Uğurlu inkişaf modeli

Nüfuzlu "BizNewsAsia" jurnalı ötən on ildə Azərbaycanın daxili və xarici siyasət sahəsində qazandığı uğurları konkret faktlar əsasında şərh edib

Ölkə rəhbərliyinin son 10 ildə elmi əsaslarla yürütdüyü sosial-iqtisadi strategiya nəticəsində cəmiyyətin ümumi potensialının milli məqsədlər naminə səfərbər olunması inkişaf prosesində yüksək dinamizmi və məqsədyönlülüyü təmin etmişdir. Paytaxt və regionların davamlı inkişafı, sosial infrastrukturun yenidən qurulması, milli iqtisadiyyatın neft amilindən asılılığının qeyri-neft sektorunun tərəqqisi hesabına aradan qaldırılması üçün görülən kompleks tədbirlər bugünkü uğurlarımızı şərtləndirmişdir. Həyata keçirilmiş məqsədyönlü iqtisadi siyasət hesabına Azərbaycanda özəl sektor yeni inkişaf dönəminə qədəm qoymuşdur.

2003-cü ilin oktyabrından başlanan yeni inkişaf mərhələsində iqtisadi sahədə keçid dövrünün başa çatdırılması üçün qətiyyətli, çevik addımlar atılmış, zəruri islahatlar həyata keçirilmişdir. Azərbaycan Prezidenti müasir dünyada iqtisadi inkişaf potensialının hər bir dövlətin gücünü müəyyən edən başlıca amil kimi çıxış etdiyini haqlı olaraq ilk gündən önə çəkdi. Xüsusi qeyd etdi ki, ölkənin və xalqın bütün problemlərinin - sosial çətinliklərin aradan qaldırılmasından tutmuş Ermənistan-Azərbaycan, Dağlıq Qarabağ münaqişəsinin ədalətli həllinədək - hər bir maneənin dəf edilməsinin başlıca yolu məhz iqtisadi tərəqqidən keçir. Təsadüfi deyil ki, dövlət başçısının ötən fəaliyyəti dövründə əsas ağırlıq mərkəzi bu sahənin üzərinə salındı.

Regionların sosial-iqtisadi inkişafına dair Dövlət Proqramında vacib məqam insan amili ilə şərtlənmişdir. Yeni sosial infrastruktur obyektlərinin - təhsil, mədəniyyət, səhiyyə, rabitə müəssisələrinin tikintisi, yeni yolların çəkilişi və əsaslı bərpası istiqamətində kompleks tədbirlər həyata keçirilmişdir. Bu da, öz növbəsində, insan amilinin yüksəlişinə, bölgələrdə mədəni-intellektual potensialın güclənməsinə, mənəvi-əxlaqi dəyərlərin daha möhkəm əsasda intişar tapmasına zəmin yaratmışdır. "Mən hər bir azərbaycanlının Prezidenti olacağam" deyən dövlət başçısı İlham Əliyev bölgələrdə yaşayan vətəndaşların sosial infrastruktur baxımından paytaxtla bərabər səviyyədə layiqli həyat tərzinin təmin olunmasına, regional inkişafdakı fərqin doğurduğu mənəvi-psixoloji fəsadların aradan qaldırılmasına çalışmışdır.

Ölkəmizin sosialyönümlü iqtisadi siyasətinin ən parlaq göstəricilərindən biri də ötən on il ərzində 1 milyon 180 min yeni iş yerinin açılması, ciddi sosial bəla kimi özünü göstərən işsizlik probleminin əhəmiyyətli dərəcədə aradan qalxması, habelə yoxsulluq həddinin 44 faizdən 6 faizə enməsidir. Bu ilin altı ayında 55 min iş yeri açılmışdır. Onlardan 45 mini daimi iş yeridir. Gənc ailələrin mənzillə təmini üçün ipoteka sisteminin yaradılması, eləcə də dövlət büdcəsindən maliyyələşən strukurlarda məvaciblərin mütəmadi olaraq qaldırılması bu istiqamətdə görülən mühüm tədbirlər sırasındadır.

Ölkədə həyata keçirilən liberal iqtisadi siyasət, makroiqtisadi və maliyyə sabitliyinin qorunmasının təmin edilməsi, dayanıqlı iqtisadi artımın və iqtisadiyyatın modernləşməsinə dəstək verən siyasətin dərinləşdirilməsi, qeyri-neft sektorunun sürətlə inkişaf etdirilməsi qazanılan müsbət nəticələrdir. Respublikanın əldə etdiyi uğurlar dünyanın ən nəhəng reytinq təşkilatları və maliyyə institutlarının hesabatlarında da əksini tapmışdır. Azərbaycanın adı son illərdə maliyyə təşkilatlarının qiymətləndirmələrində islahatçı və pozitiv dəyişikliklərə nail olan dövlətlər sırasında çəkilir. Ölkə həyatının bütün sahələrində əldə olunan uğurlar beynəlxalq təşkilatların hesabatlarında, nüfuzlu sosioloji mərkəzlər tərəfindən vaxtaşırı keçirilən rəy sorğularında təqdir olunur, respublikamızın davamlı inkişaf yolunda olduğu xüsusi vurğulanır.

2012-ci ilin sonuna Azərbaycan üzrə "Avropa Qonşuluğu Barometri" çərçivəsində keçirilən sorğunun nəticələri bu baxımdan diqqəti cəlb etmişdir. Qeyd edək ki, sorğu Avropa Qonşuluq Siyasəti ölkələrində ictimai rəyin öyrənilməsi üzrə Avropa İttifaqı (Aİ) tərəfindən maliyyələşdirilən layihə çərçivəsində 2012-ci ilin noyabr-dekabr aylarında 1.000 respondent arasında keçirilmişdi. Rəyi soruşulanların 65 faizi öz həyatından razı olduğunu bildirimişdi. Həyatından məmnun qalanlar sırasında gənclər və təhsil alan respondentlər xüsusi yer tutur. Rəyi soruşulanların böyük əksəriyyəti öz hökumətinə (92 faiz) və parlamentə (68 faiz) inandığını ifadə etmişdir.

Bu yaxınlarda Dialoq və Əməkdaşlıq Uğrunda İslam Konfransı Gənclər Forumu (DƏİKGF) İstanbulda dünyanın 40 ölkəsindən 50-dən artıq universitetini təmsil edən 170-dən çox gənc və 10 minə yaxın tələbə arasında onlayn sorğu keçirildi. Sorğuya əsasən Azərbaycan Respublikasının Prezidenti

İlham Əliyev İƏT coğrafiyasında "İlin dövlət başçısı" seçildi. Bu barədə qərar iyulun 6-da DƏİKGF və Malayziya Beynəlxalq İslam Universitetinin (MBİS) təşkilatçılığı ilə Kuala Lumpur şəhərində keçirilən 3-cü Beynəlxalq İslam Əməkdaşlıq Təşkilatı Modelinin Sammitinin bağlanış mərasimində elan edildi.

"İlin dövlət başçısı" nominasiyasında iştirak etmiş və İƏT-in 57 üzv ölkəsi sırasından seçilmiş dövlət başçılarının namizədlikləri İslam irsinə göstərilən qayğı, İƏT ölkələri arasında həmrəyliyin möhkəmləndirilməsi, təşkilata üzv ölkələrin sosial-iqtisadi inkişafı və beynəlxalq mövqelərinin gücləndirilməsi sahəsində fəaliyyətləri kimi meyarlar üzrə qiymətləndirilmişdi. Dövlət başçısı bu nominasiyanın qalibi oldu.

Prezident İlham Əliyev "İlin dövlət başçısı" seçilərkən Azərbaycan Prezidentinin rəhbərliyi altında əldə olunmuş nailiyyətlər, o cümlədən Azərbaycanın BMT Təhlükəsizlik Şurasına qeyri-daimi üzv seçilməsi və bu mövqedən İƏT ölkələrinin maraqlarının müdafiəsi, Fələstin Dövlətinə Yardım üzrə İslam Maliyyə Təhlükəsizliyi Şəbəkəsinin Təsis Konfransı və Qüds şəhərinin İnkişafına Yardım üzrə Donor Konfransına 2013-cü ilin iyununda Bakıda ev sahibliyinin edilməsi, bütövlükdə Azərbaycanın İƏT-in İslam həmrəyliyi istiqamətində fəaliyyətinə dəstəyi, həmçinin Cənubi Qafqazın ilk məscidi və İslam sivilizasiyasının incisi sayılan Şamaxı məscidinin bərpası təşəbbüsləri nəzərə alınıb.

"Rəy" Monitorinq Mərkəzi tərəfindən keçirilən ümumrespublika ictimai rəy sorğusunun nəticələri də böyük qürur hissi doğurmuşdu. Prezident seçkiləri ilə bağlı ümumrespublika rəy sorğusu iştirakçılarının 81,2 faizi dövlət başçısı İlham Əliyevə səs verəcəyini bildirmişdir. Belə ki, "Bu namizədlərdən hansına səs verərdiniz?" sualına cavabda respondentlərin 81,2 faizi İlham Əliyevin, 3 faizdən az hissəsi isə digər namizədlərin adlarını çəkmişdir. Hesabat 2013-cü il iyulun 22-28-də keçirilmiş ümumrespublika ictimai rəy sorğusunun materialları əsasında hazırlanmışdır. Sorğuya 18 və yuxarı yaşlı 1.500 nəfər cəlb edilmişdir.

Ölkə başçısı ötən 10 illik fəaliyyəti dövründə məhz respublikamız üçün taleyüklü, strateji əhəmiyyətli hadisələrin müəllifinə çevrilmiş, ardıcıl və sistemli surətdə həyata keçirdiyi islahatlar cəmiyyətin mənəvi yüksəlişinə və birliyinə xidmət etmişdir. Dövlət başçısının özünəməxsus liderlik keyfiyyətləri, siyasi prosesləri yönəltmək məharəti, cəmiyyətin maraq və mənafelərini ümumi bir nöqtədə birləşdirmək bacarığı Azərbaycan xalqının ona olan sonsuz etimadının əsas səbəblərindən biri kimi çıxış edir.

Filippində nəşr olunan və Asiya qitəsinin inkişaf etmiş ölkələrində həyata keçirilən uğurlu islahatları, dövlət başçılarının fəaliyyətini əks etdirən, geniş oxucu kütləsinə malik "BizNewsAsia" jurnalı Azərbaycan Respublikasının Prezidenti İlham Əliyevi "İlin adamı" elan etmişdir. Jurnalın avqust buraxılışında "İlham Əliyev: İlin adamı", "Əliyev erası: Azərbaycanın qızıl dövrü", "İlham Əliyev builki prezident seçkilərində Yeni Azərbaycan Partiyasının namizədidir", "Sosial təminatlar və yüksək maaşlar Azərbaycanda yoxsulluğu azaltmışdır", "Dünya Bankının Azərbaycana sualı: Yoxsulluğun azaldılmasına necə nail olmaq mümkündür?", "İqtisadiyyatın şaxələndirilməsi yolları" və digər məqalələr dərc olunmuşdur.

Məqalələrdə Prezident İlham Əliyevin fəaliyyəti və onun rəhbərliyi ilə ölkəmizdə bütün sahələrdə həyata keçirilən uğurlu islahatlar, əldə olunan nailiyyətlər haqqında ətraflı məlumat verilir. Həmçinin dövlət başçısının ilk dəfə prezident seçildiyi 2003-cü illə müasir dövr müqayisə edilir və ötən illər ərzində əldə olunmuş uğurlardan ətraflı bəhs olunur. Ölkə başçısının zəngin ictimai-siyasi və dövlətçilik fəaliyyətinin də yer aldığı yazılarda ötən on ildə Azərbaycanın daxili və xarici siyasət sahəsində qazandığı uğurlar konkret faktlar əsasında şərh edilir. Bildirilir ki, bu uğurlara Azərbaycan Prezidentinin dövlətçilik bacarığı və rəhbərlik qabiliyyəti sayəsində nail olunmuşdur. Məhz İlham Əliyevin prezidentliyi dövründə Azərbaycan dünyada özünəməxsus yer tutmuşdur.

Nəşrdə Prezident İlham Əliyevin rəhbərliyi ilə ölkəmizdə iqtisadiyyatın modernləşdirildiyi, işsizlik və yoxsulluq probleminin aradan qaldırıldığı diqqətə çatdırılır. Qeyd edilir ki, dünyanı bürümüş iqtisadi böhran Azərbaycana heç bir təsir göstərməmişdir. Ölkədə istər enerji sahəsində, istərsə də qeyri-neft sektorunda, xüsusilə də təhsil, səhiyyə, informasiya-kommunikasiya texnologiyaları, kənd təsərrüfatı sahələrində uğurlu islahatlar həyata keçirilir. Bu ilin əvvəlində Azərbaycan orbitə ilk telekommunikasiya peykini buraxmaqla kosmik ailənin üzvünə çevrilmişdir.

Bakının bir sıra mötəbər forumlara, konfranslara, simpoziumlara, müsabiqələrə yüksək səviyyədə ev sahibliyi etdiyini vurğulayan jurnal Prezident İlham Əliyevin dünya dövlətlərinin liderləri ilə keçirdiyi görüşləri, eləcə də Azərbaycanda aparılan genişmiqyaslı abadlıq-quruculuq işlərini əks etdirən çoxsaylı şəkillərə də yer vermişdir.

Jurnalda Ermənistan-Azərbaycan, Dağlıq Qarabağ münaqişəsi haqqında da ətraflı məlumat verilir. Qeyd edilir ki, Ermənistan Dağlıq Qarabağı və ona bitişik yeddi rayonu işğal etmişdir. Bu gün Azərbaycan torpaqlarının 20 faizi işğal altındadır, bir milyondan artıq azərbaycanlı isə öz ölkəsində qaçqın və məcburi köçkün vəziyyətində yaşayır. Ermənistanın işğalçılıq siyasəti mötəbər beynəlxalq qurumlar tərəfindən qəbul edilmiş qətnamə və qərarlarda dəfələrlə pislənmişdir. Rəsmi Yerevan isə bu sənədlərə məhəl qoymur. ATƏT-in Minsk qrupunun münaqişənin həlli istiqamətində göstərdiyi səylər hələ də heç bir nəticə vermir.

Ölkə başçısının yürütdüyü uğurlu diplomatiya sayəsində dünya siyasətinə təsir imkanları getdikcə artan Azərbaycanın bütövlükdə Avratlantika coğrafi arealında sülh, tərəqqi və əməkdaşlıq paytaxtına, habelə beynəlxalq miqyaslı enerji-kommunikasiya layihələrinin lokomotivinə çevrildiyi getdikcə daha qabarıq sezilir. Bu xarici siyasət strategiyası müstəqil dövlətimizin milli mənafelərinə hörmətlə yanaşan bütün beynəlxalq təşkilatlar və xarici dövlətlərlə əməkdaşlıq əlaqələrinin daha da genişləndirilməsi müstəvisi üzərində qurulmuşdur. Rəsmi Bakının yürütdüyü prinsipial siyasətin nəticəsi olaraq regionda sülh, sabitlik və iqtisadi əməkdaşlığa ciddi təhlükə olan Ermənistan-Azərbaycan, Dağlıq Qarabağ münaqişəsinin həlli ilə bağlı beynəlxalq səviyyəli müzakirələrin son vaxtlar yenidən intensivləşməsi müşahidə olunur. Aşkar görünür ki, dünyada baş verən mühüm geosiyasi dəyişikliklər fonunda Cənubi Qafqazdakı münaqişə ocaqlarının söndürülməmiş qalması ümumi siyasi mənzərəyə mənfi təsir göstərməklə yanaşı, bölgədə iqtisadi və siyasi maraqları olan dövlətlərin mənafelərini ciddi şəkildə təhdid edir.

Azərbaycan rəhbərliyi beynəlxalq hüquq prinsiplərini əsas tutaraq praqmatizmə, qarşılıqlı faydalı əməkdaşlığa əsaslanan açıq xarici siyasət xətti yürüdür. Ölkə diplomatiyası regional əməkdaşlıq, enerji təhlükəsizliyi, habelə beynəlxalq təşkilatlarda təmsilçilik kimi məsələlərdə milli maraqların prioritetliyini maksimum səviyyədə təmin edir, bölgədə müşahidə olunan neqativ geosiyasi dəyişiklik meyillərinə rasional və təmkinli münasibət göstərir. Təcrübə də göstərir ki, qlobal geosiyasi məkanda cərəyan edən proseslərə çevik və adekvat reaksiyası ilə seçilən, çoxqütblü əməkdaşlığa üstünlük verən ölkələr tez bir zamanda qarşıya qoyduqları bütün məqsədlərə yetişə bilirlər.

Elnur HACALIYEV

Azərbaycan. - 2013.- 31 avqust.- S. 9.