Azərbaycanın Fövqəladə Hallar Nazirliyi ilə Əfqanıstanın müvafiq qurumu arasındakı əməkdaşlıq əlaqələri müzakirə olunmuşdur

Sentyabrın 4-də Azərbaycan Respublikasının fövqəladə hallar naziri, general-polkovnik Kəmaləddin Heydərov Əfqanıstan İslam Respublikasının neft və təbii ehtiyatlar naziri Vahidullah Şahraninin rəhbərlik etdiyi nümayəndə heyəti ilə görüşmüşdür.

Fövqəladə Hallar Nazirliyindən AzərTAc-a bildirmişlər ki, görüşdə nazir qonaqlara respublikada fövqəladə halların qarşısının alınması və nəticələrinin aradan qaldırılması sahəsində görülən işlər, nazirliyin strukturuna daxil olan qurumların fəaliyyəti barədə ətraflı məlumat vermişdir.

Eyni zamanda, hər iki ölkənin müvafiq qurumları arasındakı əməkdaşlıq əlaqələrinin daha da inkişaf etdirilməsinin vacibliyini vurğulamışdır.

Qonaq öz növbəsində ölkələrimiz arasındakı dostluq və əməkdaşlıq münasibətlərinin inkişafından məmnunluğunu ifadə etmiş və hər iki dövlətin müvafiq qurumları arasında mövcud əməkdaşlığın daha da genişləndirilməsinin zəruriliyini bildirmişdir.

Görüşdə qarşılıqlı maraq doğuran digər məsələlər ətrafında geniş müzakirələr aparılmışdır.

Azərbaycan. - 2013.- 5 sentyabr.- S. 6.