Azərbaycanlı gənclərin xaricdə təhsil almağa göndərilməsi ənənəsinin əsası ümummilli lider Heydər Əliyev tərəfindən qoyulmuşdur

Təhsil naziri Mikayıl Cabbarov 2013-2014-cü tədris ilində xarici ölkələrin ali təhsil müəssisələrində "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində təhsil almaq üçün Azərbaycan Respublikası Prezidenti yanında Təhsil üzrə Komissiya tərəfindən barələrində müsbət qərar verilmiş növbəti 58 tələbə ilə görüşmüşdür.

Təhsil Nazirliyindən AzərTAc-a bildirmişlər ki, görüşdə M.Cabbarov azərbaycanlı gənclərin xaricdə təhsil almağa göndərilməsi ənənəsinin əsasının ümummilli lider Heydər Əliyev tərəfindən qoyulduğunu diqqətə çatdırmışdır. Xaricdə təhsil alan gənclərə xüsusi diqqət göstərildiyini vurğulayan nazir ulu öndərin ideyalarının Azərbaycan Prezidenti İlham Əliyev tərəfindən uğurla həyata keçirildiyini söyləmişdir.

M.Cabbarov Dövlət Proqramı çərçivəsində təhsil alan tələbələrin seçdikləri ixtisaslar üzrə yüksək səviyyəli mütəxəssis olacaqlarına əminliyini vurğulamış, onlara uğurlar arzulamışdır.

Azərbaycan. - 2013.- 5 sentyabr.- S. 6.