir daha xatırlatmağı vacib sayırıq. Gələcəyimizin aydın və etibarlı olması üçün hər kəs gücü çatan hər şeyi etməlidir. Məktəbin cəmiyyətin fövqündə olması üçün dövlətimizin müəyyən etdiyi tədbirlərin icrasına hər birimiz yardımçı olmalıyıq.

Lazım QULİYEV

Azərbaycan. - 2013.- 4 sentyabr.- S. 7.